Read saamia Sekaria 8 Bible Online

Sekaria 8 - saamia bible

Sekaria 8

¹Omwaami w'Obunyala yaamberesa emboosi yino yichiire Sakaria,

²“Ese ndahekoomba luleeyi ohuhoonya Yerusalemu ohweema hu buheeri bwaange buungi muno eyiri abaandu b'esiko esyo, obuheeri bwakera ese ndanyoolerera abasuku basyo.”

³“Ese sakira, njia ohukobola mu Yerusalemu, esiko sihunuufu syaange syoolerefu esyo, mani menye mu bweene omwo. Sicha ohumanyihana koti esiko sihunuufu syeesikwa, mani esigulu sy'Omwaami w'Obunyala sichia ohumanyihana koti esigulu syoolerefu.

⁴Ehabi liindi haandi abasaacha bakofu neende abahasi bakofu, abakofula bediira hu midiiro nibakeenda, bachia ohunyolehanaanga nibehaale mu bipaapi by'esiko sihunuufu esyo.

⁵Haandi amakira kasyo kachia ohwiichulamo abasyaani neende abahaana ni babaya.

⁶“Sino siinyala ohuba nisibonehana koti esitanyaliha eyiri ebyaalo byadoong'ao, nae haba si sidinyu yi ndi daawe.

⁷Ese njia ohununula abaandu baange ohutula mu byaalo bi bairwaangamo,

⁸mani mbakobose engo ohutula ebukwe neende emuumbo, bamenyeenge mu Yerusalemu. Bachia ohubechaanga abaandu baange, nae ese njia ohubechaanga Nasaae waabwe, ni mbatuka neende obweesikwa haandi neende obuhoyera.”

⁹“Mugume! Mbao bulaanu muli ohuwuliraanga emboosi nasilala neende echio chi banabbi balomalomaanga mu siha si musiingi kwali ni kuyabirwamo, ohwoombaha buyaaha Enyuumba ya Nasaae njaaha.”

¹⁰“Esiha syeene esyo ni syali nisisisiiri ohwoola, abulao oyo yeesi owali naanyalaangaho ohupakasa kata sa abaandu, kata sa ebisolo, haandi abulao oyo yeesi owali naabula omusuku. Ese ndali ni ndakaluuhania buli muundu yaatula hu waasye.

¹¹Nae ese bulaanu ndi ohudiira abo abawoniao ab'esyaalo sino mu ngira yikabuhaane.

¹²Bulaanu bachia ohutakaanga ebimera byaabwe nibali mu muleembe. Emisabbiibbu kyaabwe kichia ohwamaanga emisabbiibbu kyakyo, eloba lyosi lichia ohutulaangamo ebimera, haandi efula yicha ohubechaanga eyimala. Ese mweene niise ochia ohuberesaanga ehabi chino abaandu b'esyaalo syaange abo abachia ohuwonao.

¹³Eng'we abaandu ba Yuda neende aba Yisiraeli! Hale abateende bebwaabaanga abasyaabwe nibaboola bati, ‘Ohusihirira huhoya hwaahukwaaho ohuli koti ohwakwa hu Yuda neende Yisiraeli!’ Nae kata katyo ese njia ohubawonia, mani hu baandu bateende abo banyale ohuboolanira abeene-na-beene bati, ‘Ewe ohoya wanyoola ehabi chiri koti echeeha hu Yuda neende Yisiraeli!’ Mani sakira ewe lema omwooyo ohaye ohutya.”

¹⁴Omwaami w'Obunyala aboola ati, “Bakuuka yeeng'we nibanyoolesa, ese ndabatekehera ohusihirira hubooleho, haandi mani ndaahaya ohukaluuhaniaho ebibaaso, ohwoola lu ndooseresa abweene endekeha yaange.

¹⁵Nae bulaanu, ese ndi ohutekeha ohuberesa ehabi abaandu ba Yerusalemu neende aba Yuda. Mani mutatichaanga daawe.

¹⁶Mani bino nibyo ebiindu bi muhoyere ohuhola: Lomalomeenge obwadyeeri eyiri abasyeeng'we. Nimuli mu siina sy'amalako holeenge ebihoyera byoong'ene, ebinyala ohuleetao omuleembe.

¹⁷Mutatekehaanga engira chinyayaala abasyeeng'we. Mutatusaanga obuloli butahoyera ni mweechubire. Ese ndasyuula obubacha, ohuhola ebitachiana, neende embaanga.”

¹⁸Omwaami w'Obunyala bwoosi haandi yababeresa Sakaria emboosi yino yiti:

¹⁹“Ebisiibo bibechaangao mu mwoosi kwa hane, okwa hataanu-na-habiri, alala neende omwoosi kw'ehumi bichia ohuhuswaanga koti ebidyaalo by'ohweehoya neende ohwesangaasa hw'abaandu ba Yuda. Muhoyere ohuheeraanga obwadyeeri neende omuleembe.”

²⁰Omwaami w'Obunyala aboola ati, “Esiha sichia ohwoola, si baandu ohutula mu biko bihunuufu bachia ohweyunaanga nibeecha mu Yerusalemu.

²¹Abo ohutulaanga mu siko sihunuufu silala, bachia ohubooleraanga abo abali mu siindi bati, ‘Efwe huchia ohwiinamiraanga Omwaami w'Obunyala bwoosi, haandi ohumwekweedaanga ehabi chiae. Eng'we mwesi mwiiche huchiaane!’

²²Abaandu baangi muno, haandi ebyaalo by'obunyala buungi, bicha ohwanguyaanga ohwiicha mu Yerusalemu ohwiinamiraanga Omwaami w'Obunyala bwoosi, haandi ohumwekweedaanga babe ehabi chiae.

²³Mu ndaalo cheene echio, abaandu bateende ehumi abalaamba bachia ohwebuungaanga hu muundu Muyudaaya mulala nibaboola bati, ‘Efwe hudaha hukabaneho hu musaara kweeng'we, olwohuba huwuliire huti Nasaae ali naang'we.’ ”