Read saamia Malaki 1 Bible Online

Malaki 1 - saamia bible

Malaki 1

¹Yino niyo emboosi yi Omwaami yaberesa Malaki ohuboolera Abaisiraeli.

² Omwaami aboolera abaandu bae ati, “Ndabaheera endaalo choosi.” Nae eng'we muteeba muti: “Watuheera otye?” Esau neende Yakobbo bali ab'enda ndala. Nae ndadaha Yakobbo

³nae ndasyuula Esau. Ebigulu bya Esau ndabihola ekuunda mani niimbiberesa amabbwe komu siparara.

⁴Nae abeechuhulu b'Esau, Abaedomu, nibaboola bati, “Hwasihiriswa, nae huchia ohwoombaha buyaaha ebiko byasihirira,” Omwaami w'Obunyala aboola ati, “Lehe boombahe, nae njia ohubirikula-likulao.” Bachia ohulaangaangwa bati, “Esyaalo syonoona,” haandi bati, “Abaandu ba Omwaami yanyoolerera endaalo choosi.”

⁵Abaisiraeli bahabone sino, mani bahaboole bati, “Omwaami muhunuufu kata erwaanyi w'esyaalo sya Yisiraeli.”

⁶Omwaami w'Obunyala aboleere eng'we abalaamisi, ati, “Omwaami yeesa oluyaali mu laatang'ene, haandi omuhalaabani yeesa oluyaali mu mwaami wae.” Mani ni ndi laata yeeng'we, oluyaali lwaange luli yeena? Haandi ni ndi Omwaami weeng'we, oluyaali lwaange luli yeena? Mulekeresa, nae muteeba muti, “Hulekeeresa eliita lyao hutye?”

⁷Muundekeresa olwohuba muyaana hu alutaari yaange eby'omusiro. Nae muteeba muti, “Hubiholere eby'omusiro hutye?” Mubiholere eby'omusiro olwohuba muboola muti, “Emeesa y'Omwaami haba si y'oluyaali daawe.”

⁸Nimuleeta esolo chawofula ohuyaana, mubaasa muti esyo haba si sibi? Haandi nimuyaana esolo chalema oba endwaae, mubaasa muti esyo haba si sibi? Mani esolo koti echio nimuchiyaanira gaafana weeng'we, mubaasa muti anabasangaalira oba yabasiima? Omwaami w'Obunyala nilwo lu ateeba.

⁹Mani bulaanu eng'we abalaamisi, mwekongooye Nasaae atukwiire esisa. Mani neende ebiyaanwa bifwaana biti ohutula mu mahono keeng'we, mubaasa muti Nasaae anyala yabakwiira esisa? Omwaami nilwo lu aboola.

¹⁰Omwaami w'Obunyala aboola ati: “Yiba niyiriyo mulala hweeng'we onyala ohwiikalao enjiki ch'enyuumba yaange, mani mwahaya ohwaadusa omuliro hu alutaari yaange bihaya! Haba siibasangaaliraho kata nabudiidi daawe, haandi siinjia husiima ebiyaanwa bi munyaanira.

¹¹Olwohuba ohutula ebukwe ohwoola emuumbo, abaandu boosi baanjisamo oluyaali. Haandi buli abuundu, banioohesa obubbaani haandi bayaana ebiyaanwa byoolerefu. Boosi baanjisamo oluyaali.”

¹²Nae eng'we muundekeresa, mani nimuboola muti: “Emeesa y'Omwaami haba si y'oluyaali daawe, haandi ebyohulya byahwo bibulamo obuhoonyi.”

¹³Muboola muti: “Ebyo byoosi bitujoong'iisye!” Mani nindechusuula, Omwaami nilwo lu aboola. Ebisolo bi mwanyaka, oba ebilema, oba ebilwaae, nibyo bi muleeta koti ebiyaanwa byeeng'we. Mubaasa muti nyala ohubisiima? Omwaami nilwo lu ateeba.

¹⁴Omulichaki oyo, oweyama ohuumberesa esurusi yae endai ohutula mu byaayo byae, nae mani niyanyaanira eyalema, alibwaabwa. Olwohuba Ese ndi Omutuki muhunuufu, haandi abaandu bomu byaalo byoosi baanjisamo oluyaali. Omwaami nilwo lu aboola.