Read saamia Matayo 10 Bible Online

Matayo 10 - saamia bible

Matayo 10

¹Yesu yalaanga abeeki bae ehumi-na-babiri mani yaababeresa amaani k'ohwiirusa ebihyeeno, neende ohuwonia obuchuuni bwoosi alala neende amalwaae koosi.

²Ameeta k'Abatume ehumi-na-babiri niko kano: Owaamberi niye, Simooni olaangwa Petero, neende Anderea mwaanang'ina; Yakobbo omwaana wa Sebbedaayo, neende Yowaana mwaanang'ina;

³Filipo neende Bbatolomeo; Tomasi neende Matayo omutoosa w'emisolo; Yakobbo omwaana wa Alifaayo, neende Tadeo;

⁴Simooni Omukanani, neende Yuda Yisikarioti, owamuhoba.

⁵Bano nibo ehumi-na-babiri ba Yesu yatuma naabalabula ati; “Mutachichaanga mu byaalo by'Abateende, haandi muteengiraanga mu biko by'Abasamaria.

⁶Ohumalaho muchicheenge eyiri amakoondi kakota k'enyuumba ya Yisiraeli.

⁷Nae nimuchia, muyaaleenge nimuboola muti: ‘Obwaami bwo Muukulu buli aambi.’

⁸Muwonie abalwaae, musiingise abafu, mulabye ab'ebigeenge, mwiiruse emisaambwa. Mbao munyoolere amaani buhaya, sakira mukaberesanie buhaya.

⁹Mutakiingaho esaabbu, kata efeesa, kata sa omugasa muu sibiro cheeng'we,

¹⁰mutakiingaho emifuuko ky'ohusuma hu lukeendo lweeng'we luno, kata engubo chibiri kata ebiraato, oba kata sa omudiiro; olwohuba omuhalaabani ahoyera omukabo kwae.

¹¹Nae mu buli siko oba olukoongo lu muneengireengemo, muteebereseenge yi omuundu mulai olihoomo yi ali, mani mumenyaanga nae ohwoola lu muweerao.

¹²Nimwiingira mu nyuumba y'omuundu, muheseenge abalimo muti ‘Omuleembe kube naang'we.’

¹³Enyuumba eyo niyihoyerwa, muleheenge omuleembe kweeng'we kuyibaaho; nae niyitahoyerwa, muleheenge ehabi cheeng'we chibakaluhira.

¹⁴Nae omuundu yeesi naatabaakaanira, oba yaahaya ohutekeeresa emboosi cheeng'we, nimuba nimutula mu nyuumba omwo, kata mu siko esyo, muhuhumulireengemo olufu lwohu makulu keeng'we.

¹⁵ Mbaboolera obwadyeeri endi, hu ludaalo lw'ohuheengerwa omusaango, biba byahachiire bubi esiko esyo ohuhiraho esyaalo sya Sodomu neende Gomora.

¹⁶ “Mani mubone! Mbao mbatuma koti amakoondi akatikaati w'amabbwe; mubeecheenge abakesikesi koti enjuha haandi abaloonga koti amaguugu.

¹⁷ Mweliinde olwohuba abaandu bachia ohubadiiraanga, babayira mu siina syohuheengeramo emisaango, haandi bachia ohubahuyiraanga mu Sinagoogi chaabwe.

¹⁸Bachia ohubahweesaanga babayira eyiri abatuki neende abaami baabwe hulwaange, mani mutusa obuloli bwaange mu moni waabwe neende ewa Bateende.

¹⁹Nae niwiichuhana baabayira mu siina si baheengeramo emisaango, muteelalihiraanga muti hunaalomalome hutye, kata muti hunaboole siina. Olwohuba muchia ohubereswaanga esy'ohulomaloma.

²⁰Olwohuba emboosi chi muchia ohulomalomaanga ebiha ebyo haba sichinabeechaanga echeeng'we, nae chichia ohutulaanga eyiri Mwooyo wa Seeng'we ochia ohubalomalomeraangamo.

²¹Mwaanaang'ina muundu mweene niye owahatuleengeho olukwe lw'ohumwiita; haandi laatang'ene muundu yesi yahatuleengeho olukwe lw'ohwiita abaana bae; kata abaana bosi bahahayuheenge hu beebusi baabwe, ohwahatuleengemo ohubeeta.

²² Buli muundu yahabasyuuleenge hulwaange. Nae owahesimiirise ohwoola hu njakamo, niye owahawone.

²³Nibabakiiya ohubahuya mu siko silala, mwiiruheenge muchia mu siindi. Mbaboolera obwadyeeri endi, Omwaana w'Omuundu yaheeche nimutaaswaania emirimo kyeeng'we mu biko bya Yisiraeli byoosi.

²⁴ “Abulao omweeki ohira omweekesa wae oluyaali; haandi abulao omuhalaabani [21] ohira omuhoongo wae oluyaali.

²⁵ Omweeki mulai ahoyere afwaanane neende omweekesa wae, haandi omuhalaabani [22] mulai yesi ahoyere ohufwaanana neende omuhoongo wae. Nikali mbwe Omweenengo mweene alaangirwe ati Bbelisebbuuli, nae abomu daala lyae sibaba bahanyekwe ebibi ohuhirahoo!

²⁶ “Mani mutabatichaanga. Sibulao esiindu syakiswa esitahabonehe, haandi sibulao esyaama syoosi esitahamanyihane.

²⁷Bi mbaboolera mu bweekisi, mubituumbuleenge alafu. Haandi bi muwulira mu syaama mubituumbuleenge biwuliirihanira alafu.

²⁸Haandi mutatichaanga abo abeeta sa omubiri nae baahaywa ohwiita obulamu; ohumalaho muticheenge oyo onyala ohusihirisira obulamu neende omubiri, mu nyaanja y'omuliro kutasima. [23]

²⁹Obbiichu-bbiichu tubiri situkulwaanga ehela ndala yoong'ene? Nae, halala hu otwo sihanyala haakwa aasi Seeng'we naataamanyire.

³⁰Kata efwiiri lyohu mitwe kyeeng'we lyosi lyamala ohubalwa.

³¹Sakira mutatichaanga, olwohuba eng'we muli ab'obuhoonyi buungi muno ohuhira obbiichu-bbiichu.

³²“Buli muundu owundeeyama mu lwichuule lw'abaandu ati ali omuloondi waange, syesi mba njia ohumweeyama endi waange mu moni wa Laata oli Muukulu.

³³ Nae oyo yeesi owundeekaana mu moni w'abaandu, syesi mba njia ohumweekaana mu moni wa Laata oli Muukulu.

³⁴“Mutabaasa muti ndeecha ohuleeta omuleembe hu syaalo; sindeecha ohuleeta omuleembe ohutusaho ndeecha ohuleeta obulekani.

³⁵ Ndeecha ohukabuhania omwaana musyaani neende laatang'ene, haandi muhoomwaana neende masaalaang'ene;

³⁶nae abasuku b'omuundu bahabeecheenge abomu nyuumba yae yeene.

³⁷Oyo oheera laatang'ene kata ng'ina ohuhira ese, haba saaba ahoyera ohuba omuloondi waange; haandi oyo yesi oheera abaana bae ohuhira ese, saaba ahoyera ohuba omuloondi waange.

³⁸ Haandi oyo yeesi otakiinga omusalabba kwae mani yaanoonda, saaba ahoyera ohuba omuloondi waange.

³⁹Omuundu yeesi owuteemaho ohuwonia obulamu bwae hulwae omweene, achia ohubufwiirwa; nae oyo okosya obulamu bwae hulwaange, aba achia ohubuwonia.

⁴⁰ “Oyo yeesi obaakaanira aba yanjakaaniire; haandi oyo yeesi owunjakaanira haba s'aba yanjakaaniire sa syeeng'ene, nae aba yaakaaniire neende oyo owaanduma.

⁴¹Oyo yeesi owaakaanira omunabbi wa Nasaae olwohuba mbwe munabbi niye, yahakabane hu mukabo kw'omunabbi wa Nasaae oyo, haandi oyo owaakaanira omuundu mwoolerefu olwohuba mbwe mwoolerefu niye, yahakabane hu mukabo kw'omuundu mwoolerefu oyo.

⁴²Haandi, oyo yeesi oberesa mulala hu baana bayere bano amaachi manyifu k'ohung'wa, olwohuba mbwe baloondi baange nibo, mbaboolera obwadyeeri endi siyahafwiirwe omukabo kwae.”