Read saamia Matayo 11 Bible Online

Matayo 11 - saamia bible

Matayo 11

¹Nae Yesu niyamala ohulagira abaloondi bae ehumi-na-babiri atyo, yatula ao yaachia ohweekesa neende ohuyaala Emboosi Ndai mu biko byaabwe.

²Nae Yowaana ni yawuliirira mu jeela ebiindu bi Kristo yali naahola, yatuma abeeki bae ohuchia eyiri Yesu

³ohumuteeba bati, “Niiwe oyo yi baboola bati yaheeche, kose huliinde owuundi?”

⁴Nae Yesu yabakobolamo ati, “Muchie muboolere Yowaana bi muwulira, neende bi mubona;

⁵abawofu, babona; haandi abalema, bakeenda; abebigeenge baamulwaho; abadiimbe bawulira; abafu balamuha; haandi abamanani bosi bayaalirwa Emboosi Ndai.

⁶Mani ali neende ehabi oyo owutaandekanakanaho mu mwooyo.”

⁷Mani abaloondi ba Yowaana nibasiingira ohuwaao, Yesu yachaaka ohulomaloma neende abaandu ebidiira hu Yowaana n'aboola ati: “Eng'we mwachia mu siparara ohubona siina syeene? Ekada li muyaka kuwuucha nilidengaana?

⁸Nae lwasiina mwachia erwaanyi? Ohubona omuundu wefwaalire engubo ching'enaang'ena? Bone abo abefwaala engubo ch'engeri eyo, banyoolehanaanga mu madooho k'abatuki.

⁹Nae bulaanu eng'we mwachia ohubona siina? Ohubona omunabbi? [24] Eee, mbaboolera endi, nae oyo niye ohiraho omunabbi.

¹⁰Olwohuba, oyo niye yi baandiikaho bati: ‘Boneho, mbao nduma wamwaanda waange mu moni wao, ochia ohuhutereesera engira.’

¹¹Mbaboolera obwadyeeri endi, mu baandu beebulwa neende abahasi boosi, ataabahoo owuhira Yowaana Omubaatiisi; Nae kata katyo, oyo owuhiramo obudiidi mu bwaami bwo Muukulu, amuhira oluyaali.

¹²Ohutula mu ndaalo cha Yowaana Omubaatiisi, ohwoola bulaanu buti, Obwaami bwo Muukulu bunyoolehanaanga ohubitira mu maani, [25] haandi abaandu b'amaani maangi nibo ababwiingiraangamo sirifu.

¹³Olwohuba, abanabbi boosi, neende amalako ka Musa koosi, kalomaloma hu bwaami bwo Muukulu ohwoolera elalira hu Yowaana Omubaatiisi;

¹⁴nae nikali mbwe muli abeetekefu ohusifukiirira, manye enyaanga yino muti niye Elija owali wohwiicha.

¹⁵Oyo yeesi oli neende amatwi kawulira, [26] leha awulire ako.

¹⁶Nae abaandu b'endaalo chino ndahabakeraania neende siina syeene? Bali koti abaana bayere abehaale mu siito nibalaanga abasyaabwe bati,

¹⁷‘Hwaboobbera elere lisaangasa, nae mwaahaya ohuhina; haandi hwabeembera olweembo lw'amasika, nae mwaahaya ohulira.’

¹⁸“Olwohuba Yowaana yeecha naatalia haandi naatang'wa, nae baaboola bati, ‘Wuno aliho omusaambwa.’

¹⁹Nae Omwaana w'Omuundu niyeecha naalya haandi naang'wa, baboola bati, ‘Boneho, ow'okuliira, omumeesi, haandi omwiicha w'abatoosa b'emisolo neende abahola-mbi wuno!’ Nae obwadyeeri bw'amakesi ka Nasaae buboneheeraanga mu biholwa bikatulamo.” [27]

²⁰Yesu yachaaka ohwoolobya ebyaalo bi yali naaholeremo eby'amayia biingi; olwohuba byali nibyahaya ohweeyolobya ebibi byabyo, n'aboola ati,

²¹ “Chihwaakaanire, ewe Korasiini! Kata ewe Bbetisaida wesi chihwaakaanire! Olwohuba eby'amayia byeehola ebyo biba byeeholera mu Tiiro neende Sidoni, abaandu babyo baba beefunaka hale, nibefwaala amagunia, alala neende ohweebaha ekohe.

²²Nae mbaboolera endi oludaalo lw'ohuheengeraho emisaango nilwahoole, Tiiro neende Sidoni byahaleherwemo ohuhira eng'we!

²³ Nae ewe Kaperanaumu, waheniinie ohwoola hu kulu? Ochia ohwiiswa aasi ohwoola mu syaalo sy'abafu. Olwohuba eby'amayia byeehola ebyo biba byeeholera mu Sodomu, siba nisisisiiriwo ohwoola buti.

²⁴ Nae mbaboolera endi, hu ludaalo lw'ohuheengeraho emisaango, esinyaaso sya Sodomu syahabeeho esidiidi ohuhira esyao.”

²⁵Esiha esyo, Yesu yalomaloma n'aboola ati, “Ewe Laata, Omwaami w'Ekulu neende esyaalo, hweebasa muno olwohuba wakisa ebiindu bino ohutula hu bakesi neende abasomi, nae waabibwiihulira abaloonga.

²⁶Eee, Laata, sino nisyo esy'oluyaali luhoongo si wadaha syeeholehe. [28]

²⁷ Laata yamala ohuumberesa ebiindu byoosi haandi abulao omuundu omanyire Omwaana ohutusaho Simwaana, haandi abulao omuundu omanyire Simwaana muundu ohutusaho Omwaana wae alala neende oyo yi mwaana aheengao ohumubwiihulira.

²⁸Mwiiche yi ndi, eng'we mweesi abajoong'ere haandi abasidoyerwa, mani njia ohubawuluusa.

²⁹Mwedwiihe ekoombo lyaange, haandi munjekereho, olwohuba ese ndi omudiira kaala haandi omuloonga mu mwooyo; mani mwahanyoole yi muwuluusira emyooyo kyeeng'we.

³⁰Olwohuba ekoombo lyaange, lyaangu, haandi omukaangi kwaange, haba si musito.”