Read saamia Matayo 14 Bible Online

Matayo 14 - saamia bible

Matayo 14

¹Mu siha esyo Herode omutuki, yawulira efuma ya Yesu;

²mani yaaboolera abahalaabani bae ati; “Wuno niye Yowaana Omubaatiisi osyuuhire ohutula mu bafu, sakira amaani kano kali ohumuholeramo.”

³Olwohuba, Herode niye owali yadiira Yowaana, yaamusukuna mu jeela. Yahola atyo ohweema hu mboosi cha Herodia omuhasi wa Filipo mwaanang'ina; [35]

⁴olwohuba Yowaana yali yaamuboolera ati, “Haba sisifukiirirwa ewe ohubukula omuhasi oyo.”

⁵Kata Herode yadaha ohwiita Yowaana, nae yatya abaandu, olwohuba bali nibamanyire bati Yowaana yali omunabbi.

⁶Nae oludaalo lw'ohwiichulisiraho ohwiibulwa hwa Herode nilwoola, omwaana wa Herodia muhaana, yahina bulai muno mu moni wa abakeni, mani sino syasaangaasa Herode muno,

⁷mani yaasuubisa omuhaana oyo niyeechuba ohumuberesa esiindu syoosi syaaba n'asabire.

⁸Nae omuhaana oyo yeemao yaaholera hu makesi ka ng'ina yali naamubereese mani yaaboolera Herode ati, “Mberese omutwe kwa Yowaana Omubaatiisi hu lusaani bulaanu buti.”

⁹Nae sino syamala omutuki amaani muno, nae ohweema hu hweechuba huyali ni yeechubire abakeni bae nibawulira, yatya muno mani yeemao yaatusa omunwa ati, baberese omuhaana oyo syaadahire.

¹⁰Yatuma ati baachia mu jeela baaheenga hu Yowaana omutwe,

¹¹baakuleetera hu lusaani, mani baakuberesa omuhaana oyo, nae yaakuyirira ng'ina.

¹²Nae abeeki ba Yowaana beecha baabukula omubiri kwae, baachia baakusiiha, mani baaboolera Yesu.

¹³Bulaanu Yesu niyawulira sino, yatula ao, yaambuhira mu lyaato yaachia yaaba yeeng'ene abuundu abula abaandu. Nae abaandu nibawulira batyo, bamuloondaho n'amakulu ohutula mu biko byaabwe.

¹⁴Niyatula mu lyaato, yabona esidiiyiha sy'abaandu sihoongo muno, mani syamudiisa esisa, yaawonia abalwaae baabwe.

¹⁵Nae obwiire nibweera, abeeki bae beecha yaali baamuboolera bati, “Obwiire mbuno bwiirire, haandi huli abuundu abulao abaandu; sakira seebula abaandu beeweereo bachie mu ngoongo beekulire ebyohulya.”

¹⁶Nae Yesu yaboola ati, “Abaandu bano haba sibahoyere ohutula sa ano batyo; eng'we mubaberese esyohulya.”

¹⁷Nabo bamuboolera bati, “Efwe huli sa neende emigaati kitaanu kyoong'ene alala neende eng'eeni chibiri sa.”

¹⁸Nae Yesu yaboola ati, “Mubindeetere ano.”

¹⁹Mani Yesu yamala yaalagira abaandu ohwiihala aasi hu bunyaasi; mani yaabukula emigaati kitaanu neende eng'eeni chibiri ebyo, yatingaala aakulu Muukulu, yeebasa Nasaae, mani yaadonyoladonyolamo emigaati ekyo yaakiberesa abeeki bae, nae abeeki baakikaba abaandu abo.

²⁰Abaandu abo boosi balya beekuta. Mani abeeki ba Yesu baabuusa ebidonye-donye byadoong'aho beechusa ebimweero ehumi-na-bibiri.

²¹Nae abalya bali abasaacha aambi elifu chitaanu, n'otaabalireho abahasi neende abaana.

²²Abweene ao, Yesu yaboolera abeeki bae ohwiingira mu lyaato basyaabale bamutaangirire ohwaambuha bachie engereha w'enyaanja, nae omweene yaadoong'a naaseebula esidiiyiha sy'abaandu esyo.

²³Nae niyamala ohubaseebula, yaniina yeeng'ene hu lugulu ohulaama. Mani obwiire nibweera, yali adoong'ere yeeng'ene,

²⁴nae esiha esyo elyaato lyali nilyoolobereere ebusiba, [36] mani amafwiinda k'amaani nikalihubba; olwohuba omuyaka kwali nikuwuucha muno nikubatulira mu moni.

²⁵Aambi w'esaa ehumi mu maherebeende, Yesu yeecha yi bali naakeenda hu maachi.

²⁶Nae abeeki bae nibamubona naakeenda hu maachi, batya muno, baaboola bati, “Sino ngaandi siboneha sihyeeno nisyo!” Mani baatya muno boobba wuuwi.

²⁷Nae abweene ao, Yesu yalomaloma nabo n'aboola ati, “Mugume emyooyo, niise; mutatya daawe.”

²⁸Nae Petero yamukobolamo ati, “Omwaami, nooli niiwe, mboole njiche yooli syesi ningeenda hu maachi.”

²⁹Yesu yamuboolera ati, “Ngaandi keenda sa niwiicha.” Mani Petero yatula mu lyaato, yachaaka ohukeenda hu maachi naachia eyiri Yesu;

³⁰nae Petero niyabona omuyaka nikuwuucha, [37] yatya muno, yachaaka ohwiibira, mani yaahuumula ati, “Omwaami, monie!”

³¹Abweene ao, Yesu yakolola omuhono, mani yaamudiira, yaamuboolera ati, “Ewe, omusaacha w'efukiirira ndiidi, hu siina okana-kaane?”

³²Nae nibeengira mu lyaato sa bati, omuyaka kwaakama ohuwuucha.

³³Mani abo abali mu lyaato, beenamira Yesu nibaboola bati, “Mubwadyeeri bweene, oli Omwaana wa Nasaae.”

³⁴Nibamala ohwaambuha enyaanja boola engereha, bakobera Genesareeti.

³⁵Nae abaandu b'eyo, nibamanya bati niye Yesu, bachia baaboolera abaandu bomu situundu esyo syoosi, bati baleete eyiri Yesu abalwaae baabwe boosi,

³⁶mani baamusaba bati afukiirire abalwaae badiireho sa hu kemo ly'engubo yae hamaahiri. Mani abo boosi abalidiiraho, bawonera elalira.