Read saamia Matayo 15 Bible Online

Matayo 15 - saamia bible

Matayo 15

¹Olwoola, Abafarisaayo neende Abeekesa b'Amalako batula Yerusalemu beecha eyiri Yesu baamuteeba bati,

²“Lwasiina abeeki bao balekeeresa emiduunga kya bakuuka yeefwe? Olwohuba sibesaaba amahono kaabwe nibachia ohulya.”

³Yesu yabakobolamo ati, “Nae lwasiina eng'we mulekeresa amalako ka Nasaae olwohuba mudaha ohuloonda emiduunga kya bakuuka yeeng'we?

⁴Olwohuba Nasaae yaboola ati, ‘Yisaanga mu lataao neende maakoo oluyaali’ haandi, ‘Omuundu onyeka laatang'ene kata ng'ina, ahoyera ohwiitwa.’

⁵Nae eng'we muboola muti, ‘Omuundu yeesi naaboolera laatang'ene kata ng'ina ati, omukabo ku ndahahubereese mbao ngubereese Nasaae, [38] bulaanu oyo saaba ahoyera ohuberesa laatang'ene oluyaali.’

⁶Mani sakira mulehaanga ohuloonda emboosi [39] ya Nasaae, hulw'ohudaha ohuloonda emisiro kyeeng'we.

⁷Eng'we Abebachirisi! Omunabbi Yisaaya yahola bilai ohubalomalomaho n'aboola ati,

⁸ ‘Abaandu bano baamberesaanga sa oluyaali neende eminwa kyoong'ene, nae emyooyo kyaabwe kiri eyale muno naange;

⁹ohwiinama hu baanyinamiramo, hubulamo obuhoonyi, olwohuba amalako ka beekesa ka abaandu sa.’ ”

¹⁰Olwoola, Yesu yalaanga abaandu beecha yali, mani yaababoolera ati, “Muwulire mani mumanye;

¹¹esiingira muhanwa w'omuundu, sinisyo esimubaha omukwoobo, nae esitula mu munwa kwae, nisyo esimubaha omukwoobo.”

¹²Mani abeeki bae beecha yaali baamuboolera bati, “Omanyireho oti bi oboolere ebyo, bichuunire Abafarisaayo muno?”

¹³Yesu yakobolamo ati, “Buli simera syoosi si Laata oli Muukulu atataaka, sichia ohwiiywa.

¹⁴ Eng'we mubalehe sa; abo nibo abeemirisi bawofula. Nae omuwofu niyeemirira omuwofu waasye, boombi bachia ohukwa mu buko.”

¹⁵Nae Petero yamuboolera ati, “Tutumbuulireho amahuluundu k'olukaado olwo.”

¹⁶Nae Yesu yaboola ati, “Eng'we mwesi musisiiri ohumanya amahuluundu ka bino?

¹⁷Simubona muti buli siingira muhanwa w'omuundu, sichia sa mu nda mani syaasukunwa esibakala? [40]

¹⁸ Nae esitula mu munwa kw'omuundu, siba situla mu mwooyo kwae, mani nisyo esibaha omuundu omukwoobo.

¹⁹Olwohuba mu mwooyo nimwo omutula ebibaaso bibi, obwiiti, obuyirani, obucheke, obwiibi, obwaayirisi, neende ohunyaasa ameeta k'abaandi.

²⁰Bino nibyo ebinyaasa omuundu; nae ohulya noteesaabire amahono, haba sinisyo ebinyaasa omuundu.”

²¹Haandi Yesu yatula ao yaachia mu situundu siri aambi neende ebiko bya Tiiro neende Sidoni.

²²Abweene ao, omuhasi Mukanani wuundi otula mu situundu esyo, yeecha eyiri Yesu yaamulirira ati, “Omwiichuhulu wa Daudi, ngwiireho esisa; omuhaana waange aliho omusaambwa mani mulwaae muno.”

²³Nae Yesu haba siyamukobolamo kata emboosi ndala. Nae abeeki bae beecha yaali baamusaba nibaboola bati, “Museebule aweeo, olwohuba ali ohutuloonda niyelirikania-lirikania.”

²⁴Nae Yesu yakobolamo ati, “Ndatumwa eyiri amakoondi kakota k'enyuumba ya Yisiraeli koong'ene.”

²⁵Nae omuhasi oyo, yeecha yaasigama mu makulu ka Yesu yaaboola ati, “Omwaami, noojama hoonyeho.”

²⁶Nae Yesu yakobolamo ati, “Sisihoyerwa ohubukula ebyohulya by'abaana mani waabisukunira embwa.”

²⁷Omuhasi oyo nae yakobolamo ati, “Omwaami esyo syadyeeri, nae kata embwa chosi chilichaangaho ebidonye-donye bilakaha ohutula hu meesa y'omutuki wacho.”

²⁸Yesu yamukobolamo ati, “Ngooli omuhasi w'efukiirira hoongo! Leha sihuholerwe koti lwoodaha.” Mani esiha syeene esyo omuhaana wae niyeemao naawona.

²⁹Yesu yatula ao yaabitira hu ndulo wa enyaanja ya Galilaaya. Mani yaaniina hu lugulu, yeehala aasi.

³⁰Nae esidiiyiha sihoongo syeecha yaali, nibamuleetera abalema, abeebokoya emibiri, abawofu, abakwa esiru neende abaandi batyo, mani baabata mu makulu kae, yaabawonia.

³¹Abaandu bawuka muno nibabona abaandu bali bakwa esiru nibalomaloma, abeebokoya emibiri, nibawonere; abalema, nibakeenda; haandi abawofu, nibabona; mani bafumya Nasaae wa Yisiraeli.

³²Yesu yalaanga abeeki bae beecha yaali, mani yaaboola ati, “Abaandu bano bakera esisa nisiindiira muno, olwohuba babeere naange endaalo chidatu enaamba, nae bawuma esyohulya syoosi-syoosi; nae siindaha ohubaseebula nibataaliireho esiindu syoosi, olwohuba olumbuuchu lunyala lwaabadiira lwaabakwiisa hu ngira nibakaluhayo.”

³³Nae abeeki bamuboolera bati, “Nae mu siparara muno, hunaatuse yeena emigaati kinyala ohwiikusa abaandu bano boosi?”

³⁴Yesu yababoolera ati, “Muli neende emigaati kiinga?” Baboola bati, “Kitaanu-na-chibiri neende otung'eeni tudiidi tuyeraanu.”

³⁵Nae Yesu yaboolera esidiiyiha ohwiihala aasi,

³⁶mani yaabukula emigaati kitaanu-na-kibiri ekyo, neende otung'eeni otwo. Niyamala ohweebasa, yabidonyoladonyolamo, mani yaabiberesa abeeki, nae abeeki baabiberesa abaandu.

³⁷Boosi balya beekuta; mani abeeki ba Yesu baabuusa ebidonye-donye byadoong'aho, beechusa ebimweero bitaanu-na-bibiri.

³⁸Abaandu balya bali abasaacha elifu chine n'otaabalireho abahasi neende abaana.

³⁹Mani Yesu niyamala ohubaseebula, yeengira elyaato yaambuha yaachia mu situundu silaangwa siti Magadani.