Read saamia Matayo 16 Bible Online

Matayo 16 - saamia bible

Matayo 16

¹Abafarisaayo neende Abasadukaayo baandi beecha eyiri Yesu ohumuhema nibamusaba bati abeekeseho esy'amayia ohutula Muukulu.

²Nae Yesu yabakobolamo ati, [41] “Elyuuba nilichia ohukwa, muboolaanga muti, ‘esyaalo mbao sichia ohuba esiyenjeefu, olwohuba ekulu liba lyaahaanye’.

³Haandi mu mabwiibwi, muboolaanga muti, ‘Oludaalo lunaba olw'omuyaka, olwohuba ekulu lyaahaanye haandi amaleesi kamaliiye.’ Mumanyire muno ohukeraania engeri yi syaalo sichia ohubeeramo ni mutingaala sa hu maleesi, nae simunyala ohukeraania obulolero bw'ebiha bino.

⁴Oluse luno nga lubi haandi nga lucheke! Mukoonyeresa sa esy'amayia syoong'ene? Nikali katyo, sibulao esy'amayia si ndababeresa, ohutusaho esya Yona.” Bulaanu Yesu yeemao yaasiingira yaabeelehera ao yaawaawo.

⁵Nae Abeeki ba Yesu nibaambuha enyaanja boola engereha, bali beebiriire ohukiingaho omugaati kwoosi.

⁶Yesu yababoolera ati, “Mweeme buheke, haandi mweliinde eyiri amamera k'Abafarisaayo neende Abasadukaayo.”

⁷Bachaaka ohweteebanaho nibaboola bati, “Aboola atyo olwohuba sihukiingireho omugaati kwoosi kose?”

⁸Nae Yesu yamanya mu mwooyo kwae bi bali nibabaasa, mani yaabateeba ati, “Eng'we ab'efukiirira ndiidi, lwasiina mweeteebanaho obutaba neende omugaati?

⁹Eng'we mwesi, musisiiri ohumanya? Simwiichulisa emigaati kitaanu ekyeekusa abaandu elifu chitaanu? Nae ebimweero biinga bi mwabuusa?

¹⁰Oba, emigaati kitaanu-na-kibiri ekyeekusa abaandu elifu chine? Nae ebimweero biinga bi mwabuusa?

¹¹Mubeere mutye mwaahaya ohumanya muti, simbeere ninomanoma ebidiira hu mugaati? Mweliinde amamera k'Abafarisaayo neende ak'Abasadukaayo.”

¹²Abeeki bulaanu bamanya bati, Yesu siyali n'ababoolera ohweliinda amamera k'emigaati, nae yali naali ohulomalomaanga hu njekesa y'Abafarisaayo neende ey'Abasadukaayo.

¹³Bulaanu, Yesu niyeecha mu situundu silaangwa siti Kaisarea sya Filipi yateeba abeeki bae ati, “Abaandu baboola bati, Omwaana w'Omuundu niye naanu?”

¹⁴Nae baboola bati, “Abaandi baboola bati, Yowaana Omubaatiisi, abaandi bati, Elija, haandi abaandi bati, Yeremia, oba mulala hu banabbi.”

¹⁵Nae yabateeba ati, “Nae eng'we muboola muti ese niise naanu?”

¹⁶Simooni Petero yakobolamo ati, “Niiwe Kristo, Omwaana wa Nasaae mulamu.”

¹⁷Nae Yesu yamukobolamo ati, “Simooni mwaana wa Bbari-Yona, oli neende ehabi! Olwohuba obwadyeeri buno, soobunyoolere ohutula hu muundu sa, nae Laata oli Muukulu niye ohubwiihuliireo.

¹⁸Mani huboolera endi, niiwe Petero, [42] haandi hu lwaanda luno, [43] nihwo hu njia ohwoombaha Omukaanda Abakristo, ku mani kata ohufwa [44] sihwahanyale ohubayiingira.

¹⁹Njia ohuhuberesa obufunguwo bw'Obwaami bwo Muukulu, mani buli siindu syoonafuundihaanga hu syaalo, sichia ohufuundihwaanga Muukulu, haandi buli syoonatuumbululaanga hu syaalo, sichia ohutuumbululwaanga Muukulu.”

²⁰Yesu yamala atyo yaalagira abeeki bae obutabooleraho omuundu yeesi bati niye Kristo.

²¹Ohutula esiha esyo, Yesu yachaaka ohweekesaanga abeeki bae ati, ahoyere ohuchia Yerusalemu, mani Abeemeresi b'abaandu, neende Abalaamisi bahuluundu, neende Abeekesa b'Amalako, bamusaandie muno haandi bamwiite, nae hu ludaalo lwohudatu asyuuhe.

²²Nae Petero yamusudya endulo yachaaka ohumuyiingania n'aboola ati, “Omwaami! Nasaae atakanya esyo syaahweeholehaho.”

²³Yesu nae yakaluuhana mani yaaboolera Petero ati, “Mbweere-eyi, Sitaani! Leha ohundehiinga mu moni, [45] olwohuba embaasa yao eyo, haba si ya Nasaae, nae y'abaandu sa.”

²⁴Mani Yesu yaboolera abeeki bae ati, “Omuundu yeesi odaha ohunoonda, omweene yeetuseyo akiinge omusalabba kwae, mani yanoonde.

²⁵Olwohuba omuundu yesi odaha ohuwonia obulamu bwae, achia ohubufwiirwa; nae oyo yeesi ofwiirwa obulamu bwae hulwaange achia ohubunyoola.

²⁶Ngaanga siina yi muundu anyoola, naanyoola esyaalo syoosi nae yaafwiirwa obulamu bwae bweene? Oba, siina syeene si muundu yahoofwong'aniamo obulamu bwae nasyo?

²⁷Olwohuba, Omwaana w'Omuundu achia ohwiicha neende bamalaika bae mu luyaali lwa Simwaana, mani akabe buli muundu omukabo, ohweema hu biholwa byae.

²⁸Nae mbaboolera obwadyeeri endi, baliwo abaandi, hu beemere ano, abatalifwa nibataabona Omwaana w'Omuundu niyeecha mu Bwaami bwae.”