Read saamia Matayo 18 Bible Online

Matayo 18 - saamia bible

Matayo 18

¹Abweene ao, abeeki beecha eyiri Yesu baamuteeba bati, “Wiina ohiramo abaasye boosi oluyaali mu bwaami bwo Muukulu?”

²Yesu yalaanga omwaana muyere yaamweemesa akatikaati waabwe,

³mani yaaboola ati, “Mbaboolera obwadyeeri endi, haba simuchia ohwiingira mu bwaami bwo Muukulu ohutusaho nimwekaluuhaanie mwaaba koti abaana bayere.

⁴Omuundu muloonga koti omwaana wuno, niye ohiramo abaasye oluyaali mu bwaami bwo Muukulu.

⁵Haandi oyo yeesi owaakaanira omwaana muyere koti wuno mu liita lyaange, aba yanjakaaniire.

⁶“Nae omuundu yeesi okera mulala hu bayere baafukiiriramo bano yonoona, [49] ahoyera ohuboywa mu kosi okukina kuhoongo muno, mani yaasukunwa ebusiba w'enyaanja yeebira.

⁷Esyaalo syahabone ebidinyu muno, olwohuba mulimo ebiteemo bikera abaandu nibonoona! [50] Ebiteemo koti ebyo, bichia ohubaao endaalo choosi, nae chaakaanire oyo oleeta ebiteemo ebyo!

⁸ “Nae omuhono kwao nikukera wonoona, kata ohukulu hwao nihukera wonoona, [51] hutemeengeho ohusukuna; ohwiingira mu bulamu n'otaali neende omuhono oba ohukulu, bihira muno ohudoong'a neende amahono koombi oba amakulu koombi, nae waasukunwa mu muliro kutasima.

⁹ Nae emoni yao niyikera wonoona, [52] yichomoleengemo oyisukuna; bihira niwiingira mu Bulamu bwo Muukulu neende emoni ndala, ohuhira ohuba neende emoni choombi, mani waasukunwa mu nyaanja y'omuliro kutasima. [53]

¹⁰ “Mumanyaanga mutalekeeresaho kata mulala hu bayere bano; mbaboolera obwadyeeri endi Muukulu, bamalaika baabwe bamenyera buli siha ohubechaanga mu moni wa Laata oli Muukulu.

¹²Nae mubaasa mutye? Omuundu naaba neende amakoondi emia ndala, mani ekoondi lala hu ako lyaakota, siyahaleha ao amakoondi kaandi amahumi kataanu-na-kane neende kataanu-na-kane ako, hu ndulo w'olugulu, mani achia akoonya lala liba nilikotere elyo?

¹³Mbaboolera obwadyeeri endi, n'alinyoola, aba achia ohulisangaalira muno, ohuhira amakoondi amahumi kataanu-na-kane neende kataanu-na-kane katakotaho kadoong'ere kala.

¹⁴Nilwo nasilala lu Laata oli Muukulu atahadaha [55] kata mulala hu bayere bano akote.

¹⁵ “Mani mwaanamaao naahuholeraanga esibi, chichaanga yaali omuboolera esibi syae, nae nimuli mweembi mweeng'ene. Naawulira ebyao, ao oba omalire ohumweekobasaho.

¹⁶ Nae naahaya ohuhuwulira, bukulaanga omuundu mulala oba babiri muchia nabo yaali, olwohuba emboosi yisiirwa niyiriho abaloli babiri oba badatu.

¹⁷Nae naahaya ohuwulira abo bosi, yeekesaanga Abakristo baasyo; nae haandi naahaya ohuwulira kata ak'Abakristo baasyeeng'we bosi, ao bulaanu mubukuleenge koti omukafiiri oba omutoosa w'omusolo.

¹⁸“Mbaboolera obwadyeeri endi, buli si munahayaanga hu syaalo, sichia ohuhaywaanga Muukulu, haandi buli si mufukiirira hu syaalo, sichia ohufukiirirwaangwa Muukulu.

¹⁹Haandi mbaboolera endi, babiri hweeng'we hu syaalo, nimufukiirisania hu siindu syoosi si musaba, Laata yaange oli Muukulu achia ohubaholeraanga esyeene esyo.

²⁰Olwohuba, yi baandu babiri oba badatu baba nibahung'aaniire mu liita lyaange, ao mba ndiwo akati waabwe.”

²¹Nae Petero yeecha eyiri Yesu yaamuteeba ati, “Omwaami, mwaanaama niiyaholera esibi, hoyeere ohumuleheramo amahabi kaanga? Amahabi kataanu-na-kabiri?”

²² Yesu yakobolamo ati, “Haba daawe! Si mahabi kataanu-na-kabiri, nae amahabi amahumi kataanu-na-kabiri amahabi hataanu-na-habiri, [56]

²³“Sakira Obwaami bwo Muukulu, bufwaanana neende omutuki wenya ohuteeba abahalaabani bae ebidiira hu mwaandu kwae, ku bali nakwo.

²⁴Niyali yahachaaka ohubala, bamuleetera mulala hu bali neende ekobi lyae lya etalaata elifu ehumi; [57]

²⁵nae omuundu oyo, siyali neende engeri yoosi ey'ohutuungamo ekobi elyo, mani omwaami wae yaatusa omunwa ati, akuswemo alala neende omuhasi wae, neende abaana bae, alala neende obuyiinda bwae bwoosi, atuunge ekobi elyo.

²⁶Mani omuhalaabani oyo, yakwa hu mahuumbo kae, yaamwekweeda ati, ‘Omwaami, ndeesimiiriseho, njia ohuhutuunga ekobi elyo lyoosi.’

²⁷Omwaami oyo, yamukwiira esisa, yaamuleheramo ekobi elyo lyoosi, yaamuleha yaawaao.

²⁸Nae omuhalaabani oyo, niyali naakobolayo, yabukaanana neende mulala hu bahalaabani baasye owaba neende ekobi lyae ly'edinaari emia ndala choong'ene; [58] yaamweebbakiraho, yaamukwa mu mamiro yaamumika n'aboola ati, ‘Nduunge ekobi lyaange.’

²⁹Mani omuhalaabani waasye oyo, yaakwa aasi, yaamwekweeda ati, ‘Ndeesimiiriseho, njia ohuhutuunga.’

³⁰Nae yaahaya ohumutekeeresa, yaachia yaamusukuna mu jeela, ohwoola lu yahatuungire ekobi elyo.

³¹Nae, abahalaabani baasye nibabona batyo, omwooyo kwabachuuna muno, baachia baaboolera omwaami waabwe oyo buli siindu syali nisyeeholeehe.

³²Omwaami oyo yeemao yaalaanga omuhalaabani oyo yaamuboolera ati, ‘Omuhalaabani mubi ewe! Ese ndahuleheramo ekobi lyakiire ao lyoosi li waba nalyo olwohuba wandekweeda;

³³nae ewe, haba siwahakwiriire omuhalaabani waasyo oyo esisa, koti lu ndahukwiira?’

³⁴Mani etima lyadiira omwaami oyo muno, yaasukuna omuhalaabani oyo mu mahono ka bomu jeela [59] ohwoola lu yahatuungire ekobi lyae lyoosi.

³⁵Olwo nilwo lu Laata yaange oli Muukulu achia ohuholera buli muundu hweeng'we, nimutaleheramo abasyeeng'we neende emyooyo kyeeng'we kyoosi.”