Read saamia Matayo 19 Bible Online

Matayo 19 - saamia bible

Matayo 19

¹Nae Yesu niyamala ohulomaloma emboosi echo, yatula Galilaaya yachia mu situundu sya Yudea, engereha w'omwaalo kwa Yorodaani;

²mani esidiiyiha sy'abaandu syamuloondaho, yaabawonisirya ebweene eyo.

³Nae Abafarisaayo beecha yaali bamuhema nibamuteeba bati, “Mani elako lifukiiriraho omuundu ohulehanira elalira neende omuhasi wae hulw'esifune syoosi?”

⁴Yesu yakobolamo ati, “Musisiiri ohusomaho muti ohutula muhuchaaka, Nasaae yaloonga omusaacha neende omuhasi,

⁵mani yaaboola ati, ‘Hulw'esifune sino, omusaacha achia ohulehaanga laatang'ene neende ng'ina, yeyambaania neende omuhasi wae, mani boombi beehola omubiri mulala’?

⁶Haba bulaanu sibaba nibasisiiri babiri, nae omubiri mulala. Sakira esyo si Nasaae yaambaania alala, omuundu yeesi atasikabuhaniaanga.”

⁷Nae Abafarisaayo bamuteeba bati, “Lwasiina Musa yatusa elako ati, omusaacha abereseenge omuhasi wae ebbarwa yohulehanira nae elalira?”

⁸Yesu yabakobolamo ati, “Musa yabafukiirira ohulehaniraanga elalira neende abahasi beeng'we, hulw'obwaangalafu bw'emyooyo kyeeng'we, nae sibyabechaanga bityo ohutula muhuchaaka.

⁹Haandi mbaboolera endi, oyo yeesi olehanira elalira neende omuhasi wae, ataali hulw'obucheke,” [60] mani yaadeehya owuundi, aba aholere obucheke, [61]

¹⁰Abeeki bae nabo bamuboolera bati, “Ebiindu nibiba bityo akatikaati w'omusaacha neende omuhasi wae, mani mbao obutadeehya biba bihira.”

¹¹Nae Yesu yababoolera ati, “Abaandu boosi sibanyala baafukiirira enjekesa yino, nae ohumalaho abo ba Nasaae aba yeekulirewo.

¹²Olwohuba, biriwo ebiindu bitaali nasilala ebikera omuundu yaahaya ohudeehya. Abaandu baandi sibanyala ohudeehya olwohuba beebulwa batyo; abaandi balooywa sa, mani sibanyala ohudeehya; nae abaandi sibanyala ohudeehya olwohuba beefwiirisa obulamu bw'ohudeehya, hulw'ohuhalaabanira Obwaami bwo Muukulu. Mulehe oyo onyala ohufukiirira, afukiirire.”

¹³Mani baleeta abaana bayere eyiri Yesu abeeseho amahono haandi abasabire. Nae abeeki bae baakayira abaandu.

¹⁴Nae Yesu yababoolera ati, “Mulehe abaana bayere beeche yi ndi, haandi mutabakayira daawe; olwohuba obwaami bwo Muukulu bw'abaandu bafwaana koti bano.”

¹⁵Yesu yeemao yaabeesaho amahono, mani yeweerao.

¹⁶Abweene ao, omuraaga wuundi yeecha eyiri Yesu yaamuteeba ati, “Omweekesa, silai siina si hoyeere ohuhola, hu nyoole obulamu butaakama?”

¹⁷Yesu yakobolamo ati, “Lwasiina wuundeeba hu biindu bilai? Aliwo omuundu mulai mulala yeeng'ene. Nae nooba n'odaha ohwiingira mu bulamu, diiraanga amalako ka Nasaae.”

¹⁸ Omuraaga oyo yateeba Yesu ati, “Malako siina?” Yesu yamukobolamo ati, “Oteetaanga; Otayiranaanga; Oteebaanga; Otabachaanga;

¹⁹yisaanga mu lataao neende maakoo oluyaali; haandi, heeraanga owaasyo koti lu weeheera omweene.”

²⁰Omuraaga oyo yaboolera Yesu ati, “Ebyo byoosi byooseresaanga. Siina siindi esidoong'ereo ohuhola?”

²¹Yesu yaamuboolera ati, “N'odaha ohuba omuundu mwoolerefu, chia okusemo ebiindu by'oli nabyo byoosi, mani eseende chitulamo ochikabire abamanani, ao oba ochia ohunyoola obuyiinda Muukulu; mani omale wiichie wuunoonde.”

²²Nae omuraaga oyo niyawulira atyo, yatula ao yaawaao n'asinyiihe muno, olwohuba yali neende obuyiinda buungi muno.

²³Yesu yaboolera abeeki bae ati, “Mbaboolera obwadyeeri endi, bichia ohudinyira muno omuundu muyiinda ohwiingira mu bwaami bwo Muukulu.

²⁴Haandi mbaboolera obwadyeeri endi, syaangu muno engamia ohubitira mu moni y'esindani, ohuhira omuundu muyiinda ohwiingira mu Bwaami bwa Nasaae.”

²⁵Nae abeeki bae nibawulira sino, bawuka muno baaboola bati, “Mani nikali katyo, wiina mweene owahanyala ohuwona?”

²⁶Yesu yabatingaala tiiri mu moni, yaabakobolamo ati, “Sino sisinyaliha eyiri abaandu, nae eyiri Nasaae, buli siindu sinyaliha.”

²⁷Abweene ao, Petero yakobolamo n'aboola ati, “Bone, efwe hwaleha ebiindu byoosi mani hwaahuloonda. Ni siina si hwahanyoole?”

²⁸Yesu yababoolera ati, “Mbaboolera obwadyeeri bweene endi mu syaalo siyaaha, Omwaana w'Omuundu niyaheehale hu sisala syae sy'oluyaali, eng'we abaanoondaho mweesi muchia ohwiihala hu bisaala by'obutuki, ehumi-na-bibiri, nimuheengera enono ehumi-na-chibiri cha Yisiraeli omusaango.

²⁹Mani buli muundu yeesi owaleha enyuumba, kata bamwaanang'ina, kata bambochoong'ene, kata laatang'ene, kata ng'ina, kata abaana, kata eloba, hulw'eliita lyaange, achia ohunyoola amahabi emia ndala yeebyo, [62] alala neende Obulamu Butaakama.

³⁰Nae abaangi abataangiramo bachia ohumaliirihayo, nae abamaliirihayo bachia ohutaangiramo.”