Read saamia Matayo 25 Bible Online

Matayo 25 - saamia bible

Matayo 25

¹ “Sakira Obwaami bwo Muukulu bulifwaananisibwa neende abahaana ehumi, abakiinga amataara kaabwe, baachia ohubukaanira omweeya musaacha. [79]

²Bataanu hu abo, baba abasiru, nae bataanu baaba abakesi.

³Abahaana bataanu basiru balala, bakiinga amataara kaabwe, nae sibakiinga amafuta kayera daawe.

⁴Nae abahaana bataanu bakesi bala, bakiinga echupa ch'amafuta kayera alala neende amataara kaabwe akamala.

⁵Nae, koti lu mugole musaacha oyo yahiinda ohwoola, boosi bachaaka ohukuunuhaanga, mani endoolo chaamala chaabayira.

⁶Mani mu siro akati, esihu syechiira nibaboola bati, ‘Bone, omweeya musaacha nguno yoolere! Mutule mumubukaanire!’

⁷Abweene ao, abahaana abo boosi basiingira mani bawaambia amataara kaabwe.

⁸Bulaanu abahaana basiru bala bachia baaboolera abakesi bala bati, ‘Eng'we mutubeeho hu mafuta keeng'we, mbano amataara keefwe kadaha ohusima.’

⁹Nae abahaana bakesi bakobolamo bati, ‘Wiichuhana amafuta ka huli nako kaahaya ohutuyera, efwe naang'we. Silai muchie eyiri abakusa amafuta, abeene mweekulire.’

¹⁰Nae nibali bachiire ohukula amafuta, omweeya musaacha oyo yeecha yoola, mani abali nibamalire ohweetekeha, beengira nae mu bugole; baamala beekalao omulyaango.

¹¹Nae luunyuma abahaana baandi bala beecha baakobola mani baboola bati, ‘Omwaami twiikulireo.’

¹²Nae yakobolamo ati, ‘Mbaboolera obwadyeeri endi, haba siimbamanyire.’

¹³Sakira eng'we mweetekehe, olwohuba haba simumanyire oludaalo kata neende ebiha.

¹⁴ “Obwaami bwo Muukulu buchia ohufwaananisibwa neende omwaami wuundi owali achia olukeendo eyale, mani yalaanga abahalaabani bae, yaabalehera obuyiinda bwae babuliinde.

¹⁵Yaberesa omuundu mulala etalaata chitaanu, [80] owuundi “etalaata” chibiri, nae omuundu wuundi “etalaata” ndala, ohweema hu maani kabuli muundu. Omwaami oyo yaamala atyo mani yaachia hu lukeendo lwae.

¹⁶Omuundu yi baba “etalaata” chitaanu, yachia bwaangu yaachurusiramo, mani yanyoola etalaata chitaanu chiindi.

¹⁷Omuundu yi baberesa “etalaata” chibiri, yesi yachia yaafuna “etalaata” chibiri chiindi,

¹⁸nae omuundu yi baberesa etalaata ndala wula nae yachia yaayaba eliina mu loba yaasiihamo obuyiinda bw'omwaami wae.

¹⁹Luunyuma, ebiha bileeyi nibibitireo, omwaami w'abahosi abo yakobola, yachaaka ohubaliirira emyaandu kyae ki yali naabaleheere.

²⁰Omuundu yi baberesa “etalaata” chitaanu wula, yaachia yatusayo “etalaata” chitaanu chiindi mani yaboola ati, ‘Omwaami, waamberesa etalaata chitaanu, mbano ndanyola chitaanu chiindi.’

²¹Omwaami wae oyo yakobolamo n'aboola ati, ‘Weebale muno, omuhalaabani mulai haandi omweesikwa; weekese obweesikwa bwao mu biindu bidiidi, njia ohuhuberesa ebiindi bihira hoo; yingira mu sangaalo ly'Omwaami wao.’

²²Nae omuundu yi baberesa “etalaata” chibiri yaboola ati, ‘Omwaami, ngandi ewe waamberesa etalaata chibiri choong'ene, mbano ese funiireho chibiri chiindi.’

²³Omwaami wae yamukobolamo yaboola ati, ‘Weebale muno, ewe omuhalaabani mulai haandi omweesikwa; weekeese obweesikwa mu biindu bidiidi bino, mani njia ohuhuberesa ebiindu biindi bihira hooho; yingira, mu sangaalo ly'Omwaami wao.’

²⁴“Nae omuundu yi baberesa “etalaata” ndala yoong'ene, yesi yaboola ati, ‘Omwaami, ngaandi ese manyire sa endi ewe, oli omuundu mwoomeranu. Okesaanga abuundu wootataakire esiindu syoosi, haandi obuusaanga ebiindu abuundu wootabakaaleho.

²⁵Sakira obuti bwandiira mani ndaachia ndaabiiha “etalaata” yao eyo, mu loba. Mani bukula sa ebiindu byao byeene bino, mbano hukalusiire abweene.’

²⁶“Nae omwaami wae yamukobolamo ati, ‘Ewe omuhalaabani mubi haandi omukata, hane wamanya sa oti ese ngesaanga abuundu yi taataakire, haandi mbuusa abuundu yi taabakaaleho?

²⁷Lwasiina siwabukula sa eseende chaange mani waachibiiha yi baandu baandi babiihaanga eseende chaabwe, mani nindahakoboole, sindahaduuhaaneho ebiindu byaange nibyemeedere hooho?

²⁸Mani nibiri bityo, mumutuseho sa “etalaata” yeene eyo, mani muyiberese oyo oli neende etalaata ehumi.

²⁹Olwohuba omuundu yeesi oli nabyo, achia ohumeedwaho ebiindi, mani abe neende ebihiraho neende byaaba naadaha. Nae omuundu otaaliho neende esiindu syoosi-syoosi, kata sa syabaasa ati ali nasyo, bachia ohumutusaho.

³⁰Mani omuhalaabani oyo owuma obuhoonyi, mumusukune sa erwaanyi mu siirima siingi, yi aba achia ohuliriraanga niyeesia ameeno.’

³¹ “Mani Omwaana w'Omuundu naalikobolera mu luyaali lwae, alala neende bamalaika bae boosi, nilwo lu achia ohwiihalira hu sisala sy'obutuki syae syooluyaali.

³²Enjia choosi chaheeche chebuusira mu moni wae, mani akabulemo abaandu amahabi kabiri, koti lu omwaayi lwaakabulaanga amakoondi neende embusi.

³³Achia ohuta amakoondi hu muhono kwae muluungi, nae embusi hu muhono mukaada.

³⁴Mani omutuki oyo achia ohuboolera abo abali hu muhono kwae muluungi ati, ‘Eng'we ba Laata yaange yaberesa ehabi, mwiiche mubukaane obwaami bubabatekehera ohutula ohuloongwa hw'esyaalo;

³⁵olwohuba ndali niinumwa enjala, mwaamba ebyohulya; ndali niinumwa obuluwo, waamba esyohung'wa; ndali omukeni yooli, waambukanira;

³⁶ndali mbula esy'ohwefwaala, wafwaasa; ndali omulwaae, weecha waambona; ndali mu jeela, weecha waangeniya.’

³⁷Nae aboolerefu abo bamukobolamo bati, ‘Omwaami, ni liina lweene lu hwahubona enjala niyihuluma, ndaahuliisa, kose n'olumwa obuluwo, ndaahuberesa esyohung'wa?

³⁸Haandi liina lu ndahubona n'olwaala, kose n'obula esy'ohwefwaala ndaahufwaasa?

³⁹Haandi liina lu ndahubonaho n'olwaala, kose nooli mu jeela ndaahukeniya?’

⁴⁰Nae Omutuki oyo achia ohubakobolamo ati, ‘Huboolera obwadyeeri endi, koti lu waholera esyo oyo ohiramo obudiidi hu baandu baange, waholera sa ese.’

⁴¹Nae achia ohuboolera abo abali hu muhono kwae mukaada ati, ‘Mumbweere-eyi, eng'we ababwaabwa! Mwiingire mu muliro kutasima okwatekeherwa Sitaani neende bamalaika bae;

⁴²olwohuba enjala yali niyiinuma, wahaya ohuumberesaho esyohulya, obuluwo bwali nibuunuma, wahaya ohuumberesa esyohung'wa,

⁴³ndali omukeni, waahaya ohuunjakaanira; ndali mbula esy'ohwefwaala, mwahaya ohufwaasa; ndali omulwaae, haandi ndali mu jeela, wahaya ohuungeniya.’

⁴⁴Mani abo bosi bachia ohukobolamo bati, ‘Omwaami, liina lu ndahubona enjala niyihuluma, kose obuluwo nibuhuluma, kose nooli omukeni, kose noowuma esy'ohwefwaala kose n'olwaala kose nooli mu jeela, mani ndaahaya ohuhuhoonya?’

⁴⁵Nae achia ohubakobolamo ati, ‘Mbaboolera obwadyeeri endi, koti lwootaholaho esyo syoosi eyiri mulala ohiramo obudiidi hu baandu baange bano, nilwo lumutaaholeraho syeesi.’

⁴⁶ Mani abafwaana batyo bachia ohutula ao, beengire musinyaaso esitaakama, nae abaholaanga ebihoyera batyo bahachie mu Bulamu butaakama.”