Read saamia Matayo 3 Bible Online

Matayo 3 - saamia bible

Matayo 3

¹Mu ndaalo echo, Yowaana Omubatiisi yachaaka ohuyalira mu siparara sya Yudea n'aboola ati;

² “Mweyolobye, olwohuba Obwaami bwo Muukulu buli aambi.”

³ niye yi nabbi Yisaaya yalomalomaho ati; “Ekono lihuumulira mu siparara liti, Mutereese engira y'Omwaami, mukololose emihoosi kyae.”

⁴ Ebifwaalo bya Yowaana byalichiingi eby'obwooya bw'engamya neende oluhoba lw'eseero mu sibuno. Ebyohulya byae byalichiingi esike neende obuuhi bwomu siino.

⁵Abaandu beeyihaanga yiyalichingi nibatula Yerusalemu, Yudea neende mu bituundu byohu mwaalo kwa Yorodaani.

⁶Beechaanga nibeyoloobya ebyonoono byaabwe n'ababatiisira mu mwaalo kwa Yorodaani.

⁷ Nae Yowaana niyabona Abafarisaayo baangi neende Abasadukaayo bosi nibeyiihe ohwiicha yaali mbwe ababatiise, yabateeba ati, “Eng'we abaana b'endemo, wiina obabereese amakesi kano akohwewonia etima lya Nasaae eliri aambi ohwiicha?”

⁸Mani muhoyere muhole ebiholwa byeekesa biti mumalire ohwefunakira elalira ebyonoono byeeng'we.

⁹ Haandi mutaba nimubaasa sa muti munyala ohunyoola obweyikamo nimuboola muti muli abeechuhulu ba Abburahamu. Mbaboolera obwadyeeri endi, Nasaae anyala ohubukula amakina kano yaakaholamo abeechuhulu ba Abburahamu.

¹⁰ Kata buti embaachi yimalire ohutekehwa: ohutemera emisaala hu misi bweene, buli musaala kwoosi okutachia ohwaama ebyaamo bilai kuchia ohutemwa kusukunwe mu muliro.

¹¹“Ese mbabatiisa mu maachi ohweekesa mbwe mu malire ohwefunaka ebyonoono by'eng'we; nae yiriyo oyo owunoondaho ochia ohubabatiisa neende Mwooyo Mwoolerefu alala neende omuliro. Oyo ahirira elalira ese oluyaali, mani sihoyera kata budiidi ohumukiingira ebiraato byae.”

¹²Ali neende oluderu mu mahono kae. Achia ohusereechera elalira emere yoosi. Achia ohuteera emere ndai mu syaaki, nae omuhuuchi kwoosi achia ohukubuusa, amale akusaambire mu muliro kutasima.

¹³Mu biha byeene ebyo, Yesu yatula Galilaaya yachia hu mwaalo kwa Yorodaani eyiri Yowaana amubatiise.

¹⁴Yowaana yateemaho ohuhaya n'aboola ati, “Niiwe ohoyere ohuumbatiisa nae haandi niiwe owiichire yi ndi?”

¹⁵Nae Yesu yamukaluhamo ati, “Ewe leha bibe bityo sa. Olwohuba nilwo lweefwe huba fweembi huchia ohwooseresa abweene ohudaha hwa Nasaae.”

¹⁶Yesu niyamala ohubatiiswa sa ati, yatula mu maachi. Esiha syeene esyo ekulu lyeekuha [4] mani yaabona Mwooyo wa Nasaae ofwaana neende eguugu, niyeeha naamweemaho.

¹⁷ Haandi esiha syeene esyo, ekono lyawuliirihana nilitula Muukulu niliboola liti; “Wuno niye Omwaana waange [5] mukoosi, yi ndasaangaalira muno.”