Read saamia Matayo 6 Bible Online

Matayo 6 - saamia bible

Matayo 6

¹“Nimuhola esiindu silai, mweliindeenge obuteniinia mu moni w'abaandu, nimweekesa ebilai bi muba nimuholere. Olwohuba nimuhola mutyo, haba simuba muchia ohunyoolaho omukabo kwoosi ohutula eyiri Seeng'we oli Muukulu.

²“Sakira, nooberesaanga omuundu mumanani esiindu syoosi, otefumianga muno eyiri baandu noobaboolera byooba nooholere, koti lu Beebachirisi baholaanga mu Sinagoogi, nibeeyemeresa hu ngira nibadaha abaandu bababone hu babafumie. Mbaboolera obwadyeeri endi, abo bamala ohunyoola omukabo kwaabwe kwoosi.

³Nae eng'we nimuhoonya omumanani esiindu syoosi, omwiicha wao mweene, atamanyaangaho syooba nooholere,

⁴hu bulaanu, obuhoonyi bwao obwo, bunyale ohudoong'a obwomu syaama. Ao bulaanu Nasaae wao, obona byooba nooholeere mu syaama, aba omweene yahahuberese omukabo kwao.

⁵ “Mani nooba noolaama eyiri Nasaae, otafwananaanga neende Abebachirisi! Abo nibo abaheera ohweeyemeeresa mu Sinagoogi nibalaama, mbwe hu baandu bababone. Haandi kata bachia nibeeyemeeresa hu makira mbwe hu buli muundu oba naabita, abone ati nibo abamanya ohulaama. Mbaboolera obwadyeeri endi, abo bamala ohunyoola omukabo kwaabwe kwoosi.

⁶Nae ewe nooba n'osaba esaala, yingiraanga weyikalira mu nyuumba yao, hu osabe esaala eyiri Nasaae Lataao otabonehana. Mani, Nasaae Lataao oyo, obonaanga ebyeehola mu syaama, niye oba achia ohuhuberesa omukabo kwao.

⁷“Mani nooba n'osaba esaala, otehoonyeraanga emboosi nyiingi muno koti lu Beebachirisi baholaanga; olwohuba babaasaanga bati, nilwo lu Nasaae aba achia ohubawulira ohweema hu saala chaabwe ndeeyi echo.

⁸Sakira, eng'we naang'we, mutafwaanaanga nabo, olwohuba Seeng'we oli Muukulu amanyaanga bi mudaha kata nimusisiiri ohumusaba.

⁹Mani yino niyo engeri yimuhoyere ohulaamiramo: Seefwe oli Muukulu; eliita lyao lifumisibwe.

¹⁰Obwaami bwao bwiiche; byoodaha biholwe, mu syaalo, koti lu biholwa Muukulu.

¹¹Tuberese enyaanga yino, ebyohulya byeefwe bya buli ludaalo; [10]

¹²Tuleheremo ebyonoono byeefwe, koti lu huleheramo abo abatuholera bubi.

¹³Otatuyira mu huteemwa, nae tuwonie mu bubi.”

¹⁴ Olwohuba, nimuleheramo ababaholera obubi, nilwo lu Seeng'we oli Muukulu yesi aba achia ohubaleheramo.

¹⁵Nae nimutaleheramo abo ababahola obubi, Seeng'we oli Muukulu yesi haba saaba achia ohubaleheramo ebyonoono byeeng'we.

¹⁶“Nae nimuli mu husiiba, mutabiyiirisaanga koti lu beebachirisi baholaanga. Bahweesaanga obweeni bwaabwe mbwe hu baandu bamanye bati bali ohusiiba. Mbaboolera obwadyeeri endi mu ngeri eyo, bamala ohunyoola omukabo kwaabwe kwoosi.

¹⁷Nae eng'we nimuli mu husiiba, mweebaheenge amafuta hu mitwe, haandi mwetereesa mu bweeni mwosi,

¹⁸abaandu bahaya ohumanya bati muli ohusiiba; mani Nasaae weeng'we obonaanga ebyeehola mu syaama niye oba achia ohubaberesaanga omukabo kweeng'we.

¹⁹ “Mutabiihaanga obuyiinda bweeng'we mu syaalo muno, yi masiriri neende emberebeende [11] binyala ohunyaasa, haandi neende yi banyaka bosi banyala ohwiingirira baabiiba.

²⁰Nae, obuyiinda bweeng'we, mu bubiiheenge Muukulu yi masiriri neende emberebeende, bitanyala ohubunyaasa, kata neende yi banyaka batahanyala ohwiingira beeba.

²¹Olwohuba, yi buyiinda bwao buba, niwo yi mwooyo kwao kuba.

²²“Emoni niyo etaara ly'omubiri. Sakira emoni yao niyiba enamu, omubiri kwao kwoosi kuba kuli mu bulafu.

²³Nae emoni yao niyitaali enamu, omubiri kwao kwoosi kuba kuli mu siirima. Mani obulafu bw'omubiri kwao, nibweehola esiirima, esiirima esyo ngasiba sinaabe esibitiirifu!

²⁴“Abulao omuundu onyala ohuhalaabanira abaami babiri. Aba achia ohuheera mulala nae asyuule owuundi, oba awulire mulala nae alekeerese owuundi. Haba soonyala ohuhalaabanira Nasaae haandi esiha syeene esyo waahalaabanira ‘mamoni.’ ” [12]

²⁵“Sakira mbaboolera sino endi, mutelalihiriraanga hu byohulya oba eby'ohung'wa, kata bi mweenya mu bulamu bweeng'we oba engeri y'ohweefwaaliramo. Obulamu bw'omuundu neende ebyohulya, oba omubiri kw'omuundu neende eby'ohwefwaala, siina esihira esiindi?

²⁶Mubonereho hu mayoni, haba sikataaka oba kata kakesa kabuunga mu byaaki, ohutusaho Nasaae Seeng'we wo Muukulu, niye okaliisaanga kanyala ohubaao amalamu! Nae eng'we, simuhirira elalira amayoni?

²⁷Nae naanu hweeng'we onyala ohuleeyiaho obulamu bwae, hulw'ohweelalihira hwae ohwo?[13]

²⁸Lwasiina mweelalihira muno hu ngeri y'ohwefwaaliramo? Mubonereho hu bimuli byomu siino: Sibyeenabiraanga engubo.

²⁹Nae mbaboolera endi, kata Solomooni mu buyiinda bwae bwoosi siyanyala ohwefwaalaho yaanyirira bulai yaaboneha koti ebimuli bino.

³⁰Mani nimubona muti eyo niyo engeri yi Nasaae afwaaliramo ebimuli bibaao sa enyaanga yino, nibuhya muchuli nibyooma, bisaambwa mu muliro, mubaasa muti Nasaae oyo saanyala ohubafwaasa ohuhiraho ebimuli ebyo, eng'we ab'efukiirira ndiidi?

³¹Sakira, mutelalihiraanga nimubaasa muti; ‘Hunaalye siina?’ Oba ‘Hunaang'we siina?’ Oba muti, ‘Huneefwaale siina?’

³²Olwohuba, ebyo nibyo ebiindu bi bakafiiri babasaangaho buli siha, nae eng'we, Seeng'we oli Muukulu amanyire ati bino byoosi mubidaha.

³³Nae mutaangire mberi ohukoonya Obwaami bwa Nasaae alala neende obwoolerefu bwae; mani ebiindu biindi bidoong'ere ebyo byoosi aba yahababerese.

³⁴“Sakira, muteelalihiraanga hulw'ebiindu binaakweeo muchuli; olwohuba, buli ludaalo luli neende ebidinyu byalwo ebilumala.