Read saamia Matayo 7 Bible Online

Matayo 7 - saamia bible

Matayo 7

¹“Mutaheengeraanga abasyeeng'we omusaango, hu mwesi muhaye ohuheengerwa omusaango,

²olwohuba engeri yimuheengeramo abasyeeng'we omusaango, niyo nasilala yimwahaheengerwemo. Haandi esikero simukereramo abasyeeng'we, nisyo simwahakererwemo.

³Lwasiina ewe olingirisa esikoha siri mu moni y'owaasyo, nae ewe omweene s'obaasa hu sichihi siri mu moni yao?

⁴Onyala otye ohuboolera owaasyo oti: ‘Leha hutusemo esikoha si huli mu moni’ naawe omweene osisiiri neende esichihi mu moni yao?

⁵Omwebachirisi ewe, taangira mberi otuse esichihi esiri mu moni yao, hu weemeo obone bilai, onyale ohutusa esikoha siri mu moni y'owaasyo.

⁶“Otaberesaanga embwa ebiindu byoolerefu, haandi otasukuniraanga embiichi ebiindu byao by'obuhala, olwohuba chiba chinaabisenakire mu makulu, mani cheecha chahweechuuhira chaahuluma.

⁷“N'odaha esiindu, saba; n'odaha ohubukaana, koonya; haandi n'odaha ohwikulirwao, hong'oonda;

⁸olwohuba buli osaba, abereswa; buli okoonya, abukaana; haandi buli ohong'oonda hu lwiiki, yekulirwawo.

⁹Nae wiina hweeng'we, onyala ohuberesa omwaana wae ekina namusabire omugaati,

¹⁰oba, yaamuberesa enjuha namusabire eng'eeni?

¹¹Eng'we abataali boolerefu mumanyire ohuberesa abaana beeng'we ebiindu bilai, nae Nasaae Seeng'we oli Muukulu siyahahirireo muno ohuberesa ebiindu bilai abo ababa nibamusabire?

¹²Mani, muholereenge abasyeeng'we koti lumwahadahire babaholere. Ako niko amahuluundu k'amalako ka Musa neende enjekesa y'abanabbi.

¹³“Mwiingirire mu siruwa sidiiyu, olwohuba esiruwa sitakalafu neende engira nyaangu, [14] biyira abaandu mu nyaanja y'omuliro, abasiingiriramo nibo abaangi.

¹⁴Nae esiruwa siingisa mu bulamu butaakama, sidiiyu nisyo neende engira yolayo, ndinyu niyo ohubitaho, haandi abaandu badiidi muno abayibona.

¹⁵“Mweliinde muhaye ohubachibwa neende abanabbi bataali badyeeri; olwohuba, beecha ohwiicha yi muli nibeloongoyaase koti amakoondi nae mubwadyeeri bweene, mu myooyo kyaabwe, n'ebinamiindi byeene.

¹⁶Mwahabamanyire hu biholwa byaabwe. Omusaala kw'oryaang'i kunyala ohwaamaho emisabbiibbu? Kose, enduli wahachinoka hu nyalwete-kwaachi?

¹⁷Olwohuba omusaala mulai kutulaho ebyaamo bilai, nae omusaala mubi kwosi kutulaho ebyaamo bibi.

¹⁸Omusaala mulai sikunyala kwaamaho ebyaamo bibi, haandi omusaala mubi kwosi sikwaamaho ebyaamo bilai.

¹⁹Omusaala kwoosi okutaamaho ebyaamo bilai kutemwa, kwasukunwa mu muliro.

²⁰Mani muchia ohumanyaanga abanabbi b'obubacha, ohweema hu biholwa byaabwe.

²¹“Sisiri siti buli muundu wunaanga ati; ‘Omwaami, Omwaami,’ niye owaheengire mu bwaami bwo Muukulu; ohutusaho oyo ohola bi Laata oli Muukulu by'adaha.

²²Hu ludaalo olwo abaandu baangi baheeche nibaboola bati, ‘Omwaami, Omwaami, hwatuumbulaanga eliita lyao koti bawamwaanda bao; haandi hweerusaanga emisaambwa miingi muno nihwehoonyera eliita lyao; haandi mu liita lyao hwaholaanga eby'amayia biingi ebitaali nasilala?’

²³Naange ndahabakobolemo endi, ‘Simbamanyireho! Mubweere-eyi, eng'we abahola-mbi!’

²⁴“Mani sakira omuundu yeesi owulira emboosi chaange chino, haandi yaachiholeraho, achia ohufwaana koti omuundu mukesi owoombaha enyuumba yae hu musiingi mwomiifu.

²⁵Efula yayiyomboohaho, emihula kyayehubbaho, omuyaka kw'amaani kwayiwuchaho, nae enyuumba eyo, haba siyakwa olwohuba yali yoombahwa hu musiingi kw'olwaanda.

²⁶Nae omuundu owulira emboosi chaange chino, yahaya ohuchiholeraho, afwaana koti omwoombahi musiru owoombaha enyuumba yae hu musiingi kw'olusenye.

²⁷Efula yayiyomboohaho, emihula kyayehubbaho, omuyaka kw'amaani kwayiwuchaho, mani yaakwa, yanyonyoboha.”

²⁸Mani Yesu niyamala ohulomaloma atyo, abaandu bawuka muno engeri yiyekeseramo eyo.

²⁹Olwohuba engeri yiyeekeseramo eyo, yali yikabuhana muno neende enjekesa y'Abandiiki b'Amalako, olwohuba Yesu yeekesa koti omuundu w'obunyala.