Read saamia Matayo 8 Bible Online

Matayo 8 - saamia bible

Matayo 8

¹Olwoola, Yesu niyamala ohwiiha ohutula hu lugulu, esidiiyiha sy'abaandu sihoongo muno syamuloonda.

²Abweene ao, omusaacha wali n'alwaala obulwaae bw'ebigeenge yeecha eyiri Yesu, yaasigama mu moni wae, yaamuboolera ati; “Omwaami, noodaha, onyala waamonia!”

³Yesu yakolola omuhono kwae, yamudiiraho, n'aboola ati; “Ndaha, mani wona.” Esiha syeene esyo, amakere ako kamwaamuluhaho.

⁴Yesu niyamala atyo yamulagira n'aboola ati, sino, otasibooleraho omuundu yeesi ohutusaho chia weyekese eyiri omulaamisi, ahwehaliirise; mani oyaane esiyaanwa syeekesa abaandu siti owonere koti lu Musa yalagira mu malako.

⁵Olwoola, Yesu niyeengira Kaperanaumu omusikaari muhunuufu wa Rooma yaabukaanana nae, yaamusaba obuhoonyi ati;

⁶“Omwaami, ndi neende omuhalaabani waange engo omulwaae muno, saanyala kata neende ohukeenda hulw'obuchuuni buungi.”

⁷Yesu yamukobolamo ati; “Njicha ohwiicha muwonie.”

⁸Nae omusikaari oyo yaamuboolera ati; “Aaa, Omwaami ebyo haba, ese haba siihoyerwaho ewe ohwiicha ohwiingira mu nyuumba yaange, ohumalaho, lomaloma sa emboosi ndala yoong'ene n'omuhalaabani waange awona.

⁹Olwohuba syesi ndiho neende abaanduka aakulu waange, haandi syesi ndi neende Abasikaari aasi waange, ba nduka. Nindagira mulala endi, ‘Chia,’ naachia sa; haandi nindagira owuundi endi, ‘Yicha,’ niyeecha sa; haandi nindagira omuwaambe waange endi; ‘Hola sino,’ naasihola sa.”

¹⁰Yesu niyawulira atyo yawuka muno, yaboolera abali nibamuloondaho ati; “Mbaboolera obwadyeeri endi, sisiiri ohubonaho efukiirira koti yino hu muundu yeesi [15] mu Yisiraeli.

¹¹Ndaha mumanye muti abaandu baangi bachia ohutula ebukwe neende emuumbo bayirire alala Obwaami bwo Muukulu neende Abburahamu, Yisaka neende Yakobbo.

¹²Nae abo abahoyere ohuba mu bwaami bwo Muukulu bachia ohusukunwa erwaanyi mu siirima, yi bahalirire nibeesia ameeno.”

¹³Yesu yeemao yaaboolera omusikaari oyo ati, “Koti lu oli neende efukiirira otyo, kaluha engo, byoodaha ebyo bichia ohuhuholerwa.” Mani esiha syeene esyo omuhalaabani w'omusikaari oyo yawonerao.

¹⁴Yesu yachia ewa Petero yakaana masaalaang'ene Petero niyeyaliise olwohuba yali n'alwaala omusuuja.

¹⁵Nae Yesu ni yamudiira hu muhono, omusuuja kwamuleherao esiha syeene esyo, mani yachaaka ohubahalaabanira.

¹⁶Obwiire nibweera, bamuleetera abaandu baangi abaliho emisaambwa. Yesu yabeerusaho ebihyeeno ebyo niyehoonyera sa emboosi yoong'ene, mani yaawonia abalwaae abo boosi.

¹⁷Yahola atyo ohwooseresa si munabbi Yisaaya yaboola ati, “Yatutusaho amadehere keefwe, haandi yaakiinga amalwaae keefwe.”

¹⁸Olwoola, Yesu niyabona esidiiyiha sy'abandu nisimwebodoohaanie, yayiika abeeki bae baambuhe engereha w'enyaanja.

¹⁹Nae Omweekesa w'amalako wuundi yeecha yaali yaamuboolera ati; “Omweekesa, njia ohuhuloondaanga buli yoochiira.”

²⁰Nae Yesu yamukobolamo ati; “Amabbwe kali neende ameena ka kamenyamo, haandi amayoni kosi kali neende ebiyu byako, nae Omwaana w'Omuundu saali neende kata yi yahageeng'a omutwe.”

²¹Mulala hu beeki bae yamuboolera ati; “Omwaami, leha mberi njie siihe Laata.”

²²Nae Yesu yamukobolamo ati; “Ewe noonde. Leha abafu basiihe abafu baasyaabwe.”

²³Yesu yeengira mu lyaato ohwaambuha engereha alala neende abeeki bae.

²⁴Abweene ao, esiifuusye sy'amaani syeeyisa enyaanja, amafwiinda kaasiingira kaahubba elyaato elyo lyaadaha ohwiibira. Nae Yesu yali niyeyaliise endoolo.

²⁵Abeeki nibabona batyo, bachia yaali, baamusimusa nibamuboolera bati, “Omwaami; Tuwonie! Hufwa!”

²⁶Nae Yesu yababoolera ati, “Lwasiina mutya?” Nga muli neende efukiirira ndiidi! Yesu yasiingira yaahabuhira esiifuusye esyo neende enyaanja, mani byoosi byaayenjeera chi!

²⁷Mani buli muundu hu bo yawuka muno, mani beteeba bati; “Nae wuno muundu w'engeri siina, kata esiifuusye neende enyaanja byosi bimuwulira!”

²⁸Yesu niyoola hu sikobero sya Gadaraneese, [16] abaandu babiri abaliho emisaambwa, babukaanana nae nibatulira mu ng'uungu chi basiihaangamo abaandu. Ab'emisaambwa abo bali abaalaba muno, mani abulao omuundu wadahaanga ohubitira yi bali.

²⁹Nibamubona, bachaaka sa ohwayulira aakulu bati, Omwaana wa Nasaae, otukoonyaho siina? Wiichire ano ohutuboneeresa ebiha nibitoola?

³⁰Ao waliwo omukaanda muhoongo okw'embiichi nikwaaya.

³¹Mani emisaambwa ekyo kyaasaba Yesu kiti; “Noodaha ohutwiirusa, tusiindihe mu mbiichi chino.”

³²Yesu yaboola ati; “Muchie.” Mani kyaachia kyeengira mu mukaanda kw'embiichi okwo. Omukaanda okwo kwoosi kwabbabuluha embiro kweehubba mu nyaanja, kweebira kwaafwa.

³³Abaayi b'embiichi echo nibabona batyo, bosi beeruha baachia mu siko baboolera abaandu byoosi ebyali ni byeeholeehe hu baandu b'emisaambwa abo.

³⁴Sino syakera abaandu bomu siko esyo beecha ohubonana neende Yesu, mani baamwekweeda bati atule mu situundu syaabwe esyo.