Read saamia Matayo 9 Bible Online

Matayo 9 - saamia bible

Matayo 9

¹Yesu yeemao yeengira mu lyaato, yaambuha yeekaluhirayo mu siko sy'ewaabwe syeene.

²Niyoola sa ati, bamuleetera omusaacha wali niyadataala niyeyaliise hu buliri bwae. Nae Yesu niyabona efukiirira yaabwe, yaboolera omusaacha wali niyadataala oyo ati; “mwaana waange, guma omwooyo, ebyonoono byao bihuleheerwemo.”

³Nae abaandiiki b'Amalako baboolanira abeene-na-beene bati, “Omuundu wuno ali ohufwoola Nasaae!”

⁴Nae Yesu koti lu yali naamanyire [17] ebibaaso byaabwe, yaboola ati; “Lwasiina muli neende ebibaaso bibi mu myooyo kyeeng'we?”

⁵Esiri yena esyaangu, ohuboola oti, “Ebyonoono byao bihuleheerwemo,” kose ohuboola oti, “Siingira okeende?”

⁶Nae hu munyale ohumanya muti Omwaana w'Omuundu ali neende obunyala hu syaalo obw'ohuleheramo ebyonoono, yaboolera omusaacha yali yadataala oyo ati; “Siingira, obukule obuliri bwao ochie engo!”

⁷Mani yaasiingira yaachia engo.

⁸Nae esidiiyiha sy'abaandu esyali ao, nisyabona sityo, syatya muno, mani syaakinia Nasaae, owaberesa abaandu obunyala buli butyo.

⁹Yesu niyali atula eyo, yabona omusaacha olaangwa Matayo niyehaale abuundu yi batoosera omusolo, yaamuboolera ati, “Noonde.” Matayo yasiingira yaamuloonda.

¹⁰Haandi Yesu niyali naali ohunyoola esy'engoloobe, [18] abatoosa b'emisolo baangi neende abahola-mbi, beehala baalya nae esy'engoloobe alala neende abeeki bae.

¹¹Nae Abafarisaayo nibabona sino, baboolera abeeki bae bati; “Lwasiina omweekesa weeng'we alya neende abatoosa b'emisolo alala neende abahola-mbi?”

¹²Nae niyawulira esyo, yaboola ati, “abaandu balamu haba sinibo abadahaanga omulesi, nae abalwaae nibo abamudahaanga.”

¹³Muchie mweeke amahuluundu ka sino, “Ndaha esisa, nae haba siindaha ebiyaanwa by'ebisolo bisaambwa. Olwohuba sindeecha ohulaanga aboolerefu, nae abahola-mbi.”

¹⁴Olwoola, abaloondi ba Yowaana beecha eyiri Yesu nibaboola bati; “Hu siina efwe neende Abafarisaayo husiiba, [19] nae abeeki bao haba sibasiiba?”

¹⁵Nae Yesu yababoolera ati, “Abalaange bohu sidyaalo syohudeehisania, banyala batye ohweelalihira omugole mweene n'asisiiri nabo? Nae endaalo chahoole chi mugole yahabatusirweho, mani olwo nilwo lu bosi bahasiibire.

¹⁶Haandi abulao omuundu wahanabira esiraka siyaaha hu ngubo ngofu, olwohuba esiraka esyo siba sinehuuna sitaanduhe situle hu ngubo eyo, mani esitanduuhe esyo syeehole esitabaafu ohuhirahoo.

¹⁷Haandi, efiini njaaha sibayitechaanga mu sikiingiro sy'eseero sikofu. Nisiba sityo, esikiingiro sikofu esyo siba sichia ohwaadiha, mani efiini yiidihe, haandi esikiingiro syosi sitaanduhe. Nae, efiini njaaha yihoyere bayite mu sikiingiro sy'eseero siyaaha, hu byoombi binyale ohuliindana.”

¹⁸Yesu niyali naasilomaloma nabo, omwiimirisi w'abayudaaya wuundi yeecha yaasigama mu moni wae, yaamuboolera ati; “Omuhaana waange yahafwa sa esiha sino, nae yichia omwiisehooho omuhono kwao, aba achia ohulamuha.”

¹⁹Yesu yasiingiraniramo ebiha ebyo yaamuloondaho alala neende abeeki bae.

²⁰Nae bone, omuhasi wuundi owali naalwaalire obulwaae bw'esihulukuto ohumala emyaaka ehumi-na-kibiri yamutulira emukoongo, yadiira hu kemo ly'engubo yae;

²¹Olwohuba yali ni yeebooleere mu mwooyo kwae ati, “Niwiichuhana ndaadiiraho kata sa hu ngubo yae, mba njia ohuwona.”

²²Yesu niyahubba amahemo yamubona mani yaamuboolera ati; “Mwaana waange, guma omwooyo! Efukiirira yao yihuwoniisye.” Mani ebiha byeene ebyo n'omuhasi oyo awona.

²³Nae Yesu niyoola mu nyuumba y'omwiimirisi oyo, yabona aboobbi b'amalere neende esidiiyiha sy'abaandu nisiyobere,

²⁴mani yaababoolera ati, “Mumbweere-eyi! Olwohuba omuhaana wuno haba saafwiire, nae ali ohukona sa.” Nae nabo bamucheha sa.

²⁵Nae esidiiyiha sy'abaandu nisyamala ohutula erwaanyi, Yesu yeengira mu nyuumba, yaamudiira omuhono, mani omuhaana wali afwiire oyo yaasiingira.

²⁶Emboosi eyo yasalaana mu situundu sy'esyaalo esyo syoosi.

²⁷Nae Yesu niyali atula n'awaao, abawofu babiri bamuloondaho nibahuumulira aakulu bati, “Mwaana wa Daudi, Tukwiireho esisa!”

²⁸Nae niyeengira mu nyuumba, abawofu babiri beecha yaali, mani Yesu yaababoolera ati, “Mufukiirira muti nyala ohubawonia?” Nabo bamukobolamo bati, “Eee, Omwaami!”

²⁹Yesu yadiira hu moni chaabwe yaaboola ati, “Ohweema hu fukiirira yeeng'we, leha sibaholerwe sityo.”

³⁰Mani emoni chaabwe chaliimbula chachaaka ohubona. Yesu yabalagira ati, “Mutabooleraho omuundu yeesi.”

³¹Nabo nibatula ao bachaaka ohulaangirira ebidiira hu Yesu mu situundu sy'esyaalo esyo syoosi.

³²Abo nibali nibawaao bati, bone, bamuleetera omuundu wakwa esiru olwohuba yaliho omusaambwa.

³³Nae niyamala ohwiirusa omusaambwa okwo, owakwa esiru oyo yalomaloma, mani esidiiyiha sy'abaandu syali ao syaawuka, nisiboola siti; “Esiindu sifwaana siti, sisibechaanga hoo mu Yisiraeli.”

³⁴Nae Abafarisaayo nabo baboola bati; “Wuno yeerusa emisaambwa hulw'amaani k'omwaami w'emisaambwa.” [20]

³⁵Yesu yeemao yaabodoohana mu biko byali ao byoosi neende mu ngoongo choosi, niyeekesa mu Sinagoogi ch'Abayudaaya haandi naalaangirira Emboosi Ndai y'Obwaami bwa Nasaae, haandi naawonia amalwaae neende amadehere kataali nasilala.

³⁶Nae niyabona esidiiyiha sy'abaandu, yabakwiira esisa muno, olwohuba bali belalihiire haandi nibataali neende obuhoonyi koti amakoondi kataali neende omwaayi.

³⁷Mani Yesu yaaboolera abeeki bae ati, “Ekesa liingi, nae abakesa nibo abadiidi.

³⁸Sakira musabe Omwaami mweene kesa, atume abahalaabani mu kesa lyae.”