Read saamia Mariko 1 Bible Online

Mariko 1 - saamia bible

Mariko 1

¹Chino nicho Emboosi Ndai chilomaloma hu Yesu Kristo, Omwaana wa Nasaae. [1]

²Koti lu Yisaaya yaandiika ati: [2] “Bone, mbao nduma wamwaanda waange ahutaangirire mu moni wao ahutereseere engira.

³Ekono ly'omuundu liri ohuwulirihanira mu siparara niliboola liti: Mutereesere Omwaami engira; Mukolole emihoosi chae.”

⁴Ao niwo yi Yowaana Omubatiisi yabonehera [3] mu siparara, n'ayaala hu ohubatiisibwa hw'ohweyolobya hu baandu banyale ohuleherwa ebyonoono byaabwe. Yowaana yabatisaanga abaandu naabeekesa ati, “Mweyolobye, mubatiiswe Nasaae abalehere ebyonoono byeeng'we.”

⁵Abaandu abaangi batula mu syaalo syoosi esya Yudea neende mu Yerusalemu mwoosi, bachia eyiri Yowaana, beeyolobya ebyonoono byaabwe, mani yaababatiisa mu mwaalo kwa Yorodaani.

⁶Yowaana yefwalaanga engubo ch'obwooya bw'engamia, haandi yeboyaanga oluhoba lw'eseero mu sibuno, nae ebyohulya byae byalichiingi esike neende obuuhi bwomu siino.

⁷Yowaana yayalaanga n'aboola ati, “Enyuma waange yiliwo owunoondaho, oyo niye owuhirira elalira oluyaali, yi tahoyera ohwiinama aasi ndaaboolola eesya ch'ebiraato byae.

⁸Ese mbabatiisa neende amaachi; nae oyo achia ohubabatiisa neende Mwooyo Mwoolerefu.”

⁹Olwoola, Yesu yatula Nasareeti mu syaalo sya Galilaaya, yaachia hu mwaalo kwa Yorodaani eyiri Yowaana amubatiisi.

¹⁰Nae Yesu niyatula sa ati mu maachi, yabona Ekulu nilikuuhe, mani Mwooyo wa Nasaae yaamwiihaho nafwaanana koti eguugu.

¹¹Ekono lyatula Muukulu niliboola liti, “Niiwe Omwaana waange muheerwa muno; [4] niiwe ohiramo ohusaangaasa.”

¹²Abweene-na-bweene ao mani Mwooyo wa Nasaae yamwiimirira yaamuyira mu siparara.

¹³Yaba mu siparara eyo ohumala endaalo amahumi kane, Sitaani naali ohumuteema. Yamenyaanga neende esolo chomu siino; nae bamalaika ba Nasaae nibamuhalaabanira.

¹⁴Bulaanu, nibamalire ohudiira Yowaana, Yesu yeecha mu Galilaaya yachaaka ohuyaala Emboosi Ndai cha Nasaae,

¹⁵n'aboola ati, “Ebiha byoolere, haandi Obwaami bwa Nasaae buli aambi; mwefunake, mufukiirire Emboosi Ndai cha Nasaae.”

¹⁶Yesu niyali n'akeenda hu lwaasi lw'enyaanja ya Galilaaya, yabona Simooni neende Anderea mwaanaag'ina nibali ohusukuna enjero mu nyaanja; olwohuba bali abanaabi.

¹⁷Yesu mani yababoolera ati, “Munoonde, njia ohubahola mube abanaabi b'abaandu.”

¹⁸Mani abweene-na-bweene ao, baleha enjero chaabwe baamuloonda.

¹⁹Haandi niyemeedaho mu moni budiidi, yabona Yakobbo neende Yowaana abaana ba Sebbedaayo, nibali mu lyaato lyaabwe niboonga enjero.

²⁰Mani abweene-na-bweene ao Yesu yabalaanga; baleha Sebbedaayo saabwe mu lyaato naali alala neende abahosi ba bali nabo, baaloonda Yesu.

²¹Yesu alala neende abeeki bae abo bachia mu Kaperanaumu; nae olwa Sabbaato nilwoola, yachia yeengira mu Sinagoogi yaachaakiraniramo ohweekesa.

²²Nae abaandu, besiinduhira muno enjekesa yae, olwohuba haba siyali koti eya abeekesa b'Amalako; nae yeekesa koti omuundu oli neende obunyala.

²³Nae abweene ao, omusaacha waliho esihyeeno yeengira mu Sinagoogi mani yahuuma n'aboola ati,

²⁴“Ewe Yesu wa Nasareeti, onaatuhole otye? Wiichire ohutusihirisa? Huhumanyire, niiwe Omwoolerefu mweene wa Nasaae.”

²⁵Nae Yesu yasihabuhira n'aboola ati, “Nyita chi, haandi omutulemo bwaangu!”

²⁶Esihyeeno esyo syasusuucha omusaacha oyo muno, syaayulira aakulu, syaamala syaamutulamo.

²⁷Mani abaandu boosi bawuka muno, bachaaka ohuteebana abeene-na-beene nibaboola bati, “Sino nasyo nisi? Yino njekesa ngeni! Wuno ali neende obunyala, alagira sa ebihyeeno, nibimuwulira.”

²⁸Abweene ao, efuma ya Yesu niyeemao niyisalaana mu syaalo sya Galilaaya syoosi.

²⁹Abweene ao Yesu [5] yatula mu Sinagoogi yaachia neende Yakobbo neende Yowaana beengira mu daala lyaabwe Simooni neende Anderea.

³⁰Bulaanu, masaalang'ene Simooni yali akonere mu buliri n'alwaala omusuuja, mani Yesu niyeengira mu nyuumba sa ati, bamuboolera ebidiira hu muhasi oyo.

³¹Yesu yamudiira omuhono, yaamusiingisa. Omusuuja kwamwaamuuhaho, mani yaatulaniramo ohubahalaabanira koti lu bihoyere.

³²Engoloobe yene eyo, elyuuba nilyahakwa, bachaaka ohumuleeteraanga abalwaae ba buli mbya kata neende abo abaliho emisaambwa.

³³Mani abaandu b'esiko esyo syoosi beebuusira alala mu mulyaango kw'enyuumba eyo.

³⁴Yesu yawonia abalwaae ba buli mbya, haandi yeerusa emisaambwa emiingi. Siyakanyaanga emisaambwa ekyo kilomaloma esiindu syoosi, olwohuba kyali kyamumanya.

³⁵Nae nibwahya, mu mabwiibwi, Yesu yasiingira yaatula mu nyuumba omwo, yaachia abuundu abula abaandu, mani yaaba eyo yeeng'ene naalaama.

³⁶Nae Simooni neende abaasye batula erwaanyi, baachaaka ohumukoonya,

³⁷mani nibamwaakaana, bamuboolera bati, “Buli muundu yeesi ali ohuhukoonya sa.”

³⁸Nae yababoolera ati, “Mulehe huchie mu biko bitusibiraane, nyale ohuyaaliramo mwosi; olwohuba esyo nisyo esyandeeta.”

³⁹Yachia mu Galilaaya mwoosi, n'ayaalira mu Sinagoogi chaabwe haandi niyeerusa mu baandu emisaambwa.

⁴⁰Olwoola, omusaacha wali n'alwaala obulwaae bw'ebigeenge yeecha eyiri Yesu ohumwekweeda; yaasigama aasi yaamuboolera ati, “Niweenya, onyala ohuumonia.”

⁴¹Esisa siingi muno syadiira Yesu, yakolola omuhono kwae yadiira hu musaacha oyo, n'amuboolera ati, “Ese nyenya, mani wona.”

⁴²Ebiha byeene ebyo, obulwaae bw'ebigeenge bwamutulaho, yaawona.

⁴³Nae Yesu yamulagira muno, yamala yamuseebula yawaao bwaangu,

⁴⁴haandi yamuboolera ati, “Bona oti sobooleraho omuundu yeesi esiindu syosi; nae chia weyekese eyiri omulaamisi, omale oyaane esiyaanwa si Musa yalagira esyeekesa siti owonere obulwaae bw'ebigeenge, sino sibe esilolero eyiri abaandu.” [6]

⁴⁵Nae omusaacha oyo yatula yaachaaka ohusalaania efuma eyo buli abuundu. Sino syakayira Yesu [7] ohwiingira mu siko syosi alafu, nae yabeechaanga erwaanyi mu ngoongo; mani eyo niyo yi baandu beechaanga yaali nibatula mu buli situundu.