Read saamia Mariko 12 Bible Online

Mariko 12 - saamia bible

Mariko 12

¹Yesu yachaaka ohulomaloma nabo mu ngaado ati, “Yaliwo omusaacha wuundi owalima endalo y'emisabbiibbu, mani yoombaha olukaka yaayibodoohania, haandi yaayaba eliina ly'esihunyiro sy'emisabbiibbu, haandi yoombaha omunaara okw'ohuliindiramo endalo eyo, mani yaayiberesa abahalaabani nae omweene yaasamula mu syaalo siindi.

²Esiha nisyoola, yatuma omuhalaabani wae mulala eyiri abahalaabani abo, achie bamubeeho ebyaamo hooho biti ohutula mu ndalo y'emisabbiibbu eyo.

³Nae abahalaabani abo, bamudiira baamuhuya, baamukalusa yaatulire mahono mahaya.

⁴Omweene ndalo haandi yatumira abahalaabani abo omuhalaabani wae wuundi, nae abahalaabani abo bamunyaala omutwe baamuhola ebyeesoni.

⁵Haandi yabatumira omuhalaabani wuundi nae yi beeta; alala neende abaandi abaangi batyo, nibabahuya haandi abaandi nibabeeta.

⁶Haandi omweene ndalo oyo yali adoong'iise omuhalaabani wuundi mulala; oyo niye owali omwaana muheerwa; niye yi yamaliirihayo ohutuma yi bali, n'aboola ati, ‘Bachia ohwiisa oluyaali mu mwaana waange.’

⁷Nae abahalaabani abo baboolanira abeene-na-beene bati, ‘Wuno niye omukobola mu makulu; mwiche, mulehe humwiite, mani endalo y'emisabbiibbu yibe eyeefwe.’

⁸Mani bamubukula baamwiita, baamusukuna erwaanyi w'endalo y'emisabbiibbu eyo.”

⁹Yesu yabateeba ati, “omweene ndalo y'emisabbiibbu eyo aba bulaanu achia ohuhola siina?” “Aba achia ohwiicha asihirise abahalaabani abo, mani abukule endalo y'emisabbiibbu eyo ayiberese abaandu baandi.

¹⁰Haba simwasomaho ebyandiiko byoolerefu bino biti, ‘Ekina lyeene lira li boombahi bahaya nilyo elyeeholere ehuluundu mu musiingi;

¹¹yino yali ehola y'Omwaami, haandi ndai muno mu moni cheefwe’?”

¹²Bateemaho ohumudiira haandi, nae batya esidiiyiha esyo, olwohuba bali bafumbuule bati olukaado lu Yesu yali naababoleere olwo lwali nilubadiiraho; mani baamuleha bawaao.

¹³Haandi bamutumira Abafarisaayo baandi neende Abaandu baandi ohutula eyiri Herode baandi ohumutekera mu nomanoma yae yene.

¹⁴Mani beecha yali baamuboolera bati, “Omweekesa, humanyire huti ewe oli ow'obwadyeeri, haandi haba si wekweeda omuundu yeesi; olwohuba ewe haba sootya oluyaali lw'abaandu, nae mubwadyeeri bweene weekesaanga engira ya Nasaae yene. Mani sihoyera ohutooya emisolo eyiri Kaisaari, kose haba?

¹⁵Efwe huhoyere ohukitooya, kose, sihuhoyere?” Nae Yesu koti luyali n'amanyire ohwebachirisa hwaabwe, yababoolera ati, “Lwasiina muuhema mutyo? Muundeetere etoongolo, [50] mani mulehe nditingaale”

¹⁶Mani baamuleetera lala. Nae Yesu yababoolera ati, “Esifwaanani sino neende obwandiike buno bya naanu?” Nabo bamuboolera bati, “Bya Kaisaari.”

¹⁷Yesu yababoolera ati, “Ebya Kaisaari mubereseenge Kaisaari, nae ebya Nasaae mubereseenge Nasaae.” Mani baatya Yesu muno.

¹⁸Haandi Abasadukaayo bosi beecha yali, abo ababoolaanga bati, ohusyuuha hubulao; mani baamuteeba esiteebo nibaboola bati,

¹⁹ “Omweekesa, Musa yali yatwandiikira ati, mwanaang'ina muundu naafwa mani yaaleha omuhasi, nae haba saalehere omwaana, omuundu oyo [51] ahoyera ohubukula omuhasi oyo, yeebulira mwanaang'ina abaana.

²⁰Olwoola, yaliwo abasyaani beebulanwa bataanu-na-babiri; Omuhuluundu waabwe yadeehya omuhasi, mani niyafwa, haba siyalehaho omwaana kata mulala;

²¹mani owohubiri yadeehya omuhasi oyo, haandi yesi yaafwa n'ataalehereho omwaana kata mulala; haandi owohudatu yesi yaafwa atyo;

²²mani bataanu-na-babiri abo haba sibalehaho omwaana kata mulala. Muhumaliirihira elalira, omuhasi oyo yesi yafwa.

²³Mani mu husyuuha, omuhasi oyo achia ohuba muha naanu? Olwohuba abasaacha bataanu-na-babiri abo boosi bali bamuyira koti omuhasi waabwe.”

²⁴Yesu nae yababoolera ati, “Sino sinisyo esikeraanga nimudoondobana, olwohuba mbwe haba simumanyire ebyandiiko byoolerefu kata neende obunyala bwa Nasaae?

²⁵Olwohuba abo nibahasyuuhe mu bafu, haba sibahabe nibali ab'ohudeehya, kata ab'ohudeeha, nae bachia ohuba koti Malaika bo Muukulu.

²⁶ Nae esya abafu ohusyuuhisibwa, haba simwasomaho mu sitabo sya Musa, mu lukano ludiira hu sichaha, koti lu Nasaae yamuboolera ati, ‘Ndi Nasaae wa Abburahamu, haandi Nasaae wa Yisaka, haandi Nasaae wa Yakobbo’?

²⁷Haba saali Nasaae wa abafu, nae ali owa balamu; mwadoondobana muno.”

²⁸Mani mulala hu abaandiiki b'Amalako yeecha yi bali yawulira nibali ohuyiingananga abeene-na-beene, mani niyabona ati Yesu ali ohubakaluhamo bulai bweene, yamuteeba ati, “Lako siina elihiramo koosi obuhunuufu?”

²⁹ Yesu yakobolamo ati, “Elitaangira lyeene liri liti, ‘Wulira Ewe Yisiraeli: Omwaami Nasaae weefwe, Omwaami ali mulala yeeng'ene;

³⁰mani ohoyere ohuheera Omwaami Nasaae wao neende omwooyo kwao kwoosi, haandi neende obulamu bwao bwoosi, neende amakesi kao koosi, neende amaani kao koosi.’

³¹ Eliloondaho nilyo lino, ‘Heeraanga owaasyo koti lu weheera omweene.’ Haba siliri hoo elako liindi elihira kano kabiri.”

³² Mani omwandiiki w'amalako yaboobera Yesu ati, “Omweekesa, oli abweene; oboolere obwadyeeri oti ali mulala yeeng'ene, haandi abulao owuundi ohutusaho oyo;

³³ haandi neende ohumuheera neende omwooyo kwoosi, neende amakesi koosi, neende amaani koosi, haandi ohuheera owaasyo koti lu weheera omweene, bihira muno ebiyaanwa bisaambe bilaamba byoosi alala neende ebiyaanwa by'ebiindu biindi eyiri Nasaae.”

³⁴ Nae Yesu niyabona ati akaluuhemo neende amakesi, yamuboolera ati, “Ewe haba sooli eyale muno ohutula hu bwaami bwa Nasaae.” Mani ohutula hu ludaalo olwo, abulao omuundu yeesi owateemaho ohumuteeba esiteebo siindi syoosi.

³⁵Mani Yesu niyali niyeekesa mu Nyuumba ya Nasaae, yaboola ati, “Abaandiiki b'Amalako bahaboola batye bati Kristo ali omwaana wa Daudi?

³⁶ Nae Daudi mweene niyechuule [52] Mwooyo Mwoolerefu, yesaara ati, ‘Omwaami yaboolera Omwaami waange ati, Yihala hu muhono kwaange muluungi, ohwoola lu ndiliteera abasuku bao aasi w'amakulu kao.’

³⁷Daudi mweene amulaanga ati, Omwaami; mani yahaba atye omwaana wae?” Mani esidiiyiha sihoongo syamuwulira neende esangaalo.

³⁸Mani mu hweekesa hwae haandi yaboola ati, “Mweliinde eyiri abaandiiki b'Amalako, abaheera ohung'alaalira mu maganjuula kaabwe maleeyi, neende ohubona bati baheesibwa bulai mu biito

³⁹haandi neende obubereswa ebisaala bilai mu Sinagoogi alala neende obwiihalo bw'oluyaali hu bidyaalo,

⁴⁰haandi abo abayaaya amayuumba k'abahasi bafwiirwe haandi muhwebachirisa abaleeyia muno amasaayo kaabwe. Abo bachia ohunyoola esaando mbi yihiramo.”

⁴¹Yesu yeehala n'atingaalire esibiihiro sy'eseende, mani yewuunja abaandu nibata eseende chaabwe mu sibiihiro esyo. Abaandu bayiinda abaangi batechaangamo eseende enyiingi muno.

⁴²Mani omuhasi mufwiirwe mukofu muno yesi yeecha, yayaanayo obuhela bubiri obw'omugasa obwaakana neende etoongolo lala.

⁴³Yesu yalaanga abeeki bae beeche yaali, mani yaababoolera ati, “Mbaboolera obwadyeeri endi, omuhasi mufwiirwe mumanani wuno, ateeremo eseende nyiingi echihira echa abo boosi abaleetere mu sibiihiro sino.

⁴⁴Olwohuba abo boosi baleetereenge hweebyo ebidoong'ere hu biindu bi bali nabyo; nae wuno ohutula hubumanani bwae, aleetere syoosi si yali n'ali nasyo, mu bulamu bwae bwoosi.”