Read saamia Mariko 13 Bible Online

Mariko 13 - saamia bible

Mariko 13

¹Mani niyali hwatula sa ati mu Nyuumba ya Nasaae, mulala hu beeki bae yamuboolera ati, “Omweekesa, bonaho esiroonyo sy'amakina neende esiroonyo sy'ebyoombahe!”

²Nae Yesu yamuboolera ati, “Ewe mani oli ohubona ebyoombahe bihunuufu bino? Sibicha hudoong'a ekina lala nilihaale hu liindi, elitahasukuunwe aasi.”

³Nae Yesu niyali niyehaale hu lugulu lw'Emiseituuni niyewuunjire Enyuumba ya Nasaae, Petero neende Yakobbo alala neende Yowaana neende Anderea bamuteeba mu bweekisi bati,

⁴“Tuboolereho, lu bino bicha ohweholera, haandi halolero siina ahachia ohubaao lu bino byoosi bicha ohubeerao?”

⁵Nae Yesu yababoolera ati, “Mweliinde omuundu yeesi atanyala ohubahyaamya.

⁶Abaandu abaangi bachia ohwiichaanga mu liita lyaange, nibaboola bati, ‘Ese neese oyo mweene,’ mani bachia ohukosa abaandu abaangi.

⁷Haandi nimuwuliraanga efuma ya maye alala neende embaha yidiira hu maye eyitaali eyadyeeri, mutasaanguluhaanga; olwohuba bino bihoyere ohukwaao, nae enjakamo yiba yisisiiri ohwoola.

⁸Olwohuba ebyaalo bicha ohusiingisa eye hu byaalo biindi, haandi obwaami bwosi hu bwaami buundi; ohuteengereha hw'esyaalo huchia ohubaao buli abuundu, enjala yosi yicha ohukwaao; nae bino byoosi binaba biri sa koti enjaako y'obuchuuni bw'engasi ch'ohwiibula.

⁹ “Nae mweliinde abeene; olwohuba bachia ohubayira mweeme mu biina; haandi bahabahuyire mu sinagoogi; haandi mwaheeme mu moni cha bagafana neende echa abatuki hulwaange, ohutusa obuloli mu moni chaabwe.

¹⁰Nae emboosi ndai ya Nasaae yihoyere ohuyaalwa mu syaalo syoosi.

¹¹Nae nibabaletaanga ohuyaaswa haandi nibabadisaanga mu mahono kaabwe, muteyendehereraanga nimweteeba muti hunaboole siina; nae muboole sa bi muba muli nabyo ebiha ebyo, olwohuba haba siniing'we abacha ohulomalomaanga, ohutusaho Mwooyo Mwoolerefu oli mweeng'we niye ochia ohulomalomaanga.

¹²Mwanaang'ina muundu mweene achia ohumuhobaanga bamwiita, haandi laatang'ene muundu mweene yesi amuhoba bamwiita, haandi abaana bosi bachia ohwefuhuulaanga hu beebusi baabwe nibabeeta.

¹³ Abaandu boosi bachia ohubasyuula hulw'eliita lyaange. Nae oyo owesimiirisa ohwoola hu njakamo niye ochia ohuwonisibwa.

¹⁴ “Nae n'obonaanga esiindu sibi muno nisyeemere yi sitahoyere ohuba, (leha omusomi amanye amahuluundu ka sino), mani mulehe abo abali mu Yudea beeruhire mu ngulu;

¹⁵ oyo oli hu sirama sy'enyuumba ateeha aasi, kata ateengiraho mu nyuumba yae, yaatusamo esiindu syoosi;

¹⁶haandi oyo oli mu ndalo atakaluhaanga mu ngo ohubukula ebyefwaalo byae.

¹⁷Nae kabanyoole abo abali asito neende abo abahabe nibanuunia mu ndaalo echo.

¹⁸Musabe ebyo bitakwaao mu ndaalo ch'etoocho.

¹⁹ Olwohuba mu ndaalo echo, muchia ohubaamo ebinyaaso bitabeechaangao hooho ohutula muhuchaaka hw'esyaalo si Nasaae yaloonga ohwoola buti, haandi haba sibyahabeeo haandi endaalo choosi.

²⁰Nae Omwaami aba nataduduyaho endaalo cheene echo, abulao omuundu yeesi owahawonere; nae hulw'abo ba Nasaae yadoola, yaduduya endaalo echo.

²¹Nae, omuundu yeesi n'ahuboolera ati, ‘Bone, nga Kristo nguno ali ano,’ kose ati, ‘Bone, ngula ali ala!’ Otafukiiriraanga.

²²Olwohuba ba Kristo bobubacha neende abanabbi bobubacha bachia ohwiicha bahole eby'amayia neende ebiwuukisa, ohukosa abadoole ba Nasaae nisinyaliha.

²³Nae mweliinde; olwohuba mbao ndahabalabula hale-hale ebiindu bino byoosi nibisisiiri ohwoola.

²⁴ “Nae mu ndaalo echo, ebinyaaso ebyo nibiweere, elyuuba lichia ohwiirima, haandi omwoosi kwosi kuhaye ohwaaduha,

²⁵ eng'ining'ini chichia ohukwichaanga nichitula aakulu, haandi amaani komu miyaka kachia ohudengaanisibwa.

²⁶ Mani bachia ohubona Omwaana w'Omuundu niyeechera mu maleesi neende amaani alala neende oluyaali.

²⁷Mani achia ohutuma bamalaika, bachie babuuse alala abadoole bae ohutula hu mbeka chine ch'esyaalo, ohutulira hu njakamo y'esyaalo ohwoola hu yiindi.

²⁸“Leha mubonere hu mutuli: nimubona nikutusa amasaafu madoto kuti, nimumanya muti, endaalo ch'esiminyu chiri aambi ohwoola.

²⁹Mani sakira, nimubona ebiindu bino nibyeholeha, mumanye muti ali aambi, ali sa hu siruwa bweene.

³⁰Mbaboolera obwadyeeri endi, oluse luno haba silucha huwaao, ebiindu bino nibiteeholeha.

³¹Ekulu neende esyaalo bicha ohuwaao, nae emboosi chaange haba sichicha ohuwaao daawe.

³² “Nae oludaalo lweene olwo, kata ebiha byeene, abulao omuundu yeesi omanyire, kata bamalaika bo Muukulu, kata Omwaana, nae ohutusaho Laata yeeng'ene.

³³Mweliinde, mube meeso; [53] olwohuba haba simumanyire lu biha bi yahoolere.

³⁴ Siri koti omuundu ochia hu lukeendo lw'eyale, naaba n'atula mu ngo, aberesa abahalaabani bae obunyala, buli otula neende omulimo kwae, mani yaboolera omuliindi w'ohusiruwa abe meeso.

³⁵Sakira mweliinde olwohuba haba simumanyire lu mweeneengo achia ohwiichira, oba nibyahabe engoloobe, kose mu siro akatikaati, kose mu mabwiibwi, kose echuli-chuli.

³⁶Ataali ao, anyala ohwiicha mabbwooga, mani yaabakaana nibasiikona.

³⁷Mani bi mbaboolera eng'we, mbiboolera abaandu boosi endi: Mube, meeso.”