Read saamia Mariko 15 Bible Online

Mariko 15 - saamia bible

Mariko 15

¹Mani nibwahya buti, abalaamisi bahuluundu, neende abahuluundu b'oluyia neende abaandiiki b'Amalako, neende ab'esiina boosi beehasa oluhiiho lw'ohweteebanaho; mani baaboya Yesu, baamutusa ao baamuyira ohumudiisa Pilato.

²Nae Pilato yateeba Yesu ati, “Ewe niiwe omutuki w'Abayudaaya?” Nae Yesu yamukobolamo ati, “Mbao niiwe oboolere otyo.”

³Mani abalaamisi bahuluundu bamufwaambia ebiindu ebiingi muno.

⁴Pilato haandi yateeba Yesu ati, “Ewe obulaho esiindu syoosi esy'ohukobolamo? Bonaho obuungi bw'emisaango ki bahufwaambia.”

⁵Nae Yesu haba siyakobolamo esiindu syoosi, mani sino syakera Pilato yaawuka muno.

⁶Bulaanu hu buli sidyaalo sya Paasaka, Pilato yali yanala ohulehuuliraanga abaandu omuboye yeesi yi baba nibamusabire.

⁷Nae hu baboye bali mu jeela, abali bahola omusaango kw'obutemo mu huhola esiisi, mwalimo omusaacha wuundi olaangwa, Bbarabba.

⁸Mani esidiiyiha syeecha eyiri Pilato ohumusaba abaholere koti luyali yanala ohubaholeraanga.

⁹Nae Pilato yabateeba ati, “Mudaha mbalehuulire Omutuki w'Abayudaaya?”

¹⁰Olwohuba Pilato yali amanyire ati, ehali-hali ly'abalaamisi bahuluundu nilyo elyakera bamudiisa Yesu.

¹¹Nae abalaamisi bahuluundu, badoondobania esidiiyiha sy'abaandu sisabe Pilato amaye akabalehuulira Bbarabba sa.

¹²Nae Pilato haandi yabateeba ati, “Nae ndaahole endye omusaacha wuno yimulaanga muti Omutuki w'Abayudaaya?”

¹³Nae abaandu boosi bahuumulira aakulu bati, “Mubaambe!”

¹⁴Nae Pilato yababoolera ati, “Lwasiina, sibi siina sy'aholere?” Nae bemeeda sa ohuhuumula nibaboola bati, “Mubaambe!”

¹⁵Nae ohudaha ohubasaangaasa, Pilato yabalehuulira Bbarabba; nae nibamala ohutoocha Yesu, Pilato yabadiisa Yesu bachie bamubaambe.

¹⁶Abasikaari bayira Yesu mu lwaanyi lwomuukati olw'edooho (olulaangwa siti Puraitoria); balaanga omukaanda kw'Abasikaari kwoosi ohwebuusa alala.

¹⁷Bamufwaasa Yesu ekaanju lifwaana papo, mani nibasiinga engata y'amawa, nibamufwaasa hu mutwe koti ekofia y'obutuki.

¹⁸Bachaakaanga ohumuheesa nibaboola bati, “Yoga, Omutuki w'Abayudaaya!”

¹⁹Bamuhuya hu mutwe neende ekada, baamufuchaho amate, baasigama mani nibamwiinamira.

²⁰Nae nibamala ohumujaara, bamufwaalulamo ekaanju lya papo, mani baamufwaasa engubo cheene. Mani baamuyira erwaanyi ohumujaara.

²¹ Mani babukaanana neende omusaacha wali n'akeenda sa owali atula mu lukoongo luundi, olaangwa Simooni Omusireeni, laatang'ene Alekisaanda neende Rufusi, mani bamuyiika ohukiinga omusalabba kwa Yesu.

²²Mani bamuleeta baamwoosa abuundu yi balaanga bati, Gologoota (Amahuluundu kasyo mbwe, Abuundu w'ebyaangaanga).

²³Mani baamuberesa efiini yibasasiremo miira; nae yaahaya ohuying'wa.

²⁴ Bamubaamba, mani baakabana engubo chae, nibachuubbiraho eha, ohumanya si buli muundu ayira.

²⁵Mani nibamubaamba hu musalabba esaa yohudatu.

²⁶Nae esyandiiko sy'esifune simufwaambya syasoma siti, “Omutuki wa Abayudaaya.”

²⁷ Nae abweene ao wosi babaambirao abeebi babiri alala neende Yesu, mulala hu muhono kwae muluungi, owuundi hu muhono kwae mukaada.

²⁸Mani ebyandiiko byeecha byoolerera ebiboola biti, “Yabalirwa alala neende abaholi b'ebyonoono.”[61]

²⁹ Nae abaandu bali nibabitao, bayuuyaanga emitwe nibajaara Yesu nibaboola bati, “Mbao! Ewe owahalikule Enyuumba ya Nasaae haandi wayoombahira mu ndaalo chidatu,

³⁰wewonie omweene, haandi yiha aasi ohutula hu musalabba!”

³¹Nilwo nasilala lu Balaamisi bahuluundu alala neende Abaandiiki b'Amalako lu bamudyaabuhira baamujaara nibaboola bati, “Yawonia abaandi; nae omweene haba saanyala ohweewonia.

³²Leha Kristo, Omutuki w'Abaisiraeli, bulaanu yeehe hu musalabba hubone huhufukiirire.” Kata abo abali babaambirwe nae bosi bamujaara.

³³Nae esaa yohusaasaba niyoola, esiirima syadiira esyaalo syoosi ohwoola esaa y'ohutaanu-na-hane.

³⁴ Nae hu saa y'ohutaanu-na-hane, Yesu yalira neende ekono ly'aakulu ati, “Eli, Eli, lama sabbakitaani?” Amahuluundu kabyo mbwe, “Nasaae waange, Nasaae waange, lwasiina wunjwaang'ire?”

³⁵Nae abaandu baandi abali beemere ao, nibawulira batyo, baboola bati, “Bone, mbao alaanga Elija.”

³⁶ Mani mulala yeeruha yaabukula esyaangu yaasiiniha mu fiini yahaliha, yaasita hu kada, mani yaamuberesa ohung'wa n'aboola ati, “Muliindeho, leha hubone Elija naneeche yamwaanula hu musalabba.”

³⁷Nae Yesu yahuumulira mu kono ly'aakulu n'alira mani yakwiisa omwooyo.

³⁸ Nae engubo yomu Nyuumba ya Nasaae yataanduha akati, ohutula aakulu ohwoola aasi.

³⁹Nae omuhoongo mulala w'abasikaari, owali yeemere ao namutingaalire, niyabona ati [62] akwiisire omwooyo atyo, yaboola ati, “Mubwadyeeri bweene, wuno abeere Omwaana [63] wa Nasaae!”

⁴⁰ Abahasi baandi bosi bali ao nibewuunjiraanga ebiindu ebyo eyale hooho, mwaabo nimwo omwali, Maria Magadalena, neende Maria ng'ina Yakobbo muyere neende Yosefu, neende Salome,

⁴¹abali abaloondi bae haandi abamuhalaabaniraanga n'asisiiri Galilaaya; haandi neende abahasi baandi abaangi bosi abeecha nae Yerusalemu.

⁴²Nae obwiire nibweera, koti lwali oludaalo lw'Ohweetekeheramo, luno nilwo oludaalo lutaangirira Sabbaato,

⁴³Yosefu ohutula Arimatea, yi baandu bali nibaberesa oluyaali mu siina, haandi yesi owali n'aliindiriire Obwaami bwa Nasaae, yenyiira yaachia eyiri Pilato yamusaba omubiri kwa Yesu.

⁴⁴Nae Pilato yesiinduha muno ohuwulira ati, Yesu amalire ohufwa, yalaanga omuhoongo w'abasikaari yamuteeba nibuli obwadyeeri mbwe Yesu amalire ohufwa. [64]

⁴⁵Nae omuhoongo w'abasikaari niyaboolera Pilato ati, Yesu amalire ohufwa, yafukiirira Yosefu ohuyira omubiri kwa Yesu.

⁴⁶Yosefu yakula esuuka lafu, yaanula omubiri kwa Yesu, yakuboya mu suuka lafu elyo, yakuta mu ng'ani yi bali bayabire mu lwaanda; yasiindikisa okukina kuhoongo, yakufuuniha hu ng'ani eyo.

⁴⁷Maria Magadalena neende Maria ng'ina Yosefu babona bulai yi basiiha Yesu.