Read saamia Mariko 16 Bible Online

Mariko 16 - saamia bible

Mariko 16

¹Bulaanu oludaalo lwa Sabbaato nilwawa, Maria Magadalena, neende Maria ng'ina Yakobbo alala neende Salome, baleeta amafuta k'esing'ari, nibadaha ohubaha omubiri kwa Yesu.

²Nae hu ludaalo lutaangira mu juma, echuli elyuuba nilyali hu hulitula sa liti, abahasi bano bawuuna ohuchia hu siriindwa.

³Bali nibateebanaanga abeene-na-beene bati, “Wina onaatutusireho ekina hu mulyaango kw'esiriindwa?”

⁴Nae niboola hu siriindwa, batingaala aakulu babona okukina nikumalire ohusiindikiswa nikutulire hu siriindwa kwali okukina kuhoongo muno.

⁵Nae nibeengira sa mu biriindwa bati, babona omusyaani muraaga owefwaalire ekaanju lya rachaari niyehaale hu muhono muluungi, mani besiinduha muno.

⁶Nae yababoolera ati, “Mutesiinduha haba; manyire endi muli ohukoonya Yesu Omunasareeti owabaambwa hu musalabba. Asyuuhire, haba saali ano; mubone abuundu yi bamwaalisa.

⁷ Mani muchie muboolere abeeki bae neende Petero muti, abataangiriiremo ohuchia Galilaaya; eyo niyo yi muchia ohumubonera, koti lu yababoolera.”

⁸Mani batula erwaanyi, beeruha nibatula hu ng'ani; olwohuba obuti alala neende ohuteengereha byali bibadiire muno; mani haba sibabooleraho omuundu yeesi esiindu syoosi, olwohuba bali batiire muno. [

⁹Nae niyasyuuha, oludaalo lutaangira mu juma, yataangira ohubonehera Maria Magidalena, yi yali yeerusamo emisaambwa kitaanu-na-kibiri.

¹⁰Maria Magadalena wuno yachia yaboobera abaloondi bae abali nibalira haandi nibeesisiiha muno.

¹¹Nae nibawulira bati, Yesu mulamu, haandi omuhasi wuno amalire ohumubonaho, haba sibasifukiirira.

¹²Luunyuma, Yesu yabonehera abeeki bae babiri mu ngeri yiindi nibali nibakeenda nibachia mu lukoongo luundi.

¹³Mani bano bakaluhayo baaboolera abadoong'ereyo, nae bahaya ohufukiirira ebyaabwe.

¹⁴Muhumaliiriha, Yesu yabonehera abeeki bae ehumi-na-mulala nibali hu meesa ohulya; yaaboolobya muno hulw'obutafukiirira bwaabwe alala neende ohuba n'emyooyo myoomeranu, olwohuba bali bahayire ohufukiirira eby'abo abali babweene Yesu n'amalire ohusyuuha.

¹⁵ Mani yababoolera ati, “Muchie mu syaalo syoosi, mani muyaale emboosi ndai ya Nasaae, eyiri ebiloonge byoosi.

¹⁶Oyo ofukiirira, haandi yabatiisibwa, achia ohuwonisibwa; nae oyo otafukiirira, omusaango kuchia ohumuhira.

¹⁷Mani bino nibyo ebilolero bicha ohuba neende abo abafukiiririra: mu liita lyaange, bachia ohwiirusaanga emisaambwa; bachia ohulomalomaanga enimi njaaha;

¹⁸bachia ohudiiraanga enjuha mu mahono kaabwe, haandi nibang'wa obutwa bw'amaani, sibuchia ohubeetaanga; bachia ohwiisaanga amahono kaabwe hu balwaae, mani bawona.”

¹⁹ Nae Omwaami Yesu, niyamala ohulomaloma nabo, yayirwa Muukulu, mani yeehala hu muhono muluungi kwa Nasaae.

²⁰Nae abeeki bae, bachia mani baayaala Emboosi Ndai buli abuundu, nae Omwaami yaholera alala nabo, niyomiisa emboosi chaabwe neende ebilolero bisiira emboosi echo. Amiina.] [65] [ 9 Abahasi baacha eyiri Petero neende eyiri abeecha bae bababoolera mu bwiimbikiti ebyo byoosi bi bababoolera. 10 Ebyo nibyawa, Yesu mweene yatuma abeeki ohuchia ebukwe neende emuumbo ohubayirira emboosi njoolerefu haandi ey'endaalo choosi ey'obulamu butaakama.]