Read saamia Mariko 2 Bible Online

Mariko 2 - saamia bible

Mariko 2

¹Luunyuma lw'endaalo ndiidi, Yesu yakobola Kaperanaumu mani efuma yae yaawulirihana yiti akaluuhe ewaabwe.

²Abaandu abaangi bebuusa beechula ohwoolera elalira hu mulyaango, yaabulao obweyaango bwosi-bwoosi obudoong'ere. Yesu yali naali ohubayaaliraanga Emboosi Ndai ya Nasaae.

³Ao niwo yi basaacha bane boolera nibakiingire hu buliri omusaacha wadataala, nibamuleetera.

⁴Nae nibabona bati sibanyala hwoola eyiri Yesu hulw'esidiiyiha sihoongo, baniina hu sirama sy'enyuumba, basiikulamo esidomo, mani baabisiramo omulwaae oyo, yoola eyiri Yesu.

⁵Nae Yesu niyabona efukiirira yaabwe, yaboolera omulwaae oyo ati, “Mwaana waange, ebyonoono byao bihuleheerwe.”

⁶Nae abeekesa b'Amalako baandi abali nibehaale ao nibawulira batyo, bachaaka ohweteeba abeene-na-beene mu myooyo kyaabwe bati,

⁷“Lwasiina omusaacha wuno alomaloma ati? Huno hufwoola Nasaae! Nasaae yeeng'ene niye onyala ohulehera ebyonoono!”

⁸Nae abweene ao, Yesu niyamanya mu mwooyo kwae ati abo bali ohweteebana abeene-na-beene, yababoolera ati, “Lwasiina muli ohweteebanaanga mu myooyo kyeeng'we mutyo?

⁹Siina syeene esihira obwaangu, ohuboolera omudataafu oti, ‘Ebyonoono byao bihuleheerwemo,’ kose, ohuboola oti, ‘Siingira, obukule obuliri bwao, okeende’?

¹⁰Nae muhubeekesa ati, Omwaana w'Omuundu ali neende obunyala hu syaalo obw'ohulehera ebyonoono,” yaboolera omudataafu oyo ati,

¹¹“Huboolera endi, siingira, obukule obuliri bwao, ochie engo!”

¹²Yasiingira yabukula bwaangu obuliri bwae, yaalaala yeweerao abaandu boosi nibamubona. Boosi bawuka muno, baafumia Nasaae nibaboola bati, “Sihubonaangaho esiindu sifwaana siti!”

¹³Yesu yatula ao haandi yaachia hu lwaasi lw'enyaanja. Niyali eyo, esidiiyiha sy'abaandu syoosi haandi syeecha syaamwebuusaho mani yachaaka ohubeekesa.

¹⁴Niyali haandi n'akeenda, yabona omutoosa w'omusolo, olaangwa ati Leefi, omwaana wa Alifaayo, niyehaale mu nyuumba yisoloserwaangamo omusolo, mani yaamuboolera ati, “Noonde.” Yasiingira yaamuloonda.

¹⁵Nae Yesu niyali naalya mu nyuumba ya Leefi, abatoosa b'omusolo abaangi neende abonooni beecha beehala baaliira alala nae neende abeeki bae; olwohuba abatoosa b'omusolo alala neende abonooni abali nibamuloondere bali abaangi muno.

¹⁶Nae abeekesa b'Amalako, neende [8] b'Abafarisaayo, nibabona bati Yesu ali ohuliira alala neende abonooni neende abatoosa b'omusolo, bateeba abeeki bae bati, “Lwasiina oyo alya [9] neende abatoosa b'omusolo alala neende abonooni?”

¹⁷Nae Yesu niyawulira esyo, yababoolera ati, “Abalamu haba sinibo abeenya omulesi, ohutusaho abalwaae; Ese haba sindeecha ohulaanga aboolerefu, nae ndeecha ohulaanga abahola-mbi.”

¹⁸Olwoola, abeeki ba Yowaana alala neende Abafarisaayo nibali nibasiiba, abaandu baandi beecha eyiri Yesu bamuteeba bati, “Lwasiina abeeki ba Yowaana neende abeeki b'Abafarisaayo basiiba, nae abeeki bao haba sibasiiba?”

¹⁹Nae Yesu yababoolera ati, “Mani sinyaliha abakeni bo hubweeya ohuhaya ohulya, omusaacha mweene bweeya n'asisiiri nabo? Ngaandi haba! Omusaacha mweene bweeya n'asisiiri nabo, haba sibanyala ohusiiba.

²⁰Nae ebiha byahoole, omweeya musaacha abatusibweho, olwo nilwo lubahasiibe.

²¹Abulao omuundu yeesi onabiraanga esiraka siyaaha hu ngubo ngofu; olwohuba naahola atyo, esiraka siyaaha esyo siba sichia ohwehuuna sitaandule engubo ngofu eyo, mani obutaanduhe obwo buhoongoye buhireho obwaliwo.

²²Haandi abulao omuundu yeesi ochuhaanga efiini njaaha mu sikiingiro sy'eseero sikofu; olwohuba naahola atyo, efiini njaaha eyo yiba yicha ohwaata eseero elyo; mani efiini yinyaasihe alala neende eseero lyeene; nae efiini njaaha yihoyera eseero eyaaha.” [10]

²³Yesu niyali n'akeenda n'abitira mu mikuunda ky'emere hu ludaalo lwa Sabbaato luundi, abeeki bae bachaaka ohusisimula nibaakula emitwe ky'emere.

²⁴Nae Abafarisaayo bamuboolera bati, “Bonaho, lwasiina abo bali ohuhola esiindu sitafukiirirwa ohuholwa hu ludaalo lwa Sabbaato?”

²⁵Nae Yesu yababoolera ati, “Eng'we musisiiri ohusomaho si Daudi yahola, naahayirwe haandi enjala niyimuluma, alala neende abo ba yali nabo:

²⁶ koti lu yachia yeengira mu Nyuumba ya Nasaae, Abbiataari naali omulaamisi muhuluundu, mani yaalya emigaati kyali kibereeswe Nasaae, ekitafukiirirwa ohuliibwa neende omuundu yeesi ohutusaho abalaamisi boong'ene, haandi yabukula yaakabaho abo ba yali nabo?”

²⁷Yababoolera ati, “Sabbaato yateebwao hulw'omuundu, nae omuundu haba saaliwo hulwa Sabbaato;

²⁸Mani sakira, Omwaana w'Omuundu ali Omwaami wa Sabbaato yosi.”