Read saamia Mariko 3 Bible Online

Mariko 3 - saamia bible

Mariko 3

¹Yesu haandi yeengira mu Sinagoogi, yakaanamo omusaacha wali neende omuhono kwafwa.

²Nae abaandu baandi bachaaka ohumweehaliirisa babone nanamuwonia hu ludaalo lwa Sabbaato nibakiiya ohumutaaho omusaango mbwe muholi w'ebiindu bitadahibwa.

³Nae Yesu yaboolera omusaacha w'omuhono kwafwa oyo ati, “Yicha ano.”

⁴Yesu yateeba abaandu abo ati, “Sihoyera ohuhola esiindu silai hu ludaalo lwa Sabbaato, kose esyonoono, ohuwonia obulamu, hu ludaalo lwa Sabbaato, kose ohwiita?” Nae boosi bawuleera sa.

⁵Nae Yesu yanyoolera mani yaabatingaala neende etima, olwohuba emyooyo kyaabwe kyali emyoomeranu, mani yaboobera omusaacha oyo ati, “Kolola omuhono kwao okwo.” Omusaacha oyo yakukolola, kwaaonerao elalira.

⁶Nae Abafarisaayo nibabona batyo, basiingira batula erwaanyi, mani batulaniramo ohuwuliirisania neende abaandu b'omukaanda kwa Herode, koti lu banyala ohumusihirisa.

⁷Yesu alala neende abeeki bae beetulira ao baachia hu lwaasi lw'enyaanja. Mani esidiiyiha sy'abaandu sihoongo muno ohutula Galilaaya syaabaloondaho, alala neende abaandi ohutula Yudea,

⁸Yerusalemu, Yidumea neende ohutula eyale ohubita engereha wa Yorodaani, neende ohutula aambi wa Tiiro neende Sidoni. Haandi esidiiyiha siindi sihoongo ohweema hu fuma y'ebiindu bi Yesu yali n'ahola.

⁹Sakira, Yesu yaboolera abeeki bae bamutekehere elyaato esidiiyiha sy'abaandu sitamwoolaho syaamudiiya.

¹⁰Olwohuba yali amalire ohuwonia abaandu abaangi, nae abaandu bali neende amalwaae kataali nasilala bali nibeyiindikania nibadaha bati bamudiireho sa.

¹¹Mani buli lu bihyeeno byamubonaanga, byakwiichaanga aasi mu makulu kae nibilira biti, “Niiwe Omwaana wa Nasaae.”

¹²Nae Yesu yabilagiraanga muno bitakera yaamanyihana bwaangu.

¹³Abweene ao, Yesu yachia hu lugulu, mani yaalaanga abo ba yali naadaha; beecha yali.

¹⁴Yalobolamo ehumi-na-babiri, [11] babecheenge nae, haandi banyale ohutumwaangwa nibachia ohuyaala,

¹⁵haandi neende ohuba neende obunyala bw'ohwiirusa emisaambwa. [12]

¹⁶Mani yadoola ehumi-na-babiri: Simooni oyo yi yalaanga Petero;

¹⁷Yakobbo omwaana wa Sebbedaayo neende Yowaana mwanaang'ina Yakobbo, oyo yi yalaanga Bboanagesi, esyeekesa siti, abaana b'ohwaaduluhana ng'ekulu;

¹⁸Anderea, Filipo, Bbatolomeo, Matayo, Tomasi, Yakobbo omwaana wa Alifaayo, Tadeo, Simooni Omukanani,

¹⁹neende Yuda Yisikarioti, owamulyaamo olukwe.

²⁰Yesu yakobola engo. Nae haandi esidiiyiha sihoongo esy'abaandu syebuusira yaali, mani syaabakayira kata ohulya.

²¹Nae abaluyia bae nibawulira batyo, basiingira baachia ohumudiira, olwohuba abaandu baandi bali baboola bati, “Abiiyire omutwe.”

²²Nae abeekesa b'Amalako abatula Yerusalemu baboola bati, “Nguyo aliho omusaambwa kulaangwa, Bbelisebbuuli, haandi yeerusa emisaambwa neende obunyala bwa Bbelisebbuuli omuhuluundu w'emisaambwa.”

²³Yesu yabalaanga beecha yali, mani n'achaaka ohubakaadira engaado ati, “Sitaani anyala atye ohwiirusa Sitaani waasye?

²⁴Obutuki nibukabuhanamo bwachaaka ohulwaana obweene-hu-bweene, obutuki obwo haba sibunyala bwaayiindira.

²⁵Haandi enyuumba yoosi niyikabuhanamo yachaaka ohulwaanakana eyeene-hu-yeene, enyuumba eyo haba siyinyala ohuyiindira.

²⁶Nae nikali mbwe Sitaani bulaanu niye ochaakire ohwelwaania omweene, mbao mani edaala lyae likabuhaanemo, mani haba silinyala ohuyiindira, mbao lyoolere ohusihirira.

²⁷Nae abulao omuundu onyala yaafunaka mani yeengira mu nyuumba y'omuundu w'amaani, yaayaaya ebiindu byae, n'atataangire ohumuboya, hu yaanyala ohuyaaya enyuumba yae bulai.

²⁸“Mbaboolera obwadyeeri endi, abaandu bachia ohuleherwa ebyonoono byaabwe byoosi, alala neende ebyo byoosi bi balomaloma ebifwoola Nasaae;

²⁹nae oyo yeesi olomaloma ebifwoola Mwooyo Mwoolerefu, haba saacha huleherwa olwohuba aba aholere esyonoono sitawa”

³⁰olwohuba abaandu bali baboolere bati, “Yesu aliho esihyeeno.”

³¹Ng'ina Yesu neende bamwanaang'ina bamala beecha. Nae nibali nibasyeemere erwaanyi, batumira Yesu emboosi, nibamulaanga bati yeeche yi bali.

³²Nae, esidiiyiha sy'abaandu syali sihaale nisimwebodoohanie, syaboolera Yesu siti, “Maakoo neende bamwaanamaao [13] bali erwaanyi, bahukoonya.”

³³Nae Yesu yabakobolamo ati, “Maama neende bamwaanaama nibo abali yeena?”

³⁴Mani yatingaala hu baandu bali nibehaale nibamwebodoohaanie, n'aboola ati, “Maama neende bamwaanaama mbano bali ano!

³⁵Oyo yeesi ohola bi Nasaae adaha, niye oba mwaanaama, neende mboocho, neende maama.”