Read saamia Mariko 5 Bible Online

Mariko 5 - saamia bible

Mariko 5

¹Yesu alala neende abeeki bae baambuha boola engereha w'enyaanja ya Galilaaya mu syaalo sya Geraasa. [15]

²Yesu niyatula sa ati mu lyaato, yaakanana neende omusaacha oliho esihyeeno, otula mu ng'uungu chibasihaangamo abaandu.

³Omusaacha wuno yamenyaanga mu biriindwa byomu ng'ungu, haandi yabulao omuundu yeesi owanyalaanga ohumuboya kata neende eminyororo;

⁴olwohuba yali naboywaangaho epiingo alala neende eminyororo nae eminyororo yakidonya-donyaangamo sa, nae epiingo nacho yachihalaka-halakangamo sa; haandi abulao omuundu yeesi owaliho neende amaani k'ohumuyiingira.

⁵Esiro neende esideete, yali naang'abanaanga sa mu biriindwa byomu ng'uungu, neende hu ngulu niyehumusa-huumusa, haandi niyenyubululira amakina.

⁶Niyabonera Yesu eyale, yeeruha bwaangu yeecha yaali yaamwiinamira;

⁷haandi n'alira neende ekono hoongo n'aboola ati, “Yesu Omwaana wa Nasaae w'Aakulu Muno, onaahole otye? Huliriire mu liita lya Nasaae endi, otaasaandya haba!”

⁸(Omusaacha wuno yaboola atyo olwohuba Yesu yali amuboolere ati, “Esihyeeno ewe, tula mu musaacha oyo!”)

⁹Nae Yesu [16] yamuteeba ati, “Eliita lyao nilyo naanu?” Nae oyo yakobolamo ati, “Eliita lyaange nilyo Legioni; olwohuba huli abaangi.”

¹⁰Omusaacha oyo yachiiririra ohwekweeda Yesu neende esinani ati ateerusa ebihyeeno ebyo ohutula mu syaalo esyo.

¹¹Bulaanu aambi ao waliwo eyiicho hoongo ely'embiichi niliri ohwayaanga hu ndulo w'esigulu;

¹²mani ebihyeeno ebyo byekweeda Yesu nibiboola biti, “Tutume huchie mu mbiichi echo, otufukiirire huchiingiremo.”

¹³Yesu yafukiirira ebihyeeno ebyo, byaatula mu musaacha oyo, mani byaachia byeengira mu mbiichi. Eyiicho elyo lyoosi, lyali lyoola aambi embiichi elifu chibiri enaamba, mani choosi chaatimuha embiro cheehirira hu ndulo w'esilugulu, chaweera mu nyaanja chaasihama choosi pe.

¹⁴Abaayi b'embiichi bosi beeruha baasalaana, bachia mu siko sihoongo alala neende mu ngoongo chikabuhaane baasalaania emboosi echo. Abaandu beeyiha ohuchia ohubona esyali nisikwiireo.

¹⁵Nae niboola eyiri Yesu, babona omusaacha wali niyeechulaho emisaambwa niyehaale ao. Yali niyefwaalire engubo bulai haandi elalu nilimwamuuheho, mani abaandu abo boosi baatya muno.

¹⁶Abaandu bali nibabweene ebikwiireo, bachaaka ohukaniaayira abaandi ebyali bikwiire hu musaacha waliho emisaambwa oyo, neende ebyakwa hu mbiichi.

¹⁷Abweene ao abaandu beekweeda Yesu [17] bati atule mu syaalo syaabwe.

¹⁸Nae Yesu niyali niyeengira mu lyaato, omusaacha waliho emisaambwa chana oyo yamwekweeda ati amufukiirire achie nae.

¹⁹Nae Yesu yahaya, yaamuboolera ati, “Kaluha engo eyiri abaandu bao, obaboolere ebiindu by'amaani bi Omwaami ahuholere, haandi koti lu ahukwiirire esisa.”

²⁰Mani omusaacha oyo yatula ao yaachia yachaaka ohuyaala mu biko ehumi (Mu Lugiriki bati, Dekapooli) ebiindu byoosi bi Yesu yali amuholeere, mani abaandu boosi bawuka muno.

²¹Yesu haandi yaambuhira mu lyaato yaachia engereha w'enyaanja. Nae niyoola eyo, haandi esidiiyiha sihoongo sy'abaandu syamwebodoohania.

²²Abweene ao, mulala hu beemirisi bomu Sinagoogi, olaangwa ati Yairo yeecha eyiri Yesu. Niyoola yaabona Yesu, yamukwa mu makulu,

²³yaamwekweeda neende esibeera, n'aboola ati, “Omwaana waange muhaana muyere mulwaae muno, ali aambi ohufwa. Mani yichia omuteehooho amahono kao, anyale ohuwona, abe omulamu.”

²⁴Mani Yesu yaachia neende Yairo. Haandi esidiiyiha sy'abaandu sihoongo syamuloondaho mani syaamwebuunjihaho.

²⁵Mu sidiiyiha omwo mwalimo omuhasi wali n'alwaala esihulukuto nisimumalireho emyaaka ehumi neende kibiri.

²⁶Yali asaandiire muno mu mahono k'abalesi abaangi, n'anyaasire buli mwaandu ku yali nakwo kwoosi, nae haba siyawona daawe, ohumalaho obulwaae bwae obwo bwemeeda sa ohumunyaala.

²⁷Omuhasi wuno yali yawulira efuma ya Yesu, mani yenyiira yeyiindikania mu sidiyiiha yoola enyuma wa Yesu, mani yaadiira hu ngubo yae.

²⁸Yahola atyo olwohuba omweene yali yeboolere mu mwooyo kwae ati, “Nindiiraho sa kata hu kemo ly'engubo yae, mba njia ohuwona.”

²⁹Mani niyamudiiraho sa ati, esihulukuto syae esyo syaakamirao; mani omuhasi oyo yaamala yewulira mu mubiri kwae ati bwadyeeri, obulwaae bwae obwo bumalire ohuwona.

³⁰Nae Yesu niyamanya ati, aliwo amaani akamutuliremo, abweene ao yakaluhaana emukoongo mu sidiyiiha yateeba ati, “Naanu odiirire hu ngubo yaange?”

³¹Nae abeeki bae bamuboolera bati, “Oli ohubona koti baandu bahweyiindikaanieho mu buungi, haandi hu waachia wateebaanga oti, ‘Wiina owuundiirireho?’ ”

³²Nae Yesu yemeeda ohwewuunja abone omuundu omudiirireho.

³³Nae omuhasi oyo, koti lu yali amanyire esyali simweholeeheho, yeecha n'atiire haandi nateengereha yaakwa aasi mu makulu ka Yesu, mani yaamuboolera obwadyeeri bwoosi.

³⁴Mani Yesu yaamuboolera ati, “Muhaanang'ene, efukiirira yao yihuwoniisye; mani wao neende ehabi haandi leha obulwaae bwao obwo buwonere elalira.”

³⁵Nae Yesu niyali nasiilomalomaanga, abaandu baandi ohutula ewa Yairo boola baamuboolera bati, “Omuhaana wao amalire ohufwa. Lwasiina onyaahania Omweekesa haandi?”

³⁶Nae Yesu yahaya ohudeebayo [18] hu bi bali nibaboolere, mani yaboobera omwiimirisi wa Sinagoogi oyo ati, “Otatya daawe, yamiina sa.”

³⁷Yesu siyakanyaho omuundu yeesi ohumuloondaho ohutusaho, Petero neende Yakobbo neende Yowaana mwanaang'ina Yakobbo.

³⁸Nae niboola mu daala ly'omwiimirisi wa Sinagoogi oyo, Yesu yabona abaandu nibadobaanire, haandi abalisi niboobba wuuwi alala neende ohuchereenjesera aakulu muno.

³⁹Yesu niyamala ohwiingira mu nyuumba, yaboolera abaandu abo ati, “Lwasiina mudoobaanire alala neende ohulira? Omwaana wuno haba saafwiire, nae ali ohukona sa endoolo.”

⁴⁰Nae abaandu abo bamucheha sa. Nae yabatusa boosi erwaanyi, mani yaabukula laatang'ene mwaana neende ng'ina alala neende ba yali ali nabo, mani beengira baachia yi mwaana yali.

⁴¹Yesu niyoola, yadiira omuhono kw'omwaana oyo, yaamusiingisa n'aboola ati, “Talita kumi” amahuluundu mbwe, “mwaana muhaana ewe, huboolera endi, siingira weeme.”

⁴²Nae abweene ao n'omuhaana oyo asiingira yeema, achaaka ohukeenda (olwohuba yali yosa emyaaka ehumi neende kibiri), mani abweene ao, abaandu bawuka muno hulw'ebyo byoosi ebyali nibyeeholeehe.

⁴³Nae Yesu yabalagira muno ati batabooleraho omuundu yeesi esyali nisyeholeehe, mani yaababoolera ohuberesaho omuhaana oyo esyohulya.