Read saamia Mariko 8 Bible Online

Mariko 8 - saamia bible

Mariko 8

¹Mu ndaalo echo, esidiiyiha sy'abaandu sihoongo muno haandi syeebuusira eyiri Yesu, mani baahaywa esyohulya syoosi, Yesu yalaanga abeeki bae, yababoolera ati,

²“Esidiiyiha sy'abaandu sino sindiisa esisa muno, olwohuba syahaba ano naange endaalo chidatu enaamba, mani babula esyohulya syoosi;

³nae nimbaseebula bakobole engo waabwe neende enjala, bachia ohukwa hu ngira; haandi abaandi hu baandu bano batula eyale muno.”

⁴Nae abeeki bae bamukobolamo bati, “Wiina onyala ohuliisa abaandu baangi bano emigaati mu syaalo sy'esiparara sino?”

⁵Nae Yesu yabateeba ati, “Nae eng'we muli neende emigaati kiinga?” Baboola bati, “Kitaanu-na-kibiri.”

⁶Yesu yalagira esidiiyiha esyo ohwiihala aasi; mani yaabukula emigaati kitaanu-na-kibiri ekyo. Niyamala ohukiberesa ehabi, yakimekula-mekula, yaakiberesa abeeki bae bakikabe abaandu abo; mani bosi baahola batyo.

⁷Abeeki abo bali neende otung'eeni twosi tudiidi hooho, mani Yesu niyamala ohutuberesa ehabi, yaboola ati otung'eeni otwo twosi batukabe abaandu.

⁸Balya, beekutira elalira; mani nibabuusa ebidonye-donye byadoong'aho, byeechula ebikono bitaanu-na-bibiri.

⁹Abaandu balya bali aambi elifu chine enaamba.

¹⁰Yesu yamala atyo yaaseebula abaandu abo beweerao; mani abweene ao, yeengira mu lyaato alala neende abeeki bae, mani baachia mu situundu silaangwa siti, Dalimanuuta. [31]

¹¹Olwoola, Abafarisaayo baandi beecha eyiri Yesu mani baachaaka ohuyiingana nae, nibamukoonyeresaho bati abaholere esilolero esy'amayia ohutula Muukulu.

¹²Yesu yeesa omwooyo lukali muno, yaboola ati, “Lwasiina olwiibulo luno lukoonyeresa sa esilolero? Mbaboolera obwadyeeri endi, abulao esilolero sichia ohubereswa olwiibulo luno.”

¹³Yesu yabatulaho yaawaao, yeengira mu lyaato yaambuha engereha.

¹⁴Bulaanu abeeki bae bali nibebiriire ohwiicha neende emigaati; nae bali badoong'ere neende omugaati mulala kwoong'ene mu lyaato

¹⁵Yesu yabakerakira n'aboola ati, “Mumanyaanga, mweliinde ohutula hu mamera k'Abafarisaayo neende aka Herode.” [32]

¹⁶Abeeki baboolanira abeene-na-beene bati, “Hubula omugaati kwoosi.”

¹⁷Nae olwohuba Yesu yali amalire ohusimanya, yababoolera ati, “Lwasiina muli ohwekaniayaanga muti mubula omugaati kwoosi? Eng'we mutoola ohuba neende ohubona oba kata ohumanya hwosi? Emyooyo kyeeng'we kyoomerana?

¹⁸Mwaaba neende emoni, mwaahaya ohubona? Haandi mwaaba neende amatwi, mwaahaya kata ohuwulira? Haandi kata simunyala ohwiichulisaho?

¹⁹Oludaalo lu ndamekula-mekuliraho emigaati kitaanu ohuliisa abaandu babita elifu chitaanu, eng'we mwabuusa ebikono biinga ebichuule ebituundu-tuundu byadoong'aho?” Nabo bamukobolamo bati, “Ehumi-na-bibiri.”

²⁰“Nae emigaati kitaanu-na-kibiri ohuliisa abaandu ababita elifu chine, mwabuusa ebikono biinga ebichuule ebituundu-tuundu byadoong'aho?” Nabo bamukobolamo bati, “Bitaanu-na-bibiri.”

²¹Nae Yesu yeemao yaababoolera ati, “Kata katyo, musiisiiri ohubaaho neende ohumanya hwoosi?”

²²Beemao boola Bbetisaida. Niboola eyo, abaandu baandi baleeta eyiri Yesu omusaacha muwofu, baamwekweeda bati amudiirehooho sa.

²³Yesu yadiira omuhono kw'omusaacha muwofu oyo, yaamutusa erwaanyi w'olukoongo olwo; yaamufucha hu moni, haandi yaamwiisaho amahono kae, mani yaamuteeba ati, “Oli ohubonaho esiindu syosi-syosi?”

²⁴Omusaacha oyo yatingaala aakulu mani yaaboola ati, “Ndi ohubona abaandu; nae bafwaana koti emisaala kikeenda.”

²⁵Yesu haandi yata amahono kae hu moni ch'omusaacha oyo; mani omusaacha oyo yaahang'aasa emoni chae, mani chaaonera elalira, yaanyala ohubona buli siindu bulai bweene.

²⁶Yesu yaseebula omusaacha oyo akobole engo wae, n'amuboolera ati, “Omanyaanga ochia wiingiraho mu lukoongo olwo haandi.”

²⁷Yesu yachia neende abeeki bae, mu ngoongo chiri aambi neende Kaisarea Filipi; nae nibali hu lukeendo olwo, Yesu yateeba abeeki bae ati, “Abaandu baboola bati Niise naanu?”

²⁸Nae abeeki bae bamuboolera bati, “Yowaana Omubatiisi; abaandi bati, Elija; haandi abaandi bati, mulala hu banabbi.”

²⁹Nae Yesu yabateeba ati, “Nae eng'we muboola muti Ese Niise naanu?” Petero yamukobolamo ati, “Ewe niiwe Kristo.”

³⁰Yesu yaabalagira ati batabooleraho omuundu yeesi ebimudiiraho.

³¹Yesu yamala yachaaka ohubeekesa ati Omwaana w'Omuundu ahoyere ohusaanda muno, haandi asyuulwe neende abahuluundu b'oluyia, abalaamisi bahuluundu, neende abeekesa b'Amalako, haandi yeetwe, haandi oluunyuma lw'endaalo chidatu, asyuuhe.

³²Yesu yalomaloma bino mubwaahaahu. Nae Petero yamubukula yaamusudya endulo mani yachaaka ohumwaalabira.

³³Nae Yesu niyakaluuhana mani yabona abeeki bae, yaalabira Petero n'aboola ati, “Ewe Sitaani, mbweere-eyi! Olwohuba haba sooli ebuleka wa Nasaae, nae oli ebuleka w'abaandu.”

³⁴Yesu yeemao yaalaanga esidiiyiha sy'abaandu alala neende abeeki bae beeche yaali, mani yaababoolera ati, “Omuundu yeesi odaha ohunoonda, leha yesyuule omweene, mani akiinge omusalabba kwae, yaanoonde.

³⁵ “Olwohuba oyo yeesi owekoomba ohuwonia obulamu bwae omweene, achia ohubukosa; nae oyo okosa obulamu bwae hulwaange neende hulw'emboosi ndai ya Nasaae, aba achia ohubuwonia.

³⁶Olwohuba sy'engaanga siina omuundu, ohunyoola esyaalo syoosi, nae afwiirwe obulamu bwae?

³⁷Olwohuba, siindu siina syeene si muundu anyala ohukulaasaniamo neende obulamu bwae?

³⁸Olwohuba, oyo yeesi odiirwa esoni hulwaange neende hulw'emboosi chaange, mu luse lwonooni haandi olutamanyire Nasaae luno, oyo niye yi Omwaana w'Omuundu yesi achia ohudiirirwa esoni, niyahabe niyeecha mu luyaali luhoongo lwa Simwaana alala neende bamalaika boolerefu.”