Read saamia Luka 1 Bible Online

Luka 1 - saamia bible

Luka 1

¹Koti lu baandu baangi bamalire ohutekeha bulai mu bwandiike ebiindu bitweholeehemo,

²haandi koti abo abataangira ohweboneraho abeene, mani bahalaabanira emboosi eyo batudiisa,

³ese syesi nimalire bulaanu ohumanyirisa bulai ebiindu bino,[1] sibweene endi silai ohuhwandiikira ewe ow'oluyaali Teofiro, nindekeehe bulai ebiindu koti byaloondehana,

⁴hu weesi onyale ohumanya obwadyeeri bweene bw'ebiindu bi bahweekesa.

⁵ Mu ndaalo chi Herode yali naali omutuki wa Buyudaaya, yaliwo omulaamisi olaangwa Sakaria, owali ow'enono y'abalaamisi ya Abbija. Omuhasi wae olaangwa Elisabbeeti, yali ow'enono ya Arooni.

⁶Mani boombi bali abaluungifu mu moni wa Nasaae, nibaloondakirira amalako koosi neende ebidahibwa by'Omwaami byoosi ataali ohudoondobanaho kata.

⁷Nae sibaliho neende omwaana haba, olwohuba Elisabbeeti yali omukuumba, haandi boombi bali bahulire mu myaka.

⁸Olwoola, Sakaria niyali ali ohuhola omulimo kw'obulaamisi muu moni wa Nasaae, olwohuba oluyia lwae nilwo olwali olw'ohuhalaabanira Nasaae mu biha ebyo,

⁹ohweema hu ndekeha yaabwe y'obulaamisi, eha yamukwaho achie anioohese obubbaani mu nyuumba y'Omwaami.

¹⁰Nae esidiiyiha sy'abaandu syoosi syali nisilaamira erwaanyi mu biha by'ohunioohesa obubbaani.

¹¹Mani ao niwo yi malaika w'Omwaami yeecha yaamubonehera niyeemere hu lwaande lw'omuhono muluungi kw'alutaari y'ohuniooheseraho obubbaani.

¹²Nae Sakaria niyamubona, eholo yamubba muno mani obuti bwamudiira.

¹³Nae malaika yeecha yamuboolera ati, “Sakaria, otatya, olwohuba ohusaba hwao huwuliirwe, haandi omuhasi wao Elisabbeeti, achia ohuhwiibulira omwaana musyaani, mani wahamulaange eliita Yowaana.

¹⁴Haandi ochia ohuba neende esangaalo neende omwehoyo, mani abaandu baangi bahehoye olw'ohwiibulwa hwae;

¹⁵ olwohuba yahabe omuhunuufu muno mu moni w'Omwaami, siyahang'weeho efiini yoosi kata esyohung'wa simeesa syoosi, achia ohwichusibwa Mwooyo Mwoolerefu, ohutulira elalira mu nda ya ng'ina.

¹⁶Achia ohukaluuhania abaana ba Yisiraeli abaangi abakaluse eyiri Nasaae Omwaami waabwe,

¹⁷ haandi achia ohumutaangirira mu mwooyo neende amaani ka Elija, akaluuhanie emyooyo kya basimwaana baandu chikaluhe hu baana baabwe, neende ba nandawulira bakaluhe hu makesi k'abaluungifu; achia ohuhola abaandu beetekehere Omwaami waabwe.”

¹⁸Nae Sakaria yaboolera malaika oyo ati, “Sino, ese ndahasimanye endye? Olwohuba bulaanu ese ndi omusaacha mukofu, haandi omuhasi waange yesi ahulire mu myaka.”

¹⁹ Nae malaika yamukobolamo ati, “Niise Gabburieli, oweemere mu moni wa Nasaae; mani ndumirwe ohulomaloma yooli, haandi ohuhuleetera emboosi ndai chino.

²⁰Mani bone, ochia ohuwuleera haandi bihuhae ohulomaloma, ohwoolera elalira hu ludaalo lu biindu bino byaholerere, olwohuba sofukiriire emboosi chaange, echichia ohwolerera mu biha byaachio.”

²¹Nae abaandu bali baliindiriire erwaanyi, bawuka olwohuba Sakaria yali ahiindire muno mu Nyuumba ya Nasaae.

²²Niyatula erwaanyi, haba siyanyala ohulomalomaho nabo, mani bamanya sa bati, yali aboneheerwe mu Nyuumba ya Nasaae; nae yeecha yabaholera sa ebilolero, mani omweene yadoong'a n'atalomaloma.

²³Mani ebiha byae eby'ohuhalaabanira Nasaae nibyawa, yakobolayo engo.

²⁴Endaalo echio nichawa, omuhasi wae Elisabbeeti yanyoola amabaanga, mani olw'embaka y'emyoosi chitaanu yekisa abaandu, n'aboola ati,

²⁵“Omwaami mweene niye owumbaasireho yaholera sino mu ndaalo chino, yandusaho esoni mu moni ch'abaandu.”

²⁶Mu mwoosi kwohusaasaba, Nasaae yatuma malaika Gabburieli ohuchia mu siko sya Galilaaya esilaangwa Nasareeti,

²⁷ eyiri omuhaana otaamanyireho eby'abasaacha, owali afukiirisaanie ohudeehisania neende omusaacha olaangwa Yosefu, owomu nyuumba ya Daudi; nae eliita ly'omuhaana otaamanyireho eby'abasaacha oyo lyali Maria.

²⁸Malaika oyo yeecha yaali mani n'aboola ati, “Muleembe, Ewe owabereswa ehabi, Omwaami ali naawe!” [2]

²⁹Nae enomanoma eyo yamusindusa muno, yachaaka ohubaasa mu mwooyo kwae amahuluundu k'eheesa yino.

³⁰Nae malaika yamuboolera ati, “Maria, otatya, olwohuba Nasaae ahubeere ehabi.

³¹ Mani bone, ochia ohunyoola amabaanga, wiibule omwaana musyaani, mani wahamulaange eliita oti Yesu.

³² Achia ohuba omuhunuufu, haandi yahalaangwe Omwaana wa Nasaae w'Aakulu Muno; haandi Omwaami Nasaae achia ohumuberesa esisaala sy'obutuki bwa Daudi kukaang'ene,

³³haandi achia ohutuka enyuumba ya Yakobbo, emyaaka choosi; mani obutuki bwae sibuchia huwaao.”

³⁴Nae Maria yaboolera malaika ati, “Sino sichia ohunyalihana sitye, olwohuba ese siimanyire eby'abasaacha?”

³⁵Nae malaika yamuboolera ati, “Mwooyo Mwoolerefu achia ohuhwiihaho, haandi amaani kooyo oli Aakulu Muno kachia ohuhubwiiha; mani sakira omwaana ochia ohwiibulwa achia ohulaangwa omwoolerefu, Omwaana wa Nasaae.

³⁶Mani bona, omuhasi w'oluyia lwao Elisabbeeti, mu myaka chae ch'obukofu, yesi yaamalire ohunyoola amabaanga k'omwaana musyaani; mani kuno nikwo omwoosi kwae kwohusaasaba naali asito, oyo yibalangaanga omukuumba.

³⁷ Olwohuba, sibulao esiindu syoosi esitanyaliha eyiri Nasaae.”

³⁸Maria yaboola ati, “Ese mbano, ndi omuhalaabani w'Omwaami; leha si ndeeholeho koti lu oboola.” Malaika yaamuleha.

³⁹Mu ndaalo echo, Maria yasiingira yacha bwaangu mu syaalo sy'engulu, mu siko sya Yudea,

⁴⁰mani yeengira mu nyuumba ya Sakaria, yaheesa Elisabbeeti.

⁴¹Nae Elisabbeeti niyawulira sa ati ohuheesa hwa Maria, omwaana yachaaka ohutachula mu nda; mani Elisabbeeti yamala yechuswa Mwooyo Mwoolerefu

⁴²mani yaalomalomera mu kono ly'aakulu n'aboola ati, “Oli neende ehabi mu bahasi boosi, haandi esiri mu nda yao siri neende ehabi!

⁴³Sino si njolereho sitye, ng'ina Omwaami waange ohwiicha yi ndi?

⁴⁴Olwohuba boneho, ohuheesa hwao nihuungwiire mu matwi sa huti, ni omwaana aduumakala mu nda yaange olw'esangaalo.

⁴⁵Haandi w'ehabi oyo owafukiirira ati, ebyo ebyamuboolerwa ohutula eyiri Omwaami byaholerere.”

⁴⁶Maria yaboola ati, “Omwooyo kwaange kufumia muno Omwaami,

⁴⁷haandi omwooyo kwaange kwehoyera mu Nasaae Omuwonia waange,

⁴⁸ olwohuba abweene obuloonga bw'omuhalaabani wae. Olwohuba boneho, ohutula buti, enjibulo choosi chichia ohunangaanga ow'ehabi;

⁴⁹olwohuba oyo ow'Obunyala bwoosi, yaholeere eby'amaani, haandi eliita lyae lyoolerefu.

⁵⁰Haandi esisa syae siri hu bamutya ohutula hu lwiibulo lulala ohwoola hu luundi.

⁵¹Yekeese amaani mu biindu bi mahono kae kahola, asakuulire ebibaaso byomu myooyo ky'abeniinia abeene,

⁵² yeesere aasi abahunuufu ohutula hu bisaala byaabwe by'obutuki, haandi yaniinia aakulu abaloonga;

⁵³yekuuse abayala enjala neende ebiindu bilai, nae abayiinda abatusireyo bihaya.

⁵⁴Ahoonyere Yisiraeli omuhalaabani wae, niyechuliise esisa syae,

⁵⁵ koti lu yaboolera bakuuka yeefwe, Abburahamu neende abeechuhulu bae endaalo choosi-choosi.”

⁵⁶Mani Maria yamenya neende Elisabbeeti ohumala aambi w'emyoosi kidatu, mani yamala yaakobola engo wae.

⁵⁷Bulaanu, ebiha bya Elisabbeeti ohweetusaho nibyoola, yeebula omwaana musyaani.

⁵⁸Nae abanaluyia bae alala neende abo abasibirana nae nibawulira bati Omwaami akwiriire Elisabbeeti esisa siingi sityo, beecha basangaalira alala nae.

⁵⁹ Nae oludaalo lwa chitaanu-na-chidatu nilwoola, beecha ohuheba omwaana oyo; mani bali badaha ohumukuliha eliita lya laatang'ene bati Sakaria,

⁶⁰nae ng'ina yaboola ati, “Haba daawe; achia ohulaangwa Yowaana.”

⁶¹Nae bamuboolera bati, “Mu luyia lwao, muwumamo omuundu yeesi olaangwa, Yowaana.”

⁶²Mani baholera laatang'ene ebilolero nibadaha ohumanya koti luyahamulaangire.

⁶³Nae yabasaba ekina ly'ohwandiikaho, mani yandiika ati, “Eliita lyae nilyo Yowaana.” Mani abaandu boosi bawukaho muno.

⁶⁴Abweene ao, omunwa kwa Sakaria nikwiikuha, olulimi lwae niluboololoha, mani n'achaaka ohulomaloma, n'afumia Nasaae.

⁶⁵Obuti bwadiira abaandu bamenya aambi nae boosi. Mani abaandu balomaloma hu biindu bino byoosi mu syaalo sy'engulu sya Yudea syoosi;

⁶⁶abo boosi ababiwulira, babibiiha mu myooyo kyaabwe nibaboola bati, “Nae omwaana wuno yahabe siina?” Olwohuba omuhono kwa Nasaae kwali nae.

⁶⁷Mani Sakaria laatang'ene Yowaana yeecha yeechula Mwooyo Mwoolerefu, mani yatumbula ebidiira hu mwaana oyo n'aboola ati,

⁶⁸“Nasaae Omwaami wa Yisiraeli akinisibwe, olwohuba akeniiye abaandu bae haandi yaabanunula,

⁶⁹mani atusiingisiire olwiika lw'obuwonia mu nyuumba ya Daudi omuhalaabani wae,

⁷⁰koti lu yalomaloma hale mu minwa ch'abanabbi bae boolerefu,

⁷¹ati, achia ohutuwonia atutuse mu basuku beefwe, haandi atutuse mu mahono k'abaandu batusyuula boosi;

⁷²atweekese esisa siyalaka bakuuka yeefwe, haandi niyechulisa Endagaano yae enjoolerefu,

⁷³esichubo si yechubira Abburahamu seefwe,

⁷⁴ohutuberesa ati efwe, nihununuulwe ohutula mu mihono ch'abasuku beefwe, hunyale ohumuhalaabanira ataali ohutya hwoosi,

⁷⁵mu bwoolerefu neende obuluungifu mu moni wae mu bulamu bweefwe bwoosi.

⁷⁶Nae ewe, mwaana ewe, ochia ohulaangwa omunabbi wa Nasaae w'Aakulu Muno; olwohuba ochia ohutaangiriramo Omwaami, ohumutekehera engira chae,

⁷⁷ohuberesa abaandu bae amakesi k'obuwonia, mu huleherwamo hw'ebyonoono byaabwe,

⁷⁸ohubitira mu sisa siingi sya Nasaae weefwe, oludaalo luuhyereere ohutula aakulu.

⁷⁹ Ohuberesa obulafu abaandu abo abehala mu siirima neende mu siiniha sy'ohufwa, ohuluungiha amakulu keefwe mu ngira y'omuleembe.”

⁸⁰Mani omwaana yahula, haandi yaaba omwomiifu mu mwooyo, mani yamenya mu siparara ohwoola hu ludaalo lu yeyekesera alafu eyiri abaandu ba Yisiraeli.