Read saamia Luka 12 Bible Online

Luka 12 - saamia bible

Luka 12

¹ Mu biha byeene ebyo, ebidiiyiha by'abaandu baangi muno byali bimalire ohwebuusa alala, abaandu nibachaakire ohwesenanaho, Yesu yeecha yataangira ohuboolera abeeki bae ati, “Mweliinde amamera k'Abafarisaayo ak'obwebachirisi.

² Sibulao esiindu syoosi esyabwihwaho esitachia hubwiihulwa, oba esyakiswa esitachia humanyihana.

³Mani sakira esyo syoosi simwalomaloma mu siirima, sichia ohuwuliirihanira mu bulafu, haandi esyo syoosi simwemoonyera mu nyuumba, sichia ohulaangirirwa hu birama by'enyuumba.

⁴“Mbaboolera obwadyeeri eng'we abeecha baange endi, mutatichaanga abo abeeta omubiri, nae nibamala batyo, sibulao esiindu syoosi sibanyala ohuhola.

⁵Nae njia ohubalabula oyo yimuhoyeera ohutya. Muticheenge oyo, omala ohwiita, haandi oli neende obunyala bwohusukuna mu nyaanja y'omuliro; [18] eee, mbaboolera endi, mutye oyo!

⁶Obubbiichu butaanu, haba sibukulwaanga obuhela bubiri bwoong'ene? Nae abulao kata halala hw'otwo ahebirirwanga mu moni wa Nasaae.

⁷Lwasiina, kata efwiiri yohumutwe kwao lyoosi, lyamala ohubalwa. Mutatya daawe; eng'we mulimo obuhala obuungi muno ohuhira obubbiichu buungi.

⁸“Haandi mbaboolera endi, buli muundu yeesi owufukiirira mu moni w'abaandu, Omwaana w'Omuundu yesi aba achia ohumufukiirira mu moni wa bamalaika ba Nasaae;

⁹nae oyo owundekaana mu moni w'abaandu, achia ohwekaanibwa mu moni wa bamalaika ba Nasaae.

¹⁰ Haandi omuundu yeesi, olomaloma emboosi bubi hu Omwaana w'Omuundu achia ohuleherwa; nae oyo yeesi ofwoola Mwooyo Mwoolerefu, haba saachia huleherwamo daawe.

¹¹ Nae nibabaletaanga mu moni wa buli sinagoogi neende mu moni w'abeemirisi, kata neende mu moni wa b'obunyala bakabuhaane, mutelalihiriraanga eby'ohukobolamo neende engeri y'ohukobolamo, oba eby'ohulomaloma;

¹²olwohuba Mwooyo Mwoolerefu aba achia ohubeekesa esiha syeene esyo eby'ohulomaloma.”

¹³Olwoola, mulala hu baandu bali mu sidiiyiha yaboolera Yesu ati, “Omweekesa, boolera mwaanama akabane naange ebiindu bi hwalaamirwa.”

¹⁴Nae Yesu yamuboolera ati, “Wasyaange, wiina owandaao ohuba omukayi weeng'we oba omukabi w'ebiindu byeeng'we?”

¹⁵Mani Yesu yababoolera ati, “Mweliinde, haandi mweekaye obwekoombi bwoosi; olwohuba obulamu bw'omuundu sibweema hu buungi bw'obuyiinda bwae.”

¹⁶Yesu yabakaadira olukaado n'aboola ati, “Olwoola, endalo y'omusaacha wuundi muyiinda, yama bulai muno;

¹⁷mani omusaacha oyo yabaasa mu mwooyo kwae ati, ‘Ndaahole endye, olwohuba mbula abuundu w'ohuteera ebilime byaange?’

¹⁸Mani yaboola ati, ‘Bulaanu sino nisyo siinjia ohuhola: Njia ohukwiisa ebyaaki byaange byoosi, mani male nyombahe ebihoongo bihira hoo; mani omwo nimwo munja ohuteera emere yaange alala neende obuyiinda bwaange bwoosi.

¹⁹Mani niimala endyo njia ohuboolera omwooyo kwaange endi, Bulamu ewe, mbao oli neende ebiindu biyera ebihubihiirwe ohumala emyaaka emiingi muno; mani otelalihira, lya, ng'wa, mani osangaale.’

²⁰Nae Nasaae yamuboolera ati, ‘Omusiru wuno! Esiro syeene sino obulamu bwao, bucha ohuhutusibwaho; mani ebiindu biwabiiha bino byoosi, bichia ohuba ebya wiina?’

²¹Mani nilwo lwaali oyo yeesi, owebuungira omweene obuyiinda bwae, nae saali omuyiinda mu moni wa Nasaae.”

²²Bulaanu, Yesu yaboolera abeeki bae ati, “Sakira mbaboolera endi, mutelalihiriraanga eby'obulamu bweeng'we, bi munaalye, oba ebidiira hu mibiri kyeeng'we, neende eby'ohwefwaala.

²³Olwohuba obulamu buhira ebyohulya, nae omubiri kwosi kuhira eby'ohwefwaala.

²⁴Mubonereho hu mahoofwa. Haba sikawaanya kata sikakesa, sikali neende aohubiiha ebiindu, kata ebyaaki, nae bone Nasaae akaliisa. Nae obuhala bweeng'we sibuhira muno amayoni ako!

²⁵Nae wiina hweeng'we hulw'ohwelalihirira hwae, onyala ohumeeda hu bulamu bwae bwaaba obuleeyi hooho? [19]

²⁶Nikali mbwe eng'we simunyala ohuhola esiindu sidiidi sityo, lwasiina mwelalihira hulw'ebiindi bidoong'ereyo?

²⁷ Mubonereho hu bimuli byomu siino, koti lu bihula; haba sibihola mirimo oba ohunaba engubo ch'ohwefwaala; [20] nae mbaboolera endi, kata Solomooni, mu luyaali lwae lwoosi, haba siyanyalaho ohwefwaala yeetiha ohwaakana neende silala hu bimuli bino.

²⁸Nae nikali mbwe Nasaae anyala ohufwaasa sa obunyaasi bwomu siino ohubaao enyaanga yino, nae muchuli busukunwa mu muliro ohusaambwa, nae aba yahaake yeena ohubafwaasa, eng'we ab'efukiirira ndiidi!

²⁹Mani sakira mutekoonyereseraanga ebyohulya neende eby'ohung'wa kata ohubechaanga neende ebibaaso by'ohweelalihira.

³⁰Olwohuba ebyaalo byohu syaalo huno byoosi, bikoonyeresa sa ebiindu bino; nae Seeng'we amanyire ati mwesi mubidaha.

³¹Nae, mu bweyaango bw'ebyo, eng'we mukoonyerese Obwaami bwae, mani ebiindu bino byosi biba bichia ohuba ebyeeng'we.

³²“Mutatya daawe, eng'we baana baange, olwohuba Seeng'we musangaafu ohubaberesa Obwaami.

³³Mukuse emyaandu kyeeng'we, mukabe abamanani; mwenyoolere emifuuko chitakofula, neende obuyiinda buli Muukulu obutanyaasiha, yi mwiibi yeesi atanyala ohwoola, haandi bu mbungi chitanyala ohunyaasa.

³⁴Olwohuba yi mwaandu kwao kuba, ao niwo yi mwooyo kwao kwosi kuba.

³⁵ “Mwefwaalire elalira, haandi mulehe amataara keeng'we nikaaduha,

³⁶ mani mube koti abahalaabani bali meeso baliindire omwaami waabwe ohukobola ango n'atula hu sidyaalo sy'obweeya, banyale ohumwiikulirao olwiiki bwaangu niyoola sa ati yahong'oonda.

³⁷Bali neende ehabi abahalaabani abo ba mwaami waabwe yeecha yakaana nibali meeso; mbaboolera obwadyeeri endi, aba achia ohweboya bulai, mani ababoole beehale hu meesa ohulya, mani omweene yeeche abakabwe.

³⁸Nikali mbwe yeecha mu saa yohubiri, oba mu yohudatu, mani yabakaana nibali batyo, abahalaabani abo baba bali neende ehabi!

³⁹ Nae muhoyere ohumanya sino muti, omweene nyuumba aba niyamanya ebiha byeene bi mwiibi yeecheramo, aba [21]

⁴⁰Mani eng'we mwesi, muhoyere ohuba meeso; olwohuba Omwaana w'Omuundu achia ohwiicha mu siha syatabasirisirwamo.”

⁴¹Petero yaboola ati, “Omwaami, olukaado luno, oli ohulukaadira efwe, kose abaandu boosi?”

⁴²Nae Omwaami yaboola ati, “Muliindi siina omweesikwa haandi omukesi, yi mwaami wae yahadiisa edaala lyae, neende ohukabulira abaandu bamwo omukabo kwaabwe mu biha bihoyere?

⁴³Ali neende ehabi omuhalaabani oyo, yi mwaami wae yeecha yamwakaana naahola esyo sy'ahoyere ohuhola.

⁴⁴Mbaboolera obwadyeeri endi, aba achia ohumudiisa ebiindu byae boosi.

⁴⁵Nae omuhalaabani oyo niyeecha yeboolera omweene ati, ‘Mbao ngandi omwaami waange anahiinde ohwiicha,’ mani yachaaka ohuhuya abahalaabani baasye basaacha neende abahasi, mani yachaaka ohulya neende ohung'wa nameera,

⁴⁶omwaami w'omuhalaabani oyo achia ohwiicha hu ludaalo lu muhalaabani oyo atamubaasirisiramo haandi hu siha syatamanyire, mani aba achia ohumusaandya, [22] mani amale amute alala neende abataali abeesikwa.

⁴⁷Nae omuhalaabani oyo owamanya si mwaami wae adaha, nae yahaya ohwetekeha, kata ohuhola koti lu mwaami wae adaha, achia ohutoochwa muno.

⁴⁸Nae omuhalaabani oyo owali nataamanyire si mwaami wae adaha, mani yahola esyo esyahakera yahuywa, aba achia ohuhuywa budiidi. Buli muundu yeesi, obereswa ebiindu biingi, achia ohudahibwaho ebiingi; nae oyo yibabihisa ebiindu biingi bihira hoo, bachia ohumubaanja ebiingi bihira hoo.

⁴⁹“Ese ndeecha ohwaadusa omuliro hu syaalo; haandi kuba kwamala ohuwaamba!

⁵⁰ Ndi neende embatiisa yi hoyeere ohubatiisibwamo; haandi sinjuuna muno ohwoola lu syaholereere!

⁵¹Mubaasa muti ese ndeecha ohuleeta omuleembe hu syaalo? Haba bbe, mbaboolera endi, ndeecha ohuleeta ohukabuhana;

⁵²mani ohutula bulaanu neende ohwemdeeda mu moni, mu nyuumba ndala y'abaandu bataanu, muchia ohubaamo ohukabuhana, badatu bachia ohukabuha hu babiri, haandi babiri bakabuhe hu badatu;

⁵³ abaandu bachia ohukabuhanamo, laatang'ene akabuhane neende omwaana wae, omusyaani akabuhane neende laatang'ene, ng'ina akabuhane neende omuhaana wae, haandi omuhaana akabuhaane neende ng'ina, masaalang'ene akabuhaane neende muhoomwaana wae, muhoomwaana akabuhaane neende masaalang'ene.”

⁵⁴Yesu haandi yeecha yaboolera esidiiyiha sy'abaandu esyo ati, “Eng'we nimubona esireesi nisisiingiriire emuumbo, muboolaanga bwaangu-bwaangu muti, ‘Efula mbao yicha’; mani nibiba bityo.

⁵⁵Nae nimubona omuyaka kutulira emwaalo nikuwuucha, muboolaanga muti, ‘Omubasu kw'amaani kuchia ohufwa’; mani nibiba bityo sa.

⁵⁶Abebachirisi eng'we! Mumanyire bulai muno ohulakula emboneha y'esyaalo, neende ey'ekulu; nae lwasiina haba simumanyire ohutotola ebiha bya bulaanu buti?

⁵⁷“Nae lwasiina abeene simunyala ohweheengerao esiba nisihoyera ohuholwa?

⁵⁸Nooba nooli ohuchia neende ohuyiingania eyiri omukayi, teemaho koti lu onyala, owuliirisaanie nae nimusiiri hu ngira, ataali ao, achia ohuhuhwehweesa ahwoose eyiri omukayi, mani omukayi oyo amale ahudiise omusikaari muhoongo, nae omusikaari oyo amale ahusukune mu jeela.

⁵⁹Mbaboolera endi, haba s'ochia ohutulamo n'osisiiri ohutungira elalira ehela yimaliirihayo.”