Read saamia Luka 13 Bible Online

Luka 13 - saamia bible

Luka 13

¹Esiha syeene esyo, baliwo abaandu baandi ababoolera Yesu ebidiira hu Bagalilaaya ba Pilato yasasaania amabaanga kaabwe neende ebiyaanwa byaabwe bi bali bayirira Nasaae.

²Nae Yesu yakobolamo ati, “Mubaasa muti Abagalilaaya bano bali abahola-mbi ohuhiraho Abagalilaaya baandi hu beemeo basaandisibwe batyo?

³Mbaboolera endi, Haba daawe; nae ohutusaho nimuteyolobya, mwesi muchia ohusihirira mutyo.

⁴Oba, abaandu ehumi-na-bataanu-na-badatu ba omunara kwe Siloamu kwakwaaho mani kweeta, mubaasa muti bali abahola-mbi muno ohuhiraho abaandu baandi boosi abali bamenya mu Yerusalemu?

⁵Mbaboolera endi, Haba daawe; nae nimuteeyolobya, mwesi muchia ohusihirira mutyo.”

⁶Mani Yesu yeecha yabakaadira olukaado luno ati, “Waliwo omusaacha wuundi owataaka omusaala kw'enduli mu ndalo yae; olwoola omusaacha oyo yeecha nakoonyaho ebyaamo, nae yahaya ohwakaanaho esyaamo syoosi.

⁷Mani omusaacha oyo yalaanga omulimi w'endaalo eyo, yamuboolera ati, ‘Bone, ndaheecha ano emyaaka kidatu kino kyoosi ningoonyaanga hu mutuli kuno esyaamo, nae haba sinyolaangaho esiindu syoosi. Mani bulaanu kuteme kukwe aasi; olwohuba simbona esikera nikuchiiririra ohunyaasa eloba lino?’

⁸Nae omulimi oyo yamukobolamo n'amuboolera ati, ‘Omuhuluundu, kulehe kubeeo omwaaka kuno kwosi, ngwaakeho mu sisina kweebodoohanie, male kuteeho embolera.

⁹Mani nikwiichuhana kwaamaho omwaaka kwiicha, siba sinaba esilai; nae nikuhaya ohwaamaho, bulaanu onyala ohukutema kwaakwa aasi.’ ”

¹⁰Olwoola, Yesu yali niyeekesa mu sinagoogi yiindi hu ludaalo lwa Sabbaato.

¹¹Mani mu bweene omwo, mwalimo omuhasi wuundi owali aliho esihyeeno syamulemya hulw'embaka y'emyaaka ehumi-na-kitaanu-na-kidatu; yali niyefuumbamo omukoongo, n'atanyala kata ohweema n'akololoohe.

¹²Yesu niyamubona ati, yamulaanga mani n'amuboolera ati, “Muhasiing'ene, omalire ohuwonisibwa obulema bwao.”

¹³Yesu yamwiisaho amahono kae, mani abweene-na-bweene ao, omuhasi oyo yaakololoha, mani yachaaka ohufumia Nasaae.

¹⁴ Nae omwimirisi wa sinagoogi eyo, yeechula etima liingi olwohuba Yesu yali awoniisye hu ludaalo lwa Sabbaato, yaboolera abaandu ati, “Aliwo endaalo chisaasaba echihoyere ohuholerwaho emirimo; mani mwiicheenge hu ndaalo echo muwonisibwa, nae mutechaanga hu ludaalo lwa Sabbaato.”

¹⁵Nae Omwaami yamukobolamo ati, “Abebachirisi eng'we! Mweeng'we mweesi, naanu otaboololaanga endaawu yae kata esuhiri yae hu ludaalo lwa Sabbaato ayitusa mu sidwooli, mani ayiyira ohung'wa?

¹⁶Nae omuhasi wuno, omuhaana wa Abburahamu, yi Sitaani yaboya hulwa embaka ye myaka ehumi-na-chitaanu-na-chidatu, haba s'ahoyera ohuboololwa obuboye buno, hu ludaalo lwa Sabbaato?”

¹⁷Yesu niyalomaloma sino, abasuku bae boosi esoni chabadiira muno; nae abaandu baliwo boosi bachaaka ohwehoya hulw'ebiindu by'oluyaali byoosi bi Yesu yali n'aholere.

¹⁸Yesu yaboola ati, “Obwaami bwa Nasaae bufwaanana neende siina? Haandi ndabukerananie hu siina syeene?

¹⁹Bufwaanana neende olumwo lw'omutuumba lu muundu wuundi yabukula yacha yataaka mu ndalo yae; mani lweechula lwahula, lweehola omusaala muhoongo, mani amayoni kabburuha keecha koombaha ebiyu mu masaga kakwo.”

²⁰Yesu haandi yaboola ati, “Siina syeene sindaakeraanieho obwaami bwa Nasaae?

²¹Bufwaanana neende amamera ka omuhasi wuundi yabukula mani yaacha yasaasa mu lita amahumi kane ech'obusye, ohwoola lu bwoosi bwebbaaha bwafwiimba bulai.”

²²Yesu yakeenda naabitira mu biko neende mu ngoongo, niyeekesaanga, haandi naali hu lukeendo naachia Yerusalemu.

²³Mani omuundu wuundi yeecha yamuboolera ati, “Omwaami, abaandu bachia ohuwonisibwa bahabe sa abayeraanu?” Yesu yababoolera ati,

²⁴“Muteemeho muno ohwiingirira mu mulyaango mudiiyu; olwohuba mbaboolera endi, abaandu baangi bachia ohuteemaho ohwiingira nae haba sibachia hunyala.

²⁵Mani omwenengo niyahasiingire, mani yekalawo olwiiki, muchia ohweema erwaanyi muchaake ohuhong'oonda hu lwiiki nimuboola muti, ‘Omwaami, twiikulireo.’ Nae achia ohubakobolamo ati, ‘Ese haba siimanyire yi mutula daawe.’

²⁶Nae mwahachaake ohuboola muti, ‘Efwe hwalichaanga haandi hwang'wechaanga mu moni wao, haandi weekesaanga mu makira keefwe.’

²⁷Nae achia ohuboola ati, ‘Mbaboolera endi, ese haba siimanyire yi mutula daawe; mumbweere-eyi, eng'we mweesi abahola-mbi!’

²⁸ Eyo niyo yi muchia ohulirira nimweesia ameeno, nimubona Abburahamu neende Yisaka neende Yakobbo neende banabbi boosi mu Bwaami bwa Nasaae nae eng'we abeene nimusukuunwe erwaanyi.

²⁹Mani abaandu bahatule ebukwe neende emuumbo, haandi neende emukulu neende emwaalo, mani beehala hu meesa mu Bwaami bwa Nasaae.

³⁰ Mani bone, aliwo abaandu bamaliirihayo bulaanu abachia ohutaangiramo, haandi aliwo abataangiramo bulaanu, abachia ohumaliirihayo.”

³¹Esiha syeene esyo, Abafarisaayo baandi beecha, mani baboolera Yesu bati, “Tula ano oweeo, olwohuba Herode adaha ohuhwiita.”

³²Nae Yesu yababoolera ati, “Muchie muboolere ebbwe elyo muti, ‘Bona, ese njirusa emisaambwa haandi monia abaandu enyaanga yino neende muchuli, nae oludaalo lwohudatu maliirisa omulimo kwaange.

³³Nae kata katyo ndi neende ohuchiiririra neende biindi ohuhola, enyaanga yino neende muchuli, neende oludaalo luloondaho; olwohuba sisinyalihana ohuba mbwe, omunabbi afwiira erwaanyi w'esiko sya Yerusalemu.’

³⁴Eee eng'we abe Yerusalemu, ohwiitaanga banabbi neende ohuhuyaanga amakina abo ababa nibabatumiirwe! Nga ndekoomba ohubuusa alala abaana beeng'we koti lu ngoho yibuusanga obumwiinyu bwayo mu mbaya chayo, nae haba simunyaliha daawe!

³⁵ Bone, enyuumba yeng'we yebwabirwe. Haandi mbaboolera endi simuchia ohumbonaho, ohwoola lu mwahaboolere muti, ‘Ali neende ehabi oyo owiicha mu liita ly'Omwaami!’ ”