Read saamia Luka 14 Bible Online

Luka 14 - saamia bible

Luka 14

¹Olwoola, hu ludaalo lwa Sabbaato luundi, Yesu yacha mu nyuumba ya mulala hu beemirisi Bafarisaayo, nae niyali naalya, abaandu baandi bachaaka ohumwewunja.

²Mani bone, omusaacha wuundi owali niyafwiimba amakulu neende amahono yeecha yi Yesu yali.

³Yesu yaalomaloma neende abeekesa b'Amalako neende Abafarisaayo n'aboola ati, “Mani sifukiirirwa ohuwonia hu ludaalo lwa Sabbaato, kose haba?”

⁴Nabo bauleera sa. Mani Yesu yabukula omusaacha oyo, mani yamuwonia, mani yaamuleha yawaao.

⁵ Mani Yesu yababoolera ati, “Wiina mweene hweeng'we, oli neende omwaana wae, [23] oba naakwiire mu buko otahatulaniramo yaachia yaamuhwesa yamutusamo hu ludaalo lwa Sabbaato?”

⁶Nabo sibanyala ohumukobolamo mu sino.

⁷Bulaanu, Yesu niyabona engeri yi bakeni balaange bali nibedoolera obwiihalo bw'oluyaali luhoongo, yabakaadira olukaado n'ababoolera ati,

⁸ “Nooba n'olaangirwe hu sidyaalo sy'obweeya, otachichaanga wehala mu bwiihalo bw'oluyaali luhoongo muno, olwohuba oyo ohulaangire anyala ohuba n'alaangire omuundu wuundi ohuhirira elalira oluyaali;

⁹mani oyo obalaangire mweembi anyala ohwiicha yahuboolera ati, ‘Ewe yikulira wuno obwiihalo obwo,’ mani bulaanu ochia ohudiirwa esoni n'osiingira nochia ohwiihala mu bwiihalo bw'oluyaali lwa aasi muno.

¹⁰Nae nooba n'olangirwe, chichaanga wihala mu bwiihalo bw'oluyaali lwa aasi muno, hu bulaanu obalaangire niyeecha, anyale ohuhuboolera ati, ‘Mwiicha waange, siingira ochie wihale aakulu;’ mani oba ochia ohunyoola oluyaali mu moni ch'abaandu boosi ababa nibehaale naawe hu meesa.

¹¹ Olwohuba buli muundu weniinia omweene achia ohuloongoyaswa, nae oyo oweloongoyasa omweene, achia ohuniinisibwa.”

¹²Yesu yaboolera omuundu wali amulaangire yesi ati, “Nooba n'okabula abaandu ohulya oba hu sidyaalo, otalangaanga abeecha bao, noomba bamwaanaamao, oba abanaluyia bao, oba abasibirana naawe banyali, olwohuba bano bosi banyala ohuhulaanga oludaalo luundi, mani bahutuunga.

¹³Nae nooba n'okabula esidyaalo, langaanga abamanani, neende abadiimbe, neende abalema, neende abawofu,

¹⁴mani ao niwo y'ochia ohunyoolela ehabi, olwohuba abo haba sibanyala huhutuunga. Ochia ohutungwa hu ludaalo lu boolerefu bachia ohusyuuhiraho.”

¹⁵Nae bulaanu mulala hu baandu bali nibehaale neende Yesu hu meesa, niyawulira sino yamuboolera ati, “Ali neende ehabi oyo owahalye omugaati mu bwaami bwa Nasaae!”

¹⁶Nae Yesu yamuboolera ati, “Olwoola, omusaacha wuundi yakabula esidyaalo sihoongo muno, mani yalaanga abaandu baangi muno ohwiicha;

¹⁷mani esiha sy'esidyaalo nisyoola, yeecha yaatuma omuhalaabani wae achie aboolere abaandu bali balaangirwe ati, ‘Mwiiche; olwohuba buli siindu sidahibwa simalire ohutekehwa.’

¹⁸Nae boosi bachaaka buli mulala ohwelira-bwelira. Owataangira yamuboolera ati, ‘Ese bulaanu hu ngulire omukuunda, mani hoyeere njie kuboneho; hwekongooyere muno wundehere obuteecha.’

¹⁹Haandi owuundi yaboola ati, ‘Ese bulaanu hundaakulire endaawu chirima emikoondo kitaanu, mani hoyeere njie mbone koti lu kirima; mani hwekongooyere muno wundeheremo obuteecha.’

²⁰Haandi owuundi yaboola ati, ‘Ese bulaanu hundaadehiisye omuhasi, mani haba sinyala ohwiicha.’

²¹Mani omuhalaabani oyo yeecha yaakobola mani yaboolera omwaami wae atyo. Mani etima lyadiira omwenengo oyo mani yaboolera omuhalaabani wae oyo ati, ‘Cha bwaangu hu makira neende hu myaanda chiri mu siko sihoongo, mani oleete abamanani, neende abadiimbe, neende abawofu, neende abalema.’

²²Mani omuhalaabani oyo yaboola ati, ‘Omuhuluundu, ebyo byoosi biwumboleere ohuhola, mbyosereese endyo, nae haandi obweyaango buundi busiidoong'ereo.’

²³Nae omwaami oyo yaboolera omuhalaabani oyo ati, ‘Tula mani ochie hu ngira hoongo choosi, neende otukira tudiidi twoosi, mani oleete abaandu beengire beechule enyuumba yaange.

²⁴Olwohuba huboolera endi, [24] abulao omuundu yeesi hu baandu bali balaangirwe ochia ohuhoombaho hu sidyaalo syaange.’ ”

²⁵Bulaanu, ebidiiyiha bihoongo biindi byeecha byachiana neende Yesu; yakaluhaana yaababoolera ati,

²⁶ “Omuundu yeesi owiicha yi ndi, saanyala ohuba omweeki waange ohutusaho n'ataangire mberi ohusyuula laatang'ene mweene neende ng'ina neende omuhasi wae, neende abaana bae, neende bamwaanang'ina, neende bamboochong'ene, eee, neende kata obulamu bwae bweene.

²⁷ Oyo yeesi otanyala ohukiinga omusalabba kwae kweene, mani yanoonda, haba saanyala ohuba omweeki waange.”

²⁸Olwohuba, wiina mweene hweeng'we, oba n'adaha ohwombaha omunara, otataangira mberi yehala aasi, mani yabaliirira obuungi bw'ebiindu bidahibwa, yabona oba ali neende ebiindu bimala ohwombaha omunara kwawa?

²⁹Ataali ao, naamala ohwombaha omusiingi, mani byeecha byamuhaya ohumaliirisa, abo boosi abakubona, baba banamucheha,

³⁰nibaboola bati, “Omuundu wuno yachaaka ohwombaha nae siyanyala ohumaliirisa.”

³¹Oba mutuki siina, oba naachia ohulwaana neende omutuki wuundi, atataangira mberi yehala aasi, yabaliirira bulai naali neende abalwaani elifu ehumi (10,000) n'anyala ohuyingira oyo omuseeta neende abalwaani elifu amahumi kabiri (20,000)?

³²Mani naabona ati sibinyaliha, atuma bawamwaanda basabe ohuwuliirisania babe neende omuleembe, omutuki waasye oyo n'asisiiri eyale muno.

³³Mani sakira, oyo yeesi mweeng'we otebwaaba byoosi byali nabyo, saanyala ohuba omweeki waange.

³⁴“Omuunyu mulai nikwo; nae omuunyu nikuwaamo echamu lyakwo, kunyala ohukaluswamo kutye echamu elyo?

³⁵Kubula obuhoonyi bwoosi hu loba, oba hu mbolera yosi; kusukunwa sa eyale. Oyo oli neende amatwi kawulira, leha awuliire.”