Read saamia Luka 15 Bible Online

Luka 15 - saamia bible

Luka 15

¹ Olwoola, abatoosa b'emisolo neende abahola-mbi boosi bachaaka ohwiicha eyiri Yesu ohuwulira bi yekesa.

²Nae Abafarisaayo neende abaandiiki b'Amalako bachaaka ohweng'ulung'uunya nibaboola bati, “Omusaacha wuno yakaanira abahola-mbi haandi yaalya nabo.”

³Mani Yesu yabakaadira olukaado luno ati,

⁴“Mundu siina hweeng'we, oba neende amakoondi kae emia ndala, mani lala hu ako lyakota, otahalehao amahumi kataanu-na-kane neende kataanu-na-kane kala mu saa, mani yacha yakoonya lala lira eliba nilikotere, ohwoola lwalyakaana?

⁵Mani n'alyakaana, alikiinga hu mabeka kae, niyehoya.

⁶Nae niyoola engo, alaanga abeecha bae alala neende abaasye, n'ababoolera ati, ‘Mwiiche hwehoyere alala, olwohuba malire ohwakaana ekoondi lyaange libeere likotere.’

⁷Mbaboolera endi, mu ngeri nasilala yityo, nilwo lu mwehoyo muungi kuchia ohuba Muukulu hulw'omuhola-mbi mulala oweyolobya ohuhira abaandu baluungifu amahumi kataanu-na-kane neende bataanu-na-bane abatadaha ohweyolobya.

⁸“Oba muhasi siina, oba neende eseende mwaamwa ch'efeesa ehumi, [25] mani yaakosa emwaamwa ndala eyo, otawaambya etaara, yeeya bulai bweene enyuumba yoosi n'akoonya, ohwoola lwayakaana?

⁹Mani naamala ohuyakaana, alaanga abeecha bae alala neende abaasye, n'aboola ati, ‘Mwiiche hwehoyere alala, olwohuba njakaanire eseende y'emwaamwa yaange eyali niyikotere.’

¹⁰Mbaboolera endi, mu ngeri nasilala yityo, niyo yi bamalaika ba Nasaae lubeehoyera omunooni mulala oweyolobya.”

¹¹Yesu haandi yaboola ati, “Olwoola, yaliwo omusaacha wuundi owali neende abasyaani bae babiri;

¹²mani omusyaani muyere yeecha yaboolera laatang'ene ati, ‘Laata, mberese esiha sino omukabo kwaange kw'obuyiinda kuwahaamberese n'ofwiire.’ Mani saabwe yabakabaniamo obuyiinda bwae.”

¹³Nae endaalo endiidi muno nichabitao, omusyaani muyere oyo yabuusa alala ebiindu bi yali nabyo byoosi, mani yadiira olukeendo yacha mu syaalo sy'eyale muno, mani yachakia-chakira eyo obuyiinda bwae bwoosi mu bulamu bw'ohuchakala.

¹⁴Mani niyamala ohwehoonyera buli siindu si yali nasyo, enjala nyiingi muno yeecha yaakwawo mu syaalo esyo, ohwoola luyadoong'a naabulaho esiindu syoosi.

¹⁵Mani yacha yaamenya neende mulala hu baandu bomu syaalo esyo, owamutuma achie mu mikuunda chae amuliisire embiichi.

¹⁶Yoola ohwekoomba ohulya [26] ebyoola bi mbiichi chalichaanga; nae abulao omuundu yeesi owamuberesa esiindu syoosi.

¹⁷Nae niyekaluhaho, yabaasa omweene n'aboola ati, Nae baanga hu bahalaabani ba laata yaange yapaangisa abali neende emigaati chibalya haandi chadoong'aho, nae ese ndi ohufwiira ano enjala!

¹⁸Ese njia ohusiingira mani njie eyiri laata, mani njia ohumuboolera endi, “Laata, ndakosa mu moni w'Ekulu neende mu moni wao;

¹⁹Sisihoyera ohulaangwa, omwaana wao; nae mbukule sa koti mulala hu bahalaabani bao bapangise.”

²⁰Mani yasiingira yakaluha eyiri laatang'ene. Nae niyali n'asisiiri eyale, laatang'ene yamubona mani yaamukwiira esisa, yeeruha yacha yamubukaanira yaamukwa mu sirifu.

²¹Nae omusyaani oyo yamuboolera ati, “Laata, ndakosa mu moni w'Ekulu neende mu moni wao; Sisihoyera ohulaangwa omwaana wao.”

²²Nae laatang'ene yaboolera abahalaabani bae ati, “Muleete bwaangu engubo yihiramo obulai, mani mumufwaase; haandi mumuteeho engila hu muhono, haandi mumufwaase ebiraato mu makulu;

²³muchie muleete emoosi nginu muyiite, mani lehe hulye hwesangaase;

²⁴olwohuba omwaana waange wuno yali yafwa, nae bulaanu mulamu; yali yakota, nae bulaanu abonehane.” Mani bachaaka ohwesangaasa.

²⁵Nae bulaanu, omwaana wae muhuluundu yali naali mu mukuunda; mani niyali naakobola, yoola aambi neende edaala, yawulira abaandu nibeemba haandi nibahina.

²⁶Mani yalaanga mulala hu bahalaabani yamuteeba ati, “Siina syeene ebikwiireo?”

²⁷Nae yamuboolera ati, “mwaanamaao yeechere, mani lataao amwitiire emoosi nginu, olwohuba amwakaanire naali omulamu abweene.”

²⁸Nae yaanyoolera muno, mani yaahaya ohwiingira mu daala. Nae laatang'ene yaatula erwaanyi yacha yamwekweeda yengire,

²⁹nae yakobola mu laatang'ene ati, Bonaho, ese huhalaabaniire sa koti omuhalaabani muwaambe emyaaka kino kyoosi, haandi kata sindahalakaho amalako kao daawe; nae osisiiri kata ohumbaaho sa ahameeme hoong'ene, nyale ohwesangaasaho neende abeecha baange.

³⁰Nae omwaana wao wuno, owanyaasa omwaandu kwao neende abacheke niyeechere, ewe omwiitire emoosi nginu!

³¹Nae yamuboolera ati, “mwaana waange, buli siha oli naange ano, ebiindu byaange byoosi byao nibyo.”

³²Mani sibeere esilai muno hwesangaase haandi hwehoye, olwohuba mwaanamaao wuno yali yafwa, nae bulaanu mulamu; yali yakota, nae bulaanu abonehane.