Read saamia Luka 17 Bible Online

Luka 17 - saamia bible

Luka 17

¹Haandi Yesu yeemao yaboolera abeeki bae ati, “Amateemo kakera omuundu yonoona [30] kachia ohubaao; nae chimwakaanire oyo okaleeta!

²Syahamubereere esilai ohuboyebwa mu kosi wae ekina hoongo libasyeraangaho, mani yamala yaasukunwa mu nyaanja, ohuhira lwaakera mulala hu baana bayere bano, yonoona. [31]

³ Mani mweliinde abeene; mwaanamaao nahwonoonera, mweekese esyonoono sy'aba naaholere, nae niyeyolobya, mulehere;

⁴nae nahwonoonera amahabi kataanu-na-kabiri mu ludaalo lulala, haandi yakobola yooli amahabi kataanu-na-kabiri, n'aboola ati, ‘Ndeeyolobya,’ ohoyere ohumulehera.”

⁵Abatume beecha baboolera Omwaami bati, “Twongese efukiirira!”

⁶Nae Omwaami yaboola ati, “Muba muli neende efukiirira yaakana neende olumwo lw'omutuumba, mwahaboolere omusaala muhuyu kuno muti, ‘Weyiye, mani ochie wetaake mu nyaanja,’ mani kwahabawuliire.

⁷“Ali hoo hweeng'we, oli neende omuhalaabani olima oba owaaya amakoondi, onyala yamuboolera niyaheenuha ati, ‘Yicha bwaangu wihale hu meesa olye’?

⁸Oba n'atamuboolere ati, ‘Taangira mberi wundekehere esy'engoloobe, omale weterese bulai mani wiche wuninde, male ohulya neende ohung'wa; luunyuma wesi hu ochie olye haandi hwoong'we’?

⁹Mani omwenengo oyo, anyala yebasa omuhalaabani oyo olwohuba aholere syaatumirwe ohuhola?

¹⁰Mani mwesi, nimuba nimuholere ebyo byoosi bi mutumirwe ohuhola, muboleenge muti, ‘Efwe huli sa abahalaabani abatahoyera; huholere sa ebiindu bi huhoyere ohuhola.’ ”

¹¹Yesu niyali hu lukeendo ohuchia Yerusalemu, yabitira hu lwaaho lukabuhania esyaalo sya Samaria neende esya Galilaaya.

¹²Mani niyali huyaheengira mu lukoongo luundi, yabukanana neende abasaacha bageeng'e ehumi. Beyaaba beemaho eyale nae

¹³mani behuuma nibaboola bati, “Omwaami Yesu, tukwiire esisa.”

¹⁴ Nae Yesu niyababona, yababoolera ati, “Eng'we muchie mweyekese eyiri abalaamisi.” Mani nibali hu bachia, baonisibwa.

¹⁵Nae mulala hu abo, niyabona ati amalire ohuwona, yakaluuhana yacha eyiri Yesu naafumia Nasaae mu kono ly'aakulu;

¹⁶mani yaakwa, yafumama aasi mu makulu ka Yesu, namwebasa muno. Bulaanu, omusaacha wuno yali Omusamaria.

¹⁷Yesu yeecha yaboola ati, “Abaandu baonisibwe, haba sibabeere ehumi? Nae bataanu-na-bane bali yeena?

¹⁸Abulao owahakoboole ohufumia Nasaae ohutusaho omuteende wuno?”

¹⁹Yesu yeecha yamuboolera ati, “Siingira mani ochie y'ochia; efukiirira yao yihuwonisye.”

²⁰Abafarisaayo nibateeba Yesu lu Bwaami bwa Nasaae bucha ohwiichira, Yesu yakobolamo ati, “Obwaami bwa Nasaae haba sibuchia ohwiicha neende ebilolero buboneha;

²¹oba, sibahaboole bati, ‘Eee, mbano buli ano!’ Oba bati, ‘Mbula buli era!’ Olwohuba bone, Obwaami bwa Nasaae buli akatikaati weeng'we.” [32]

²²Yesu yaboolera abeeki bae ati, “Endaalo chiicha, lumwahekoombere ohubonaho hu ludaalo lulala lw'Omwaana w'Omuundu, nae simuchia hulubona.

²³Mani bahababoolere bati, ‘Eee, mbao buli era!’ Oba, ‘Eee, mbano buli ano!’ Nae mutachia, mutabaloondaho.

²⁴Olwohuba, koti lu lumesu lumyesuhaanga mani luhosa ekulu ohutula hu lwaande lulala ohwoola hu lwaande luundi, nilwo lu Omwaana w'Omuundu achia ohuba hu ludaalo lwae. [33]

²⁵Nae ahoyere ohusaandisibwa mberi mu biindu biingi muno, haandi yebwabwe neende olwiibulo luno.

²⁶ Koti lu byali mu ndaalo cha Nowa, nilwo lu bichia ohuba mu ndaalo ch'Omwaana w'Omuundu.

²⁷ Abaandu bali nibalichaanga, nibang'wechaanga, nibadeehyaanga, haandi nibadehaanga, ohwoolera elalira hu ludaalo lu Nowa yengirira mu lyaato, mani amaachi k'ofwomboole keecha kabasihirisa boosi.

²⁸ Haandi nasilala koti lu byali mu ndaalo cha Looti, abaandu balichaanga, bang'wechaanga, bakulaanga, bakusaanga, bataakaanga, boombahaanga,

²⁹nae hu ludaalo lu Looti yatuhiraho mu Sodomu, omuliro neende enjeserye byakwa ohutula Muukulu mani byabasihirisa boosi.

³⁰Haandi nilwo lu sichia ohuba hu ludaalo lu Omwaana w'Omuundu yahabonehere.

³¹ Hu ludaalo olwo, leha oyo oli hu sirama sy'enyuumba, yi biindu byae biri mu nyuumba, ahaye ohwiiha aasi ohubibukula; haandi nasilala, leha oyo oli mu ndalo ahaye ohukobola engo.

³² Mwiichulise omuhasi wa Looti.

³³ Oyo yeesi okoonya ohuliinda obulamu bwae, achia ohubufwiirwa, nae oyo ofwiirwa obulamu bwae, achia ohubuliinda.

³⁴Mbaboolera endi, mu siro esyo, abaliba babiri hu sitaanda silala; mulala yahayirwe, nae owuundi alehwe.

³⁵Abahasi babiri abalibechaanga alala nibali ohusya; mulala aliyirwaangwa nae owuundi alehwa.” [

³⁶Abasaacha babiri abahabecheenge mu ndalo; mulala aliyirwaangwa, nae owuundi alehwa.]

³⁷Nae abeeki bae baboolera Yesu bati, “Omwaami, yeena bweene?” Nae yababoolera ati, “Yi mubiri kuba, niyo yi ngosya chahebuusira alala.”