Read saamia Luka 18 Bible Online

Luka 18 - saamia bible

Luka 18

¹Haandi Yesu yeecha yabakaadira olukaado luundi, olweekesa luti bahoyere ohwekongoyaanga Nasaae buli siha, batawaamo omwooyo.

²Yaboola ati, “Mu siko sihuluundu siindi, yaliwo omukayi w'emisaango wuundi, otaali niyatya Nasaae haandi otabaasaho hu muundu wuundi yeesi;

³nae yosi yaliyo omuhasi mufwiirwe wuundi mu siko sihuluundu esyo, owali yedinya ohumwichaangaho n'aboola ati, ‘Hoonye mani wuheengere omusaango hire abasuku baange.’

⁴Nae yahayaho hulw'esiha sidiidi; nae luunyuma yeeboolera omweene ati, ‘Ndahaba mbwe ese haba siitya Nasaae kata neende nitadeeba hu muundu yeesi,

⁵nae olwohuba omuhasi mufwiire wuno ali ohunyaasa-nyaasa, njia ohumuhoonya, ataali ao aba achia ohunjoong'ya neende ohunonderesa hwae.’ ”

⁶Omwaami yaboola ati, “Wulireho bi mukayi w'emisaango otaali omuluungifu by'aboola.

⁷Nae Nasaae salikwiira abalobole bae, abamulirira esiro neende esideete? Mani aba achia ohuhiinda muno ohubahoonya?

⁸Mbaboolera endi achia ohubakwiira bwaangu muno. Kata katyo, Omwaana w'Omuundu niyaheeche, mani achia ohwakaana efukiirira hu syaalo?”

⁹Yesu yaboolera abaandu baandi olukaado luno, abali nibemanyire abeene bati bali aboolerefu mani nibalekeeresaanga abasyaabwe, ati:

¹⁰“Olwoola, abasaacha babiri bachia mu Nyuumba ya Nasaae ohulaama. Mulala yali Omufarisaayo nae owuundi yali omutoosa w'emisolo.

¹¹Omufarisaayo yema mani yesabira omweene n'aboola ati, ‘Nasaae, hweebasa muno olwohuba siindi koti abaandu baandi, abang'uusi, ababacha, abacheke, kata siindi koti omutoosa w'emisolo wuno.

¹²Siiba habiri hu juma, ngaba silala sy'ehumi sya buli siindu si nyoola.’

¹³Nae omutoosa w'emisolo yeema eyale, n'atanyala kata ohusiingisa emoni chae yalingaala Muukulu, yachaaka ohw'ehubba mu sirifu n'aboola ati, ‘Nasaae, ngwiire esisa, ese omuhola-mbi!’

¹⁴Mbaboolera endi, omusaacha wuno yakobola engo wae naali omwoolerefu mu moni wa Nasaae ohuhira Omufarisaayo wula; olwohuba buli muundu yeesi oweniinia achia ohwiiswa aasi, nae oyo yeesi oweyisa aasi, achia ohuniiniswa.”

¹⁵Bulaanu, abaandu bachaaka ohuleeta abaana bayere eyiri Yesu abadiireho neende amahono kae; nae abeeki bae nibabona sino, beecha baabakayira.

¹⁶Nae Yesu yabalaanga beeche yali n'aboola ati, “Mulehe abaana beeche yi ndi, haandi mutabakayira; olwohuba, abali bati, nibo abeene bwaami bwa Nasaae.

¹⁷Mbaboolera obwadyeeri endi, oyo yeesi otakaanira obwaami bwa Nasaae koti omwaana muyere haba saachia hubwiingiramo.”

¹⁸Omutuki wuundi yateeba Yesu ati, “Ewe omweekesa mulai, siina syeene sihoyera ohuhola hu nyoole obulamu butaakama?”

¹⁹Nae Yesu yamuboolera ati, “Lwasiina wunaanga oti omulai? Abulao omuundu mulai ohutusaho Nasaae yeeng'ene.

²⁰ Omanyire amalako kano: ‘Otaholaanga obucheke, Otetaanga, Otebaanga, Otatusaanga obuloli bw'obubacha, Yisaanga mu lataao neende maao oluyaali.’ ”

²¹Nae yaboola ati, “Bino byoosi, ndabiloonda ohutula mubuyere bwaange.”

²²Mani Yesu niyawulira atyo, yamuboolera ati, “Osiibulwaho esiindu silala. Kusa ebiindu byao byoosi, mani okabe abamanani, mani ochia ohunyoola obuyiinda Muukulu; mani wiiche, wunonde.”

²³Nae oyo niyawulira atyo, yeecha yaanyoolera muno, olwohuba yali omuyiinda muno.

²⁴Nae Yesu yamulingaala mani yaboola ati, “Nga sidinyu muno abayiinda ohwiingira mu bwaami bwa Nasaae!

²⁵Syaangu muno engamia ohubita mu liina ly'esindaani, ohuhira omuyiinda ohwiingira mu bwaami bwa Nasaae.”

²⁶Nae abawulira sino beecha baboola bati, “Mani wiina mweene onyala ohuwonisibwa?”

²⁷Nae Yesu yaboola ati, “Esitanyalihana eyiri abaandu, sinyalihana eyiri Nasaae.”

²⁸Nae Petero yaboola ati, “Eee, efwe hwaleha amadaala keefwe mani hwahuloonda.”

²⁹Nae Yesu yababoolera ati, “Mbaboolera obwadyeeri endi, abulao omuundu yeesi, owaleha enyuumba, oba omuhasi, oba bamwaanang'ina, oba abeebusi, oba abaana, hulw'Obwaami bwa Nasaae,

³⁰otachia hunyoola amahabi maangi ak'ebyeene ebyo, mu biha bino, haandi neende obulamu butaakama mu ndaalo chiicha.”

³¹Yesu yabukula ehumi-na-babiri abo yabayira endulo, mani yababoolera ati, “Bone, mbano huli ohuchia Yerusalemu, mani buli siindu syoosi si banabbi baandiika hu Omwaana w'Omuundu sichia ohwolerera.

³²Olwohuba achia ohudiiswa Bateende, mani bamudyaabuhire, haandi bamuyire bubi, haandi bamufuucheho;

³³bachia ohumunaala ehoba, mani bamwiite, nae hu ludaalo lwohudatu, achia ohusyuuha.”

³⁴Nae abeeki bae haba sibanyala ohumanya bi yali naalomalomaho; olwohuba enomanoma yino yali yabakiswaho, mani bahaya ohudiira ebyali nibilomaloomwe.

³⁵Yesu niyoola aambi neende Yeriko, omusaacha muwofu wuundi yali yehaale hu ndulo w'engira nasabirisaanga,

³⁶nae niyawulira esidiiyiha sy'abaandu nisibita, yateeba esyali nisikwiireo.

³⁷Bamuboolera bati, “Yesu wa Nasareeti niye oli ohubita.”

³⁸Mani yachaaka ohulira n'aboola ati, “Yesu, mwaana wa Daudi, ngwiire esisa!”

³⁹Nae abo abali nibali mu moni wae bachaaka ohumuhabuhira nibamuboolera bati awuleere; nae yemeeda ohulirira mu kono ly'aakulu n'aboola ati, “mwaana wa Daudi, ngwiire esisa!”

⁴⁰Mani Yesu yeema, yaalagira ati bamuleete yali; mani niyoola aambi, Yesu yamuteeba ati,

⁴¹“Siina sy'odaha huholere?” Nae yaboola ati, “Omwaami, leha haandi nyale ohubona.”

⁴²Nae Yesu yamuboolera ati, “Chaaka haandi ohubona; efukiirira yao yihuwoniisye.”

⁴³Mani abweene-na-bweene ao n'achaaka ohubona, mani yaloonda Yesu n'aberesa Nasaae oluyaali; mani abaandu abo boosi nibabona sino, beecha baafumia Nasaae.