Read saamia Luka 19 Bible Online

Luka 19 - saamia bible

Luka 19

¹Yesu yacha yeengira mu Yeriko mani yali nasibitamo.

²Nae waliwo omusaacha wuundi olaangwa Sakayo; owali omutoosa w'omusolo, haandi omuyiinda muno.

³Mani yali n'adaha muno ohubona Yesu koti lu fwaana, nae haba siyanyala ohumubona ohweema hu buungi bw'abaandu, haandi yali omuundu mwiimbikiti muno.

⁴Yeemao yeeruha yaachia mu moni w'esidiiyiha sy'abaandu, mani yaniina hu muhuyu hw'anyale ohubona Yesu, owali achia ohubitira ebweene eyo.

⁵Nae Yesu niyoola abuundu ao, yalingaala aakulu mani yamuboolera ati, “Sakayo, yanguyaho bwaangu wiihe aasi; olwohuba nyaanga yino ese hoyeere ohuba mu nyuumba yao.”

⁶Sakayo yaanguyaho, yeeha aasi bwaangu, yakaanira Yesu neende esangaalo liingi muno.

⁷Nae abaandu nibabona batyo, boosi-boosi bachaaka ohweng'ulung'unya nibaboola bati, “Bone, yahacha ohukeniya omusaacha muhola-mbi.”

⁸Nae Sakayo yasiingira, mani yaboolera Omwaami ati, “Omwaami bona, njia ohuberesa abamanani esituundu sy'ebiindu byaange byoosi; haandi ni mba nindeebaho omuundu yeesi esiindu syoosi, njia ohumukoboserayo ebiindu ebyo, amahabi kane amalaamba.”

⁹Nae Yesu yamuboolera ati, “Olwaleero, obuwonia bwiichire mu nyuumba yino, olwohuba wuno yesi mwaana wa Abburahamu.

¹⁰ Olwohuba Omwaana w'Omuundu yeecha ohukoonya neende ohuwonia abakota.”

¹¹Abaandu nibawulira ebiindu bino, Yesu yemeeda ohubakaadira olukaado, olwohuba yali aambi ohwoola Yerusalemu, haandi olwohuba abaandu bali babaasirisa bati, obwaami bwa Nasaae bucha ohwoola ebiha byeene ebyo.

¹²Mani sakira Yesu yababoolera ati, “Olwoola, omusaacha w'oluyaali wuundi, yatula yaacha mu syaalo sy'eyale muno bamubeerese obwaami, mani amale akobole.

¹³Yalaanga abahalaabani bae ehumi, yaababeresa epawuundi ehumi, [34] mani yaababoolera ati, ‘Muchurusire eseende chino ohwoola lu ndirikobola.’

¹⁴Nae abaandu bomu bwaami bwae bali bamusyuula, mani beecha batuma bawamwaanda ohumuloondaho nibaboola bati, ‘Sihudaha omusaacha wuno atutuke.’

¹⁵Mani niyakobola, n'amalire ohunyoola obwaami, yalagira bamulaangire abahalaabani ba yali yaberesa eseende, anyale ohumanya obuhala bu banyoola mu buchurusi bwaabwe obwo.

¹⁶Owataangira mweene, yeecha mu moni wae, n'aboola ati, ‘Omwaami, epawuundi yao ndala yira, yeebula epawuundi chiindi ehumi.’

¹⁷Mani yamuboolera ati, ‘Oholere bulai muno, oli omuhalaabani mulai mweene! Olwohuba obeere omweesikwa mu siindu sidiidi, mani ochia ohutuka ebiko bihuluundu ehumi.’

¹⁸Haandi owohubiri yaboola ati, ‘Omwaami, epawuundi yao ndala yira, yeebula epawuundi chiindi chitaanu.’

¹⁹Nae yamuboolera ati, ‘Mani ewe ochia ohutuka ebiko bihuluundu bitaanu.’

²⁰Haandi owuundi yeecha yaboola ati, ‘Omwaami, epawuundi yao ndala yira ngino, ndayibiiha bulai adiiyu mu sitambaara;

²¹ndahutya muno, olwohuba oli omuundu mudinyu mweene; obukulaanga byotabiiha, haandi wakesaanga byotataaka.’

²²Yamuboolera ati, ‘Ewe omuhalaabani mubi muno, njia ohuhuheengera omusaango ohweema hu by'olomaloome omweene neende omunwa kwao! Ewe hane wamanya oti ndi omusaacha mudinyu, obukula bitabiiha, haandi okesa bitataaka?

²³Lwasiina siwachia waata eseende chaange mu biihiro ly'eseende, mani nindahakoboole, sindahachitusireyo nichiriho obuhala?’

²⁴Yesu yaboolera abo abali nibeemere aambi ao ati, ‘Mumubukuleho epawuundi ndala eyo, mani muyibeerese oyo oli neende epawuundi ehumi.’

²⁵Nabo bamuboolera bati, ‘Omwaami, oyo ali neende epawuundi ehumi!’

²⁶ ‘Mbaboolera endi, buli muundu yeesi oli nabyo, achia ohumeedwa ebiindi; nae oyo yeesi otaliho neende esiindu, kata neende ebyo byaaba naali nabyo bichia ohumutusibwaho.

²⁷ Nae abasuku baange bano, abatadaha ese mbatuke, mubaleete ano mani mubeetere mu moni waange.’ ”

²⁸Mani Yesu niyamala ohuboola atyo, yemeeda mu moni ohuchia Yerusalemu.

²⁹Mani niyali aambi ohwoola Bbetifaage neende Bbetani, hu sigulu silaangwa siti Esy'emiseituuni, yeecha yaatuma abeeki bae babiri

³⁰n'aboola ati, “Muchie mu lukoongo lubali mu moni olwo, mani nimunaba humwiingiramo muti, muchia ohunyoola omwaana kw'esuhiri nikuboyerwe, ku muundu yeesi ateehalaho hooho; mukuboolole mani mukuleete ano.

³¹Nae omuundu yeesi n'abateeba ati, ‘Lwasiina muli ohukuboolola?’ Mumuboolera sino muti, ‘Omwaami niye okudaha.’ ”

³²Mani abatumwa abo, nibatula bachia bakaana sa koti lu Yesu yali ababoolere.

³³Mani nibali hubaboololanga omwaana kw'esuhiri okwo, abeenekwo bababoolera bati, “Lwasiina muli ohuboolola omwaana kw'esuhiri okwo?”

³⁴Nabo baboola bati, “Omwaami niye okudaha.”

³⁵Bakuleetera Yesu, mani nibasukuna engubo chaabwe hu mwaana kw'esuhiri okwo, behasaho Yesu.

³⁶Omwaana kw'esuhiri nikwali kukiingire Yesu naachia, abaandu bachaaka ohwaala engubo chaabwe hu ngira.

³⁷Nae niyali aambi ohwoola Yerusalemu, n'ali hu siihiriro sy'Olugulu lw'Emiseituuni, esidiiyiha sihoongo sy'abeeki, syachaaka ohwehoya haandi nibafumia Nasaae mu kono ly'aakulu muno, hulw'emirimo mikali kibali nibabweene,

³⁸ nibaboola bati, “Ali neende ehabi Omutuki oyo owiicha mu liita ly'Omwaami! Omuleembe kube Muukulu, haandi oluyaali lube aakulu Muukulu!”

³⁹Nae Abafarisaayo baandi abali mu sidiyiiha bamuboolera bati, “Omweekesa, kaania abeeki bao.”

⁴⁰Nae Yesu yakobolamo ati, “Mbaboolera endi, kata bano boosi nibawuleera, amakina keene kachia ohuyokera.”

⁴¹Yesu niyasuda aambi mani yabona esiko sihuluundu esyo, yasirira muno,

⁴²n'aboola ati, “Biba mbwe enyaanga yino wamanya ebiindu bileeta omuleembe! Nae bulaanu ebyo byahweekisaho.

⁴³Olwohuba endaalo chichia ohwoola, abasuku bao bachia ohuyaba olukoba, mani bahwebodoohanie, mani bahwiikalire embeka choosi,

⁴⁴mani bamale bahuubbe aasi, ewe alala neende abaana bamenya mu lukoba lwao, mani sibachia huhulehamo ekina hu liindi; olwohuba siwamanya esiha sy'obuwonia bwao nisyoolere.”

⁴⁵Yesu niyeengira mu Nyuumba ya Nasaae yachaaka ohwiirusamo abo abali nibachurusiramo,

⁴⁶ yaboola ati, “Syandiikwa siti, ‘Enyuumba yaange yicha ohuba enyuumba yoohusabiraangamo’; nae eng'we mwayihola obweyikamo bw'abanyaka.”

⁴⁷ Yesu yachaaka ohweekesaanga buli ludaalo mu Nyuumba ya Nasaae. Abalaamisi bahuluundu neende abaandiiki b'Amalako alala neende abaandu b'oluyaali luhoongo bachaaka ohukiiya engira y'ohumusihirisa;

⁴⁸nae sibanyoola esiindu syoosi sibanyala ohuhola, olwohuba abaandu boosi bali bahayiire hu mboosi chae.