Read saamia Luka 20 Bible Online

Luka 20 - saamia bible

Luka 20

¹Ludaalo luundi, Yesu niyali ali ohwekeseraanga abaandu mu Nyuumba ya Nasaae haandi naali ohuyalaanga Emboosi Ndai, abahuluundu b'abalaamisi neende abaandiiki b'Amalako alala neende abahuluundu beenjia beecha

²mani bamuboolera bati, “Tuboolereho bunyala siina bwooholera ebiindu bino, oba wiina mweene owahuba obunyala buno.”

³Yesu yabakobolamo ati, “Ese syesi njia ohubateebaho esiteebo silala; bulaanu mumboolereho,

⁴Ohubatiisa hwa Yowaana hwali hutula Muukulu kose mu baandu?”

⁵Mani baasilomalomaho abeene-na-beene nibaboola bati, “Nihuboola huti, ‘Hwatula Muukulu,’ aba achia ohuboola ati, ‘Lwasiina simwamufukiirira?’

⁶Nae nihuboola huti, ‘Hwatula mu baandu,’ abaandu bano boosi baba bachia ohutuhubba amakina; olwohuba bamanyire bati Yowaana yali omunabbi.”

⁷Mani nibakobolamo bati haba sibamanyire yi yatula.

⁸Yesu yesi yababoolera ati, “Syesi siinjia hubaboolera yi ndusa obunyala buholera ebiindu bino.”

⁹ Yesu yachaaka ohukaadira abaandu olukaado luno ati: “Olwoola, omusaacha wuundi yalima endaalo y'emisabbiibbu, mani yamala yayirehera abahalaabani, yacha mu syaalo siindi embaka ndeeyi.

¹⁰Nae ebiha by'ohunoka ebyaamo nibyoola, yaatuma omuhalaabani muwaambe mulala eyiri abaliindi abo, bamubeereseho hu byaamo byomu ndalo eyo; nae abaliindi abo bahuya omuhalaabani muwaambe oyo mani baamwiirusa mahono mereere.

¹¹Yatuma omuhalaabani muwaambe wuundi; oyo yesi beecha bamuhuya bamala bamuwaambya esoni muno, mani bamwiirusa mahono mahaya.

¹²Haandi atuma omuhalaabani muwaambe owohudatu; nae wuno beecha baanyala, bamala bamusukuna erwaanyi.

¹³Abweene ao, omweene ndalo oyo yaboola ati, ‘Ndaahole siina? Njia ohutuma omwaana waange muheerwa muno; awuundi banyala ohumwiisamo oluyaali.’

¹⁴Nae abaliindi abo nibamubona, baboolanira abeene-na-beene bati, ‘Wuno niye omusiha mweene; lehe humwiite, obusiha bube obweefwe.’

¹⁵Mani bamusukuna erwaanyi w'endaalo y'emisabbiibbu, bamwiita. Omweene ndalo y'emisabbiibbu aba achia ohuholera siina abaandu abo?

¹⁶Achia ohwiicha mani asihiriise abahalaabani abo, mani aberese abaandu baandi endaalo y'emisabbiibbu eyo.” Mani nibawulira sino, baboola bati, “Sitabaaho sityo kata nabudiidi!”

¹⁷ Nae Yesu yabalingaala mani yaboola ati, “Mani esyandiikwa sino syeekesa siina siti: ‘Ekina lyeene li bombahi balekeeresa, nilyo elyeeholere ely'amaani mu soonda’?

¹⁸Buli muundu yeesi owegumula hu kina elyo, achia ohusasakuha; nae nilikwa hu muundu yeesi, lichia ohumunyoonyobola.”

¹⁹Abaandiiki b'Amalako neende abalaamisi bahuluundu bateemaho ohumukwaaho esiha syeene esyo, nae baatya abaandu; olwohuba basiyira bati nibo bakaadire mu lukaado luno.

²⁰Mani bamwewunja bilai, mani bamala batuma abaheeti, abebachirisa bafwaana koti abaandu b'obwadyeeri, banyale ohumudiira mu mboosi chae, hu banyale ohumudiisa abo obunyala neende obutuki bwa gafana wa Rom.

²¹Bateeba Yesu bati, “Omweekesa, humanyire huti by'olomaloma neende bi weekesa byadyeeri, haandi haba siwehubbira, nae mubwadyeeri bweene weekesa bi Nasaae adaha abaandu bahole.

²²Mani sifukiirirwa efwe ohuberesa Kaisaari omusolo, kose haba?”

²³Nae Yesu yeecha yaamanya obukodyo bwaabwe, mani yababoolera ati,

²⁴“Munjekeseho emwaamwa. [35] Esifwaanani neende obwandiike biriho bya naanu?” Baboola bati, “Bya Kaisaari.”

²⁵Yesu yababoolera ati, “Mubeerese Kaisaari ebya Kaisaari, nae beerese Nasaae ebya Nasaae.”

²⁶Mani haba sibanyala ohudiisa Yesu omusaango kwoosi mu lwichuule lw'abaandu ohweema hu bi yalomaloma; nae bawuka muno engaluhamo yae, mani nibanyita chi.

²⁷ Abweene ao Abasadukaayo baandi, ababoola bati abulao ohusyuuha hw'abafwa, beecha eyiri Yesu,

²⁸ mani bamuteeba esiteebo nibaboola bati, “Omweekesa, Musa yatwandiikira ati, mwaanang'ina muundu naafwa yaleha omuhasi n'atebuuleho nae omwaana, omusaacha oyo [36] ahoyere ohubukula omuhasi oyo, mani yebulira mwaanang'ina wafwa abaana.

²⁹Bulaanu, waliwo abasyaani b'enda ndala bataanu-na-babiri; omuhuluundu waabwe yadeehya omuhasi, yafwa n'ataalehereho abaana;

³⁰owohubiri yesi yaamudeehya yaba atyo

³¹haandi owohudatu yesi yamubukula mani byaaba bityo. Nasilala batyo boosi bataanu-na-babiri baafwa nibatalehereho abaana.

³²Luunyuma, omuhasi oyo yesi yafwa.

³³Mani sakira mu husyuuha hw'abafu, omuhasi oyo achia ohuba owa wiina mweene? Olwohuba yadeheraho abasyaani bataanu-na-babiri abo boosi.”

³⁴Nae Yesu yababoolera ati, “Abaandu bohusyaalo huno nibo abadeehya haandi badeeha;

³⁵nae abo abahoyera ohuba mu bulamu bwiicha, neende mu husyuuha hw'abafwa, haba sibadeehya, haandi kata sibadeeha,

³⁶olwohuba sibanyala hufwa haandi, olwohuba bali koti bamalaika, haandi baana ba Nasaae, olwohuba bali abaana b'ohusyuuha mu bafwa.

³⁷Nae ohweekesa mbwe abafu basyuuha, kata Musa yesi yekesa atyo, mu situundu sy'ebyandiiko byoolerefu esidiira hu sichaha, syalangiramo Omwaami ati, Nasaae wa Abburahamu, haandi Nasaae wa Yisaka, haandi Nasaae wa Yakobbo.

³⁸Bulaanu haba saali Nasaae wa bafu, nae ali Nasaae wa balamu; olwohuba abaandu boosi balamu yali.”

³⁹Abaandiiki b'Amalako baandi bakobolamo bati, “Omweekesa, olomaloome bulai bweene.”

⁴⁰Olwohuba ohutula hu olwo, abulao omuundu yeesi owateemaho ohuteeba Yesu esiindu syoosi.

⁴¹Nae Yesu yababoolera ati, “Bahaboola batye bati, Kristo mwaana wa Daudi?

⁴² Olwohuba Daudi mweene aboola mu sitabo sy'Esabbuli ati, ‘Omwaami yaboolera Omwaami waange ati, Yihala hu muhono kwaange muluungi,

⁴³ohwoola lu ndahahole abasuku bao babe esiteeni syowuluusiraho amakulu kao.’

⁴⁴Mbao, Daudi amulaanga ati Omwaami; mani haandi yahaba atye omwaana wae?”

⁴⁵Yesu yaboolera abeeki bae abaandu boosi nibawulira ati,

⁴⁶“Mweliinde abaandiiki b'Amalako, abaheera ohung'alaala nibefwaalire emiganjuula kyereera, haandi abaheera muno ohuheeswa neende oluyaali mu biito, haandi abaheera muno ohwiihalira mu bweyaango bw'oluyaali mu sinagoogi neende mu bidyaalo,

⁴⁷abayaaya amadaala k'abahasi bafwiire, haandi abasaba esaala ndeeyi nibekaadya. Abo bachia ohunyoola ohusaandisibwa huhiramo obubi.”