Read saamia Luka 21 Bible Online

Luka 21 - saamia bible

Luka 21

¹Yesu yasiingisa emoni aakulu, yabona abayiinda nibali ohuta ebiyaanwa byaabwe mu sibiihiro;

²mani yabona omuhasi mufwiirwe mumanani n'ataamo obuhela bubiri.

³Mani yaboola ati, “Mbaboolera obwadyeeri endi, omuhasi mufwiirwe mumanani wuno ateeremo ohuhira abo boosi;

⁴olwohuba abo batusireho sa hu biingi bi bali nabyo, nae wuno ohutula mu bumanani bwae ateeremo byoosi byaabeere nabyo mu bulamu bwae.”

⁵Abaandu baandi nibali nibalomaloma hu Nyuumba ya Nasaae, koti luyali niyimila-milana hulw'amakina k'obuhala buungi, neende ebiyaanwa byaamwo, Yesu yaboola ati,

⁶“Ebiindu bi mubona bino byoosi, endaalo chahoole, awuleo ano ekina lyahalehebwe hu liindi, kahalikulwe koosi kaweere aasi.”

⁷Bamuteeba bati, “Omweekesa, sino syahabeeo liina, haandi silolero siina esyahabeeo esyeekesa siti sino siri aambi ohukwaao?”

⁸Nae Yesu yaboola ati, “Mweliinde muhaye ohukoswa; olwohuba abaandu baangi bachia ohwiicha mu liita lyaange, nibaboola bati, ‘Niise oyo!’ Haandi bati, ‘Ebiha nibyo bino!’ Mutabaloondakiriraanga.

⁹Nae nimuwuliraanga amaye neende embuungu, mutatengatengaanga; olwohuba sino sihoyere ohubaao mberi, nae enjakamo nayo siyichia hukwaao sa ehabi lala.”

¹⁰Yesu yababoolera ati, “esyaalo sichia ohusiingira siseete esiindi, haandi obwaami bwosi buseete obuundi;

¹¹esyaalo syahateengerehe muno, haandi enjala neende amalwaae maangi mabi kahakwe mu byaalo bitaali nasilala; haandi ebiindu bitiisa muno neende ebilolero bw'amaani ohutula aakulu bichia ohubaao.

¹²Nae bino byoosi nibisisiiri ohukwaao, abaandu bachia ohubadiira mani babasaandye muno, nibabayira mu sinagoogi chitaali nasilala neende mu jeela, haandi muchia ohuleetwa eyiri abatuki neende bagafana hulw'eliita lyaange.

¹³Ao niwo yi eng'we mwahatusire obuloli.

¹⁴ Mani sakira mumanyire elalira mu myooyo kyeeng'we, mutachaaka ohukana-kana hale nibitoola koti lu muba muchia ohukobolamo ebiteebo;

¹⁵olwohuba, njia ohubaba eby'ohulomaloma neende amakesi kadahibwa, ka kata mulala hu basuku beeng'we aba achia ohunyala ohuhira kata ohudoondobania.

¹⁶Muchia ohusiindihwayo kata neende abeebusi beeng'we, kata abanaluyia beeng'we, kata abeecha beeng'we haandi abaandi hweeng'we muchia ohwiitwa-bwiitwa;

¹⁷abaandu boosi bachia ohubasyuula hulw'eliita lyaange.

¹⁸Nae haba kata olwooya lw'efwiiri lulala olwohumitwe cheeng'we siluchia husihirira daawe.

¹⁹Nae ni mu hweesimiirisa hweeng'we mumuchia ohunyoolera obulamu.

²⁰“Nae nimubonaanga Yerusalemu nisyebodoohanisiibwe neende amaye, mani mumanyeenge sa muti, olubwa lwasyo luba lumalire ohwoola.

²¹Mani leheenge abo ababa nibali mu Yudesa beeruheenge bachia hu ngulu, haandi leheenge abo ababa nibali mu siko sihuluundu bweene bawuuya, haandi mutalehanga abo ababa nibali erwaanyi mu ngoongo beecha baasiingiramo;

²² olwohuba chino nicho endaalo ch'ohwetuungiramo, ohwooseresa byoosi ebyandiikwa.

²³Chaakaanire abo abaliba neende abaana neende abo abaliba nibanuunia abaana mu biha ebyo! Olwohuba amasira amaangi kachia ohuba hu syaalo neende egiili ohuweera hu baandu bano;

²⁴bachia ohwiitwa neende obusoonjo bw'engaanga haandi bayirwe mu jeela mu byaalo biindi byoosi; mani Yerusalemu sichia ohuseenakirwa mu makulu neende Bateende, ohwoola lu ndaalo ch'Abateende chiriweera.

²⁵ “Haandi yicha ohubaao ebilolero hu lyuuba neende hu mwoosi neende hu ng'ining'ini chosi, nae hu syaalo, ebyaalo bichia ohuba neende engisa nyiingi muno nibitiire ohuwoola hw'enyaanja huluundu neende ohukiingana hw'amafwiinda kaayo,

²⁶abaandu boosi bachia ohufwichaanga obuti nibelalihiire ebichia ohukwaao hu syaalo; olwohuba obunyala bwoomu Kulu bwosi bucha ohudengaanisibwa.

²⁷ Mani ao niwo abachia ohubonera Omwaana w'Omuundu niyeechera mu sireesi naali neende amaani neende oluyaali lubitiirifu.

²⁸Nae bulaanu, ebiindu bino byoosi nibiba nibichaaka ohuholehana, eng'we musiingisaanga emitwe cheeng'we, mani mulingaala aakulu, olwohuba obuwonia bweeng'we buba busuda aambi bweene.”

²⁹Haandi Yesu yeecha yabakaadira olukaado luundi ati, “Mubonere hu mutuli, neende kata hu misaala chiindi choosi;

³⁰huchahasebuhira chiti amasaafu, mweeboneraanga abeene mani mumanya muti esiminyu simalire ohwoola.

³¹Mani nasilala nilwo lu biri, nimubonaanga ebiindu bino nibikwao, manyeenge sa muti, obwaami bwa Nasaae buli aambi.

³²Mbaboolera obwadyeeri endi, oluse luno haba silwahaweeo bino byoosi nibitaakwao.

³³Ekulu neende esyaalo bichia ohuwaao, nae emboosi chaange haba sichicha ohuwaao.

³⁴“Nae mweliinde abeene, emyooyo kyeeng'we kitakatayaswa neende emideeho neende obumeesi neende ohwelalihirira hw'ebihoyera obulamu buno, bikere oludaalo olwo lwaabakwaaho koti omuteego nimutetekeehe;

³⁵olwohuba oludaalo olwo luchia ohwichira abaandu bali hu syaalo huno boosi.

³⁶Nae eng'we mube ameeso esiha syoosi, nimusaba Nasaae muti muduhane amaani ak'ohwewonia ebiindu bino byoosi ebichia ohukwaao, neende ohweema mu moni w'Omwaana w'Omuundu.”

³⁷ Yesu yemeeda ohweekesanga buli ludaalo mu Nyuumba ya Nasaae, nae nibweeraanga yatulanga erwaanyi achia akona hu sigulu silaangwa Esy'emiseituuni.

³⁸Nae nibwahyechaanga echuli, abaandu bawuunaanga ohwiicha yali mu Nyuumba ya Nasaae ohumutekeeresa.