Read saamia Luka 23 Bible Online

Luka 23 - saamia bible

Luka 23

¹Mani omukaanda okwo kwoosi kweemao kwasiingira, kwamuleeta emberi wa Pilato.

²Nibachaaka ohumuwabira nibaboola bati, “Hubukaanire omusaacha wuno naali ohudoondobaniaanga esyaalo syeefwe, haandi naali ohutukaania ohutooyaanga omusolo eyiri Kaisaari, haandi n'aboola ati omweene niye Kristo haandi niye Omutuki.”

³Nae Pilato yamuteeba ati, “Niiwe omutuki w'Abayudaaya?” Nae yamukobolamo ati, “Niiwe oboolere otyo.”

⁴Pilato yaboolera abalaamisi bahuluundu alala neende emikaanda ch'abaandu ati, “Ese haba simbonaho omusaango kwoosi hu musaacha wuno.”

⁵Nabo baangalala sa nibaboola bati, “Asaangulasa abaandu, naabitira mu njekesa yae mu Yudea mwoosi, ohutulira Galilaaya ohwoolera elalira kata ano wosi.”

⁶Nae Pilato niyawulira atyo, yateeba ohumanya omusaacha wuno yali Omugalilaaya.

⁷Mani niyamanya ati, hane Yesu atula mu butuki wa Herode, yamuyira eyiri Herode, owali yesi naali mu Yerusalemu esiha syeene esyo.

⁸Nae Herode niyabona Yesu, yasangaala muno, olwohuba yali yekomba luleeyi ohumubona, olwohuba yali namuwuliraangaho sa, mani yali nasuubiraanga ohubonaho ebilolero bwahola.

⁹Yamuteeba ebiindu biingi muno, nae omweene yahaya ohumukobolamo kata silala.

¹⁰Abalaamisi bahuluundu alala neende Abaandiiki b'Amalako nabo badoong'a sa nibeemere ao nibedinyiisye ohumutaaho omusaango.

¹¹Nae Herode alala neende abalwaani bae beecha bachaaka ohumusaandya nibamuhomoolera; mani nibamufwaasa engubo ch'obuyaayi nibamala nibamukalusa eyiri Pilato.

¹²Mani ohuchaakira abweene ao, ni Herode neende Pilato bachaakirao ohuba abeecha haandi, olwohuba enyuma eyo bali nibasyuulana sa.

¹³Bulaanu, Pilato yeecha yabuusa alala abalaamisi bahuluundu neende abatuki neende abaandu baandi,

¹⁴yababoolera ati, “Muundeteere omusaacha wuno koti oyo owali n'adoondobania abaandu; nae nimalire ohumuyaasa mu moni weeng'we, boneho, ese haba siinyalire ohumunyoolaho omusaango kwoosi hweebyo byoosi bi mubeere mumwekanyiisaho;

¹⁵kata neende Herode yesi atyo, sakira atukalusiire omusaacha wuno haandi. Boneho, sibulao esiindu syoosi esihoyera ohufwa syaholereho daawe;

¹⁶Mani ese njia ohumunaalaho ehoba budiidi, mani male mulehuule yeweereo.” [

¹⁷Nae bulaanu yali n'ahoyera ohubalehuulira omuundu mulala hu ludaalo lw'esidyaalo.]

¹⁸Nae boosi bahuumira alala nibaboola bati, “Mwiite omuundu wuno, mani mutuboololere Bbarabba”

¹⁹omusaacha yali yasukunibwa mu jeela hulw'ahasasakamalo hali hakwiireo mu siko sihuluundu haandi neende hulw'obwiiti,

²⁰Pilato haandi yababoolera a ehabi liindi, n'adaha aboolole Yesu;

²¹nae haandi bahuumira mu kono ly'aakulu nibaboola bati, “Mumubaambe sa, mumubaambe!”

²²Haandi ehabi lyohudatu, Pilato yeecha yababoolera ati, “Lwasiina, sibi siina syeene sy'aholere? Haba simubweeneho omusaango kwoosi okuhoyera ohufwa; Mani sakira, njia sa ohumunaalaho ehoba mani nyemeo mulehuule.”

²³Nae bali neende amayiingi maangi muno nibamusaba nibehuuma bati ahoyere ohubaambwa. Mani amakono kaabwe keecha kayiingira.

²⁴Pilato yaheenga omusaango ati ohudaha hw'abaandu nihwo ohuba huholerweho.

²⁵Pilato yalehuula omusaacha oyo owali yasukunwa mu jeela hulw'ohusaasakamala hwali hukwiireo mu siko sihuluundu neende hulw'obwiiti, yibali nibasabire; nae yahola Yesu koti lu bali badahire.

²⁶Mani koti lubali hu bamutusa ao, baakwa hu Simooni wuundi Omusireeni, owali n'akobola mu siko n'atula mu ngoongo bamudwiiha omusalabba yakukiinga n'aloonda hu Yesu.

²⁷Enyuma wae esidiiyiha sihoongo esy'abaandu syamuloondaho neende omuhunu kw'abahasi abali nibachereenjesa nibamulira.

²⁸Nae Yesu niyakaluuhana yabalingaala, yaboola ati, “Abahaana ba Yerusalemu, mutandirira haba, nae mwelirire abeene, haandi mulirire abaana beeng'we.

²⁹Olwohuba bone, endaalo mbao chiicha, chibahabooleremo bati, ‘Bali neende ehabi abakuumba, neende enda chiteebulaho omwaana yeesi, haandi neende embeere chitanuuniaho haba!’

³⁰ Bahachaake ohuboolera engulu bati, ‘Mutukweeho;’ haandi ohuboolera ebigulu bati, ‘Mutufuunihe.’

³¹Olwohuba nibahola bati omusaala nikusisiiri omubisi, byahabe bitye nikwahabe kwoomere?”

³²Bayira abasaacha babiri baandi abali abeebi babeetere alala neende Yesu.

³³Nae niboola abuundu alaangwa ati, Esyangaanga, ao niwo yibabaamba Yesu hu musalabba alala neende abeebi babiri abo, mulala hu muhono muluungi, nae owuundi hu muhono kwae mukaada.

³⁴ Yesu yaboola ati, “Laata, balehere; olwohuba bakoterwe bi bahola.” [41] Bulaanu beemao baahubba eha yohukabanira engubo chae.

³⁵ Abaandu bali nibeemere ao nibabalingaalire; nae abatuki bamucheha nibamudyabuhira nibaboola bati, “Yaonia abaandi; mani leha yewonie omweene, naaba naali Kristo wa Nasaae, Omulobole wae Mweene!”

³⁶ Ab'amaye bosi bamuhoomolera, nibeecha yaali nibamuba efiini yihaliihe,

³⁷mani nibaboola bati, “Nooba nooli Omutuki w'Abayudaaya, wewonie omweene!”

³⁸Beecha baata obwandiike buno aakulu wae, [42] echisoma chiti, “Wuno niye Omutuki w'Abayudaaya.”

³⁹Mulala hu beebi babiri abali bosi nibabaambirwe alala nae ao yahabuhira Yesu n'aboola ati, “Ewe haba siniiwe Kristo? Weewonie omweene neende efwe fwesi!”

⁴⁰Nae owuundi oyo nae yaalabira owaasye oyo n'aboola ati, “Ewe haba sotyaaho Nasaae, nga wesi oheengerwe sa omusaango nasilala nae?

⁴¹Nae ese naawe huhoyera sa ohuholwa huti; olwohuba efwe huli sa ohunyoola omukabo kuhoyera ebiholwa byeefwe bibi; nae omusaacha wuno nae haba saaholereho esiindu sitahoyera syoosi.”

⁴²Yaboola ati, “Wama Yesu, wunjichulisaangaho niwiingira mu bwaami bwao.”

⁴³Nae Yesu yamuboolera ati, “Mubwadyeeri bweene, ndi ohuhuboolera endi, nyaanga yino ochia ohuba naange mu Paradiiso.”

⁴⁴ Ebiha bino byali nibiri aambi w'esaa chisaasaba mani esiirima syeecha syadiira esyaalo syoosi ohwoola esaa chitaanu-na-chine,

⁴⁵omubasu nikuhayire ohufwa; epasya yadembaanga mu Nyuumba ya Nasaae yeecha yataanduhamo habiri.

⁴⁶ Yesu yalira mu kono ly'aakulu, yaboola ati, “Laata, ngeeng'a omwooyo kwaange mu mahono kao!” Yesu niyamala ohuboola atyo, yayeera omuuya kwae kumaliirihayo.

⁴⁷Nae bulaanu, omumaye muhuluundu niyamala ohubona ebyo byoosi ebyaholehana, yaafumia Nasaae, mani yamala yaboola ati, “Ataali ohukana-kana, omusaacha wuno abeere omulai mweene!”

⁴⁸Abweene-na-bweene ao, ebidiiyiha byoosi ebyali nibyebuusiire ao ohubonaho ebyo, nibabona ebyaholehana ebyo byoosi, bakobola mu madaala kaabwe nibehuya hu birifu.

⁴⁹ Abaandu bali bamumanyirira boosi, alala neende abahasi bali bamuloondereho ohutula Galilaaya beecha beema eyale mani babona bulai muno ebiindu bino.

⁵⁰Bulaanu waliwo omusaacha olaangwa ati, Yosefu otula mu siko sya Buyudea silaangwa siti Arimatea. Yali mulala hu b'oluhiiho, haandi yali omusaacha mulai haandi omuluungifu muno,

⁵¹yali natafukiirisaanie neende ebichiiririrwa neende ebiholwa bibi by'abaasye, haandi yali n'aliindiriire Obwaami bwa Nasaae bwiiche.

⁵²Omusaacha wuno yacha eyiri Pilato, mani yaamusaba omubiri kwa Yesu.

⁵³Yakwanula, yakuboya mu suuka ly'elaasi lya rachaari, mani yamwalisa mu ng'ani yabaachwa mu lwaanda yi bali basisiiri ohusiiha hoomo omuundu yeesi.

⁵⁴Oludaalo olwo lwali oludaalo lw'ohweetekeheramo, haandi Sabbaato yali aambi ohuchaaka. [43]

⁵⁵Abahasi bali beechere nae ohutula Galilaaya, baloondaho, mani babona eng'ani, neende engeri yi bali basihiiremo omubiri kwae;

⁵⁶ Mani bakobolayo, batekeha ebiindu biwunya esing'aari neende amafuta k'ohumubaha. Hu ludaalo lwa Sabbaato, bawuluuha ohweema koti lu amalako kaboola.