Read saamia Luka 5 Bible Online

Luka 5 - saamia bible

Luka 5

¹ Ludaalo luundi, Yesu niyali yeemere hu lwaasi lw'enyaanja ye Genesareeti, abaandu baangi beecha nibasiindihana boole yali bawulire emboosi ya Nasaae.

²Yesu yabona amaato kabiri nikali hu lwaasi; nae abanaabi bali nibakatuliremo, nibali ohwosaanga enjero chaabwe.

³Yesu yeengira mu lyaato lala, elya Simooni, yaamusaba asudyeho elyaato budiidi mu maachi ohutula hu lwaasi. Yesu yachaaka ohweekesa abaandu niyehaale mu lyaato omwo.

⁴Nae niyali niyakaame ohulomaloma, yaboolera Simooni ati, “Sudya elyaato ebusiba mani wiise enjero chao odiise eng'eeni.”

⁵ Nae Simooni yamukobolamo ati, “Omwaami, hunyahaane esiro syoosi nae haba sihunyolereho esiindu syoosi! Nae olwohuba oboolere, njia ohwiisa enjero.”

⁶ Mani nibamala ohuhola sino, badiisya eng'eeni enyiingi muno; nae koti enjero chaabwe chali nichichaakire ohuhanuha,

⁷basakula nibalaanga abasyaabwe bali mu lyaato liindi beeche babahoonyereho. Mani nibeechusa amaato kabiri ako ohwoola lukali aambi ohusihama.

⁸Nae Simooni Petero niyabona sino, yaakwa aasi mu makulu ka Yesu, n'aboola ati, “Eee Omwaami, ndehe, olwohuba ese ndi omuhola-mbi.”

⁹Olwohuba Simooni, alala neende abo boosi abali nae besiinduha hulw'obuungi bw'eng'eeni chi bali banaabire;

¹⁰haandi nasilala batyo nilwo lu Yakobbo neende Yowaana, abasyaani ba Sebbedaayo abali neende Simooni Petero bosi besiinduha. Mani Yesu yaboolera Simooni ati, “Otatya; olwohuba ohuchaaka buti ochia ohuba omunabbi wa abaandu.”

¹¹Mani nibakoba, baleha ao buli siindu syoosi bamuloonda.

¹²Olwoola, Yesu niyali n'asisiiri mu siko siindi, omusaacha wuundi owali niyeechulaho obulwaae bw'ebigeenge yamala yeecha yali; mani niyabona Yesu, yakwa yahubba aasi obweeni, mani yamwekweeda n'aboola ati, “Omwaami, nooba niweenya, onyala waandabya.”

¹³Yesu yakolola omuhono kwae, mani n'amudiiraho n'aboola ati, “Nyenya; wona.” Mani abweene-na-bweene ao, ni obulwaae bw'ebigeenge bumwamuhaho.

¹⁴ Yesu yamulagira obutabooleraho omuundu yeesi; nae yamuboolera ati, “cha weyekese eyiri omulaamisi, mani owaane esiyaanwa esy'ohuhulabya, koti lu Musa yalagira, sibe esilolero eyiri abaandu.”

¹⁵Nae kata katyo, nilwo lu fuma yidiira hu Yesu yemeeda ohusalaana muno; mani ebidiiyiha by'abaandu bihoongo muno byeecha byamwebuusaho ohutekeeresa enjekesa yae alala neende ohuwonisibwa amadehere kaabwe.

¹⁶Nae Yesu ha yekabula yacha mu siparara mani yalaama Nasaae.

¹⁷Ludaalo luundi, Yesu niyali nasomesaanga, baliwo Abafarisaayo neende Abeekesa b'Amalako ka Musa bali nibehaale aambi ao, nibatulire mu buli lukoongo lwa Galilaaya neende Yudea neende Yerusalemu; nae Yesu yali yechuuleho amaani k'Omwaami k'ohuwonia obulwaae.

¹⁸Mani bone, abasaacha baandi bali baleetera hu sitaanda omusaacha wali yadataala, beecha bakoonya engeri y'ohumwiingisa bamwaalise mu moni wa Yesu.

¹⁹Nae nibatabona engeri yoosi yibanyala bamwiingisiramo, hulw'esidiiyiha sy'abaandu siingi, beecha baniina hu sirama aakulu; mani beekula esidomo mu mategula bamwiisiramo aasi akatikaati w'abaandu naali hu sitaanda syae, bamuta mu moni wa Yesu.

²⁰Mani Yesu niyabona efukiirira yaabwe, yaboola ati, “Wasyaange, oleheerwe ebyonoono byao.”

²¹Nae Abeekesa b'Amalako ka Musa neende Abafarisaayo beecha bachaaka ohweteeba nibaboola bati, “Wuno niye wiina olomaloma n'afwoola Nasaae? Wiina mweene onyala ohulehera ebyonoono ohutusaho Nasaae yeeng'ene?”

²²Nae Yesu niyamanya ohweteebanaho hwaabwe, yabakobolamo ati, “Lwasiina muli ohweteeba mu myooyo kyeeng'we mutyo?

²³Siina syeene esihira obwaangu, ohuboola endi, ‘Oleheerwe ebyonoono byao,’ kose ohuboola endi, ‘Siingira okeende’?

²⁴Nae njia ohubeekesa mumanye muti Omwaana w'Omuundu ali neende obunyala hu syaalo obw'ohulehera ebyonoono” mani yaboolera omusaacha wali yadataala oyo ati, “Huboolera endi, siingira, obukule esitaanda syao, mani ochie engo.”

²⁵Abweene ao, yasiingira yeema boosi nibabona, yaakiinga esitaanda si yali akonereho, mani yacha engo, naafumia Nasaae.

²⁶Mani abaandu boosi bawuka muno, bafumia Nasaae nibechuule obuti, nibaboola bati, “Olwaleero hubweene ebiindu bihutabonaangaho.”

²⁷Bino nibyawa, Yesu yatula erwaanyi, mani yabona omutoosa w'omusolo olaangwa Leefi, niyehaale aambi neende enyuumba yitooserwangamo omusolo; mani yamuboolera ati, “Noonde.”

²⁸Leefi yaleha buli siindu syoosi, mani yaasiingira yaamuloonda.

²⁹Leefi yatekehera Yesu esidyaalo sihoongo muno mu nyuumba yae; haandi mu baandu ba yalaanga, mwalimo omukaanda muhoongo muno okw'abatoosa b'emisolo baasye, alala neende abaandu baandi bosi beehala neende Yesu hu meesa ohulya nae.

³⁰ Nae Abafarisaayo neende Abaandiiki b'Amalako baabwe bekanyiirisira abeeki ba Yesu nibaboola bati, “Lwasiina eng'we mulya haandi mwang'wa neende abatoosa b'omusolo neende abahola-mbi?”

³¹Nae Yesu yabakobolamo ati, “Abaandu balamu, haba sinibo yabaheera omulesi, nae abalwaae nibo amudaha.

³²Ese sindeecha ohulaanga abaluungifu, nae abahola-mbi banyale ohweyolobya.”

³³Haandi beecha baboolera Yesu bati, “Abeeki ba Yowaana basiiba amahabi maangi muno haandi balaama muno, kata nasilala neende abeeki b'Abafarisaayo, nae abao nabo balya haandi bang'wa sa.”

³⁴Nae Yesu yababoolera ati, “Ewe onyala ohuhola abakeni bohu sidyaalo sy'obweya baasiiba omusaacha odehiisye n'asisiiri nabo?

³⁵Endaalo chichia ohwoola, omusaacha odehiisye abatusibweho, mu ndaalo echo nimwo mubacha ohusiibira.”

³⁶Haandi Yesu yabakaadira olukaado luundi n'aboola ati, “Abulao omuundu yeesi otaandulaanga esiraka hu ngubo njaaha, mani yacha yaasinaba hu ngubo ngofu; naahola atyo, aba achia ohutaandula engubo njaaha, haandi esiraka situla hu njaaha, sisiba sichia ohuchiira hu ngubo hale.

³⁷Haandi abulao omuundu yeesi otechaanga efiini njaaha mu bikiingiro by'efiini by'eseero bihale; nae naahola atyo, efiini njaaha eyo yiba yicha ohwata amaseero ako, mani yidiihe aasi, haandi amaseero ako kosi kaba kachia ohunyaasiha.

³⁸Nae efiini njaaha yihoyerwa ohuchuhibwa mu bikiingiro by'efiini by'amaseero biyaaha.

³⁹Nihaandi abulao omuundu omalire ohung'wa efiini hale owekoomba enjaaha; olwohuba aboola ati, ‘Ehale ndai.’ ”