Read saamia Luka 7 Bible Online

Luka 7 - saamia bible

Luka 7

¹Yesu niyamaliirisa enomanoma yae yino abaandu nibatekereese, yatula ao yacha yeengira mu Kaperanaumu.

²Nae bulaanu omuhoongo w'abasikaari emia ndala yali neende omuhalaabani muwaambe wae mukoosi muno owali omulwaae muno, haandi naali aambi ohufwa.

³Mani omusikaari oyo niyawulira efuma ya Yesu, yamutumira abahuluundu ba Abayudaaya, nibamusaba ohwiicha ohuwonia omuhalaabani muwaambe wae oyo.

⁴Mani niboola eyiri Yesu, bamwekweeda neende esinani nibaboola bati, “Ahoyere ohuholererwa atyo,

⁵olwohuba yaheera muno esyaalo syeefwe sino, haandi yatwombahira sinagoogi yeefwe.”

⁶Mani Yesu yeecha yacha nabo. Nae niyali aambi ohwoola mu daala, omuhoongo w'abasikaari oyo, yamutumira abeecha bae n'aboolera Yesu ati, “Omwaami, otenyahania daawe, olwohuba ese haba sihoyera ewe ohwiingira mu nyuumba yaange;

⁷sakira ese mweene sindeleetere yooli. Nae lomaloma sa emboosi, mani omuhalaabani waange achia ohuwona.

⁸Olwohuba ese syesi ndi omuundu w'obunyala, haandi ndi neende abasikaari bali aasi waange; mani nimboolera mulala endi, ‘Cha,’ naachia sa; haandi owuundi endi, ‘Yicha,’ niyeecha sa; haandi omuhalaabani muwaambe waange endi, ‘Hola sino,’ nasihola sa.”

⁹Nae Yesu niyawulira bino, yesinduha muno, mani yakaluhaana yaboolera esidiiyiha syali nisimuloondaho ati, “Mbaboolera endi, sisiiri ohwakaanaho efukiirira koti yino mu Yisiraeli mwoosi.”

¹⁰Mani abo abali batumiibwe eyiri Yesu, nibakobola mu nyuumba, baakana omuhalaabani muwaambe oyo naali omulamu.

¹¹Abweene ao ebyo nibiweere, Yesu yacha mu siko sihuluundu silaangwa, Naini, mani abeeki bae alala neende esidiiyiha sihoongo bosi bachia nae.

¹²Nae niyali naali aambi ohwoola mu siruwa sy'esiko sihuluundu esyo, bone, omusaacha wali n'afwiire yali akiingirwe n'atusibwa erwaanyi w'esiko ohuchia ohusiihwa, owali omwaana mudeerwa wa ng'ina, haandi ng'ina oyo, yali omuhasi mufwiirwe; mani esidiiyiha sihoongo sy'abaandu bomu siko esyo bali bakeendera alala neende omuhasi oyo.

¹³Mani Omwaami niyabona omuhasi oyo, yamukwiira esisa mani yaamuboola ati, “Otalira daawe.”

¹⁴Abweene ao, Yesu yadiira hu buliri bw'omufu, mani abakiingi beema. Mani Yesu yaboola ati, “Omuraaga ewe, huboolera endi, siingira.”

¹⁵Mani omuundu wali afwiire oyo yeecha yasiingira yehala, mani yachaaka ohulomaloma. Yesu yaamudiisa ng'ina.

¹⁶Obuti bwadiira abaandu bali ao boosi; mani bachaaka ohufumia Nasaae nibaboola bati, “Omunabbi w'amaani atwiichiremo!” Haandi, “Nasaae akeniiye abaandu bae!”

¹⁷Mani efuma yidiira hu Yesu yino yeecha yasalaana mu Buyudaaya mwoosi, alala neende ebyaalo byoosi ebisyebodohaanie.

¹⁸Abeeki ba Yowaana beecha bamuboolera ebiindu bino byoosi.

¹⁹Yowaana yalaanga babiri hu beeki bae yabatuma eyiri Omwaami n'aboola ati, “Ewe niiwe oyo ow'ohwiicha, oba hukoonye owuundi?”

²⁰Mani abasaacha abo nibamala ohwoola eyiri Yesu, baboola bati, “Yowaana Omubatiisi atutumire yooli n'aboola ati, ‘Ewe niiwe ow'ohwiicha oba hukoonye owuundi?’ ”

²¹Esiha syeene esyo, Yesu yawonia abalwaae baangi muno neende ab'endwae chitaali nasilala alala neende ab'ebihyeeno, haandi yakera abawofu baangi baabona bulai.

²² Yesu yabakobolamo ati, “Muchie mani muboolere Yowaana ebyo bi mubweene neende bi muwuliire. Abawofu babona; abalema bakeenda; abageenge baamulwaho; abadiimbe bawulira; abafu balamusibwa; abamanani bayaalirwa Emboosi Ndai.

²³Mani ali neende ehabi oyo otaambonera bubi.”

²⁴Mani bawamwaanda ba Yowaana nibamala ohuwaao, Yesu yachaaka ohulomaloma eyiri ebidiiyiha ebyo ebidiira hu Yowaana ati: “Siina syeene si mwachia mu siparara ohubona? Ekada li muyaka kuwucha nilidengaana?

²⁵Mani siina syeene si mwachia ohubona? Omuundu yefwaalire engubo chifwooha? Bone, abo abafwaala eching'enaang'ena haandi bamenya mu bulamu bw'ohwedaha baba mu madooho k'abatuki.

²⁶Mani siina syeene si mwachia ohubona? Omunabbi? Eee, mbaboolera endi, nae oyo niye ohiraho omunabbi.

²⁷ Wuno niye oyo yi baandikaho bati, ‘Bone, mbao nduma wamwaanda waange mu moni wao, ochia ohuhutereesera engira mu moni wao.’

²⁸Mbaboolera endi, mu baandu beebulwa boosi, abulao ohira Yowaana; kata katyo, oyo ohiramo obudiidi mu bwaami bwa Nasaae amuhira oluyaali.”

²⁹ (Mani abaandu boosi alala neende abatoosa b'omusolo nibawulira batyo, basiima ehola ndai ya Nasaae, olwohuba bali babatiiswa neende embatiisa ya Yowaana;

³⁰nae Abafarisaayo alala neende Ab'amalako bebwaaba esichiiririrwa sya Nasaae yibali, koti lu bali nibatabatiisibwa neende Yowaana.)

³¹“Siina syeene sindaakeraanieho abaandu b'olwiibulo luno, oba bafwaanana neende siina?

³²Bafwaana koti abaana behaale mu siito, mani nibalaanganaanga abeene-na-beene bati, ‘Hwabobbera elere li sangaasa, nae mwahaya ohuhina; haandi hwabacherenjesera, nae mwahaya ohulira.’

³³Olwohuba Yowaana Mubatiisi yeecha n'atalya omugaati kwoosi, haandi n'atang'wa efiini yoosi; nae mwaboola muti, ‘Wuno aliho omusaambwa.’

³⁴Nae Omwaana w'Omuundu yeecha naalya haandi nang'wa; nae mwaboola muti, ‘Bone, ow'okuliira haandi omumeesi wuno, omwiicha w'abatoosa b'omusolo neende abahola-mbi!’

³⁵Nae amakesi ka Nasaae obwadyeeri bwaako, bubonehera mu baandu bakafukiirira.”

³⁶Olwoola, Omufarisaayo wuundi yalaanga Yesu achie alye nae, mani Yesu yachia mu nyuumba y'Omufarisaayo oyo, mani yeehala ohulya nae.

³⁷ Mani bone, omuhasi wuundi owomu siko sihuluundu esyo, owali omuhola-mbi, yawulira ati Yesu ali ohulya mu nyuumba y'Omufarisaayo oyo, yeecha yaleeta echupa y'amafuta k'esing'aari siingi muno,

³⁸mani yeema emukoongo wa Yesu enamakulu wae n'alira, yachaaka ohudoonya amasika kae hu makulu ka Yesu, haandi nakapaangusa neende efwiiri yohumutwe kwae, mani yahoomba amakulu ka Yesu, haandi yamala yaakabaha amafuta k'esing'aari ako.

³⁹Nae bulaanu, Omufarisaayo wali n'alaangire Yesu niyabona atyo, yaboola mu mwooyo kwae ati, “Nikali mbwe omusaacha wuno munabbi mweene, aba amanyire muhasi w'engeri siina wuno oli ohumudiiraangaho, olwohuba muhola-mbi.”

⁴⁰Nae Yesu yamukobolamo n'aboola ati, “Simooni, ndi neende esiindu siindaha ohuhuboolera.” Nae Simooni yakobolamo ati, “Omweekesa, siindu siina syeene?”

⁴¹Yesu yamukanira ati, “Olwoola, omuundu wuundi yali neende abaandu babiri babaanja; mulala yali neende ekobi lya edinaari emia chitaanu, nae owuundi edinaari amahumi kataanu.

⁴²Nibyoola byabahaya ohutunga, yeecha yabalehera boombi. Bulaanu, ni naanu mweene hu boombi abo ochia ohumuheera muno?”

⁴³Simooni yakobolamo ati, “Mbaasa endi oyo, yiyaleheramo ebiingi.” Mani Yesu yamuboolera ati, “Ewe hane mbao oheengere omusaango bulai.”

⁴⁴Mani Yesu yakaluhaana yalingaala omuhasi oyo, mani yaboolera Simooni ati, “Obona omuhasi wuno? Ese nyiingire mu nyuumba yao muno, nae haba siwumbereese amaachi k'ohwoosa amakulu kaange, nae wuno adosere amakulu kaange neende amasika kae, haandi yakeeya neende efwiiri lyae.

⁴⁵Haba siwungwiireho mu sirifu, nae ohutula nyiingira muno, omuhasi wuno haba salehereho ohuhoomba amakulu.

⁴⁶Ewe haba s'obahireho omutwe kwaange amafuta k'emiseituuni koosi, nae omuhasi wuno abahire amakulu kaange neende amafuta k'esing'aari siingi muno.

⁴⁷Mani sakira huhuboolera endi, ebyonoono byae, biingi muno bityo, bimuleheerwe, olwohuba yekeese ohuheera huungi muno; nae oyo oleherwa ebidiidi, niye oweekesa ohuheera hudiidi.”

⁴⁸Yesu yaboolera omuhasi oyo ati, “Ebyonoono byao bihuleheerwe.”

⁴⁹Nae abo boosi abali nibali nae hu meesa, bachaaka ohuboolanira abeene-na-beene bati, “Wuno niye wiina, onyala ohulehera kata ebyonoono?”

⁵⁰Nae Yesu yaboolera omuhasi oyo ati, “Efukiirira yao lihuwoniisye; waao neende omuleembe.”