Read saamia Luka 8 Bible Online

Luka 8 - saamia bible

Luka 8

¹Ebyo nibyawa sa biti, Yesu yakeenda naabitira mu biko bihuluundu neende engoongo n'ayaala haandi n'aleetera abaandu Emboosi Ndai ch'obwaami bwa Nasaae. Yali ali neende abeeki bae ehumi-na-babiri (12),

² alala neende abahasi baandi abali baonisibwa ebihyeeno neende amadehere kataali nasilala. Abahasi bano nibo: Maria, olaangwa Magidalena, yi Yesu yali atusiremo emisaambwa chitaanu-na-chibiri,

³neende Yoana, omuhasi wa Kusa, omubiihi muhuluundu wa Herode, neende Susaana, neende abahasi baangi baandi, abahonyaanga Yesu neende abeeki bae nibatusa hu biindu bi beene bahalaabanaanga ohunyoola.

⁴Mani esidiiyiha sy'abaandu sihoongo nisyamala ohwebuusa alala, haandi abaandu baandi abatula mu biko bikabuhaane bosi nibeecha yali, Yesu yalomaloma nabo mu lukaado ati,

⁵“Olwoola, omulimi yacha ohuwaanya emwo yae. Mani niyali ayaanya, emwo yiindi yakwa hu ngira, mani yaasenakirwa mu makulu, mani haandi amayoni keecha kayiboocha yoosi.

⁶Nae emwo yiindi yakwa hu bikinaakina; mani niyachaaka ohuhula yiti, yooma, olwohuba haba siyali neende omunyiti.

⁷Nae emwo yiindi yakwa mu mawa; mani amawa kahulira alala nayo, mani kayifwiinyirira.

⁸Nae emwo yiindi yakwa mu loba lai mani yaahula, mani yaama ebyaamo amahabi emia ndala.” Niyamala ohuboola sa atyo, yeecha yahuumula n'aboola ati, “Oyo oli neende amatwi kawulira, leha awuliire.”

⁹Abeeki bae nibamuteeba amahuluundu k'olukaado luno,

¹⁰ Yesu yaboola ati, “Eng'we niing'we ababeresebwa ehabi y'ohumanya eby'engiso by'obwaami bwa Nasaae; nae eyiri abaandu baandi, bino biri mu ngaado sa, mani batingaale bahaye ohubona, haandi batekeerese bahaye ohuwulira.

¹¹“Bulaanu, amahuluundu k'olukaado lw'omuwaanyi niko kano: Emwo niyo Emboosi ya Nasaae.

¹²Emwo yakwa hu ngira, nibo abo abawulira; nae Sitaani yeecha yabatusaho emboosi chali mu myooyo kyaabwe, mani bahaye ohusuubira batawonisibwa.

¹³Nae emwo yiri hu bikinaakina nibo abo, abawulira emboosi, bayakaanira neende esangaalo; nae koti lu bataali neende emisi, basuubiraho hulw'esiha sidiidi, nae ebiha by'ohuteemwa nibyoola, nibabyekaana.

¹⁴Nae emwo yakwa mu mawa, nibo abo abawulira emboosi, nae ohwelalihirira neende ohubaasa hu buyiinda bw'esyaalo neende esangaalo ly'obulamu bifwiinyirira emboosi eyo, mani ebyaamo byaabwe sibihula byaangala.

¹⁵Nae emwo yakwa mu loba lai, nibo abo abawulira emboosi, bayidiira bulai muno neende obwadyeeri alala neende omwooyo mulai, mani baama ebyaamo mu hweesimiirisa hwaabwe.

¹⁶ “Abulao omuundu oba n'amalire ohuwaambia etaara, olifuniha mu simweero, oba yaalita mu lwalo w'esitaanda, nae alita hu siteeni syalyo, hulihosere abeengira mu nyuumba.

¹⁷ Olwohuba sibulao esiindu syoosi esyakiswa, esitahakisulwe, haandi, sibulao esiindu sy'omusyaama esitalimanyihana syatuswa alafu.

¹⁸ Mani mweliinde engeri yimuwuliriramo; olwohuba oyo oli nabyo, niye ochia ohumeedwaho ebiindi, nae oyo otaliho neende esiindu syoosi, kata neende syabaasa ati ali nasyo, bachia ohumumalaho.”

¹⁹Olwoola, ng'ina Yesu neende bamwaanang'ina beecha yali, nae haba sibanyala ohumwoolaho olwa esidiiyiha sihoongo.

²⁰Mani beecha baboolera Yesu bati, “Maakoo neende bamwaanamaao beemere erwaanyi, badaha ohuhubona.”

²¹Nae Yesu yababoolera ati, “Maama neende bamwaanama nibo abo abawulira emboosi ya Nasaae mani bayiholeraho.”

²²Ludaalo luundi, Yesu yeengira mu lyaato neende abeeki bae mani yababoolera ati, “Mulehe hwaambuhe huchie engereha w'enyaanja.” Mani bachaaka olukeendo,

²³nae nibali nibaambuha, Yesu yakona endoolo. Mani omuyaka kw'amaani kwawuucha nikwiihirira aasi mu nyaanja mani kwasiingisa amafwiinda keehubba hu bwaato, bweechula amaachi bwaaba aambi ohusihama.

²⁴Abeeki bachia bamusimusa nibaboola bati, “Omwaami, Omwaami, huli ohufwa!” Mani Yesu yasimuha, yahabuhira omuyaka alala neende amafwiinda; mani byeecha byayenjeera byanyita chi.

²⁵Yesu yababoolera ati, “Efukiirira yeng'we yiri yeena?” Mani obuti bwabadiira, mani bawuka muno nibaboolanira bati, “Nae wuno niye wiina, onyala ohulagira kata omuyaka neende amaachi, mani byamuwulira?”

²⁶Boola mu syaalo sya Geraseneesi, esitingalaane neende Galilaaya.

²⁷Nae Yesu niyali atula sa mu lyaato ati, abweene ao omusaacha wuundi, otula mu siko sihuluundu esyo oliho emisaambwa yamwoolaho; omusaacha oyo yali yamala embaka hoongo muno n'atefwalaangaho esiindu syoosi, haandi siyamenyaanga mu nyuumba yoosi ohutusaho, yamenyaanga mu biriindwa byoong'ene.

²⁸Omusaacha oyo niyabona Yesu ati, yobba wuwi mani yaakwa mu makulu wae, mani yahuumula mu kono ly'aakulu n'aboola ati, “Yesu, Omwaana wa Nasaae w'Aakulu Muno, on'ahole otye? Hwekweeda endi, otasaandya daawe.”

²⁹Olwohuba Yesu yali amalire ohulagira omusaambwa mubi okwo ohumutulamo. (Olwohuba omusaambwa okwo kwali kwanala ohumuniinaanga amahabi maangi; yali yalindwa buliindwa neende abasikaari, niyaboywa neende eminyororo alala neende epiingo, nae yahalakaanga sa eminyororo echo alala neende epiingo cheene, haandi omusaambwa okwo kwamwiirusaanga nikumuyira mu siparara.)

³⁰Yesu yamuteeba ati, “Eliita lyao nilyo naanu?” Nae yaboola ati, “Legioni”; olwohuba emisaambwa miingi muno chali nichimulimo.

³¹Mani emisaambwa echo nichekweeda Yesu atachilagira chachia emakoombe ekotero.

³²Nae bulaanu, eyiicho ly'embiichi sihoongo lyali niliri ohwayaanga aambi ao hu ndulo w'esigulu; mani emisaambwa echo cheecha chamwekweeda achilehe chichie chiingire mu mbiichi echo. Yesu yachileha chachia.

³³Mani emisaambwa echo nichitula mu musaacha oyo, chachia cheengira mu mbiichi echo, eyiicho ly'embiichi elyo lyoosi lyabbabuluha embiro lyehirira egenya, lyaweera mu nyaanja mani embiichi choosi be chasihama chafwa.

³⁴Nae abaayi b'embiichi nibabona ebyo, beeruha, bachia baasalaania emboosi echomu siko sihuluundu syoosi alala neende mu ngoongo.

³⁵Abaandu basiingira bachia ohubona esyali nisiholehaane, boola hu Yesu, babukaana omusaacha yi misaambwa chali chituliremo oyo, niyehaale mu makulu wa Yesu, niyefwaalire engubo, naali mwaaywe; mani nibatya muno.

³⁶Nae abo abali basibweene, baabakaniayira engeri yi musaacha waliho emisaambwa oyo, yawonisirwamo.

³⁷Abaandu boosi abali mu syaalo syebodohaanie Geraseneesi beecha bamusaba abatuleho; olwohuba bali batiire muno; Yesu yeengira mu lyaato mani yeekobolerayo.

³⁸Nae omusaacha yi misaambwa chatulamo oyo, yekweda Yesu ati, amufukiirire adoong'e nae; nae Yesu yamuseebula n'aboola ati,

³⁹“Kaluha engo, mani obaboolere alafu, obulai bu Nasaae ahuholeere yi bwaaka.” Yawaawo, n'ayaala mu siko sihuluundu esyo syoosi ebilai bi Yesu amuholeere koti lu byaaka.

⁴⁰Yesu niyakobola, esidiiyiha sy'abaandu syamwaakaanira, olwohuba boosi bali nibamuliindiriire.

⁴¹Abweene-na-bweene ao, omusaacha olaangwa Jairo yesi yoola. Jairo yali omuhuluundu wa Sinagoogi; mani niyoola eyiri Yesu, yamukwa mu makulu yamwekweeda yeeche mu nyuumba yae,

⁴²olwohuba yali ali neende omuhaana wae mulala yeeng'ene, owali aambi w'emyaaka ehumi neende chibiri eky'obuhuluundu, naali aambi ohufwa. Nae Yesu niyali hwakeenda naachia, abaandu bali bamweyindikanieho muno.

⁴³Nae, omuhasi wali n'amalire emyaaka ehumi neende chibiri n'alwaala obulwaae bw'ohudaachirira [7] haandi omuundu yeesi n'atanyalaangaho ohumuwonia,

⁴⁴yatulira enyuma, yoola hu Yesu, yadiira hu kemo ly'engubo yae; mani abweene-na-bweene ao, ohudaachirira hwae ohwo nihwaakama.

⁴⁵Nae Yesu yaboola ati, “Naanu oyo owuundiirireho?” Nae abaandu boosi nibekaana, Petero yaboola ati, “Omwaami, mbao esidiiyiha sy'abaandu sihwebodohaanie haandi siri ohuhudiiya!”

⁴⁶Nae Yesu yaboola ati, “Aliwo omuundu wuundirireho; olwohuba mbulira aliwo amaani kahaandulaho.”

⁴⁷Mani omuhasi oyo niyabona ati amanyihaane, n'atengereha, mani yaakwa mu makulu wa Yesu n'aboola emberi w'abaandu boosi esikerere n'amudiiraho, haandi koti lwawonere abwene-na-bweme n'amalire ohumudiiraho.

⁴⁸Nae Yesu yamuboolera ati, “Muhanaang'ene, efukiirira lyao lihuwoniisye; waao neende omuleembe.”

⁴⁹Yesu niyali n'asilomalomaanga, omusaacha wuundi ohutula mu daala ly'omutuki wula yoola mani yamuboolera ati, “Omuhaana wao amalire ohufwa; mani haandi otanyaahania Omweekesa.”

⁵⁰Nae Yesu niyawulira sino, yamukobolamo ati, “Otatya; fukiirira sa, mani omuhaana wao achia ohuba omulamu abweene.”

⁵¹Mani Yesu niyeecha yoola mu daala, siyafukiirira omuundu yeesi ohwiingira nae mu nyuumba, ohutusaho Petero neende Yowaana neende Yakobbo, neende laatang'ene neende ng'ina mwaana oyo.

⁵²Nae abaandu boosi badoong'a nibalira haandi nibachereenjesa hulw'omuhaana oyo; nae Yesu yaboola ati, “Mutalira; olwohuba haba saafwiire, nae ali ohukona.”

⁵³Nae abaandu bamucheha sa, olwohuba bali bamanyire bulai bweene bati, omuhaana oyo afwiire.

⁵⁴Mani Yesu yamudiira omuhono, yaamulaanga n'aboola ati, “mwaana ewe, siingira.”

⁵⁵Mani naakalusa omwooyo, nasiingiraniramo; mani Yesu yabakerakira ati bamubeereseho esiindu syohulya.

⁵⁶Mani abeebusi bae beecha besiinduha muno; nae Yesu yabalagira ati batabooleraho omuundu yeesi esyali nisiholehaane.