Read saamia Luka 9 Bible Online

Luka 9 - saamia bible

Luka 9

¹Yesu yalaanga ehumi-na-babiri abo bebuusa alala, mani yababeresa amaani neende obunyala bw'ohwiirusa emisaambwa kyoosi neende ohuwonia amalwaae,

²yabatuma bachie bayaale ebidiira hu bwaami bwa Nasaae alala neende ohuwonia abalwaae.

³Mani yababoolera ati, “mutakiingaho esiindu syoosi hu lukeendo lweeng'we kata, endabuhi, kata omufuuko, kata omugaati, kata eseende; haandi mutakiinga kata engubo chibiri.

⁴Enyuumba yoosi yimwiingiramo, mubecheenge omwo, ohwoola lu mwahatulemo nimuwaao.

⁵ Nae eyo yoosi yibatababukaanira, nimuba nimutula mu siko esyo, muteng'uleenge olufu luli hu makulu keeng'we, sibe esilolero esibakabuhania nabo.”

⁶Basiingira bawaao, bachia babita mu ngoongo, nibayaala Emboosi Ndai neende ohuwonia abaandu buli abuundu woosi yibacha.

⁷ Nae bulaanu, Herode omutuki w'esituundu sya Galilaaya, niyawulira ebyo byoosi ebyali biholehaane, yawuunga, olwohuba abaandu baandi bali baboola bati, Yowaana niye osyuuhire mu bafu,

⁸nae abaandi bati, Elija niye owali abonehane, nae abaandi bati, mulala hu banabbi bahale niye asyuhiire.

⁹Nae Herode yaboola ati, “Niise owatema hu Yowaana omutwe; nae wuno niye naanu yi mbulira nibalomalomaho ebiindu bino?” Mani yateemaho muno ati amuboneho.

¹⁰Abatume nibakobola, bachia baboolera Yesu bi bali nibaholere. Nae Yesu yababukula, yabayira endulo boong'ene mu siko sihuluundu silaangwa, Bbetisaida.

¹¹Nae esidiiyiha sy'abaandu nisyamanya sityo, syeecha syamuloondaho; mani Yesu yabaakanira, yababoolera ebidiira hu bwaami bwa Nasaae, haandi yawonia abo boosi abali nibadaha ohuwonisibwa.

¹²Nae obwiire nibwali nibuchaaka ohwiira; ehumi-na-babiri beecha eyiri Yesu bamuboolera bati, “Seebula esidiiyiha sy'abaandu sino siweeo, sichie mu ngoongo, neende mu syaalo sya aambi, bachie bakoonye owohukona, neende ewohunyoola ebiindu by'ohwehoonyera biindi; olwohuba huli mu syaalo sibulamo abaandu.”

¹³Nae Yesu yababoolera ati, “Eng'we beene mubaberese esiindu syohulya.” Nabo baboola bati, “Huli neende emigaati chitabita chitaanu, neende eng'eeni chibiri, ohutusaho nihuchia hwakulira abaandu bano boosi ebyohulya.”

¹⁴Olwohuba bali aambi abasaacha elifu chitaanu. Nae Yesu yaboolera abeeki bae ati, “Mubeehase aasi mubakabule mu buli mukaanda mubeemo abaandu aambi wa amahumi kataanu-kataanu.”

¹⁵Bahola batyo, mani beehasa abaandu boosi aasi.

¹⁶Yesu yabukula emigaati kitaanu ekyo, neende eng'eeni chibiri, yalingaala aakulu Muukulu, yabiberesa ehabi, yabidonyadonya, mani yabiberesa abeeki abo babikabire esidiiyiha sy'abaandu esyo.

¹⁷Boosi balya beekuta. Mani baabuusa ebidonye-donye bidoong'ereho, boosa ebimweero ehumi-na-bibiri.

¹⁸Olwoola, Yesu niyali nalaama Nasaae naali yeeng'ene alala neende abeeki bae; yabateeba ati, “Abaandu baboola bati, ese niise wiina?”

¹⁹ Nabo bakobolamo bati, “Yowaana Omubatiisi; nae abaandi baboola bati, Elija; haandi abaandi nabo bati mulala hu banabbi bahale niye osyuhire.”

²⁰ Nae yababoolera ati, “Nae eng'we muboola muti ese niise wiina?” Nae Petero yakobolamo ati, “Niiwe Kristo wa Nasaae.”

²¹Mani Yesu yabachwichwiisa muno batabooleraho omuundu yeesi,

²²n'aboola ati, “Omwaana w'Omuundu ahoyere ohusaanda mu biindu biingi muno, haandi abahuluundu b'enono neende abalaamisi bahuluundu, neende abaandiiki b'Amalako boole ohumwebwaaba, haandi bamwiite, mani hu ludaalo lwohudatu asyuhiswe.”

²³ Mani Yesu yaboolera abaandu boosi ati, “Omuundu yeesi n'adaha ohunoonda, leha mberi yefwirise omweene, mani akiinge omusalabba kwae buli ludaalo, mani yanoonde.

²⁴ Olwohuba omuundu yeesi odaha ohuwonia obulamu bwae omweene, achia ohubufwiirwa; nae oyo yeesi ofwiirwa obulamu bwae hulwaange, achia ohubuwonia.

²⁵Olwohuba ngaanga siina yi muundu anyoola, n'aba n'esyaalo syoosi, nae yafwiirwa oba yekosya omweene?

²⁶Olwohuba oyo yeesi owumaambirwa esoni alala neende emboosi chaange, oyo yesi niye yi Omwaana w'Omuundu achia ohuwambirwa esoni niyeecha mu luyaali lwae neende mu luyaali lwa Simwaana neende olwa bamalaika boolerefu.

²⁷Nae mbaboolera obwadyeeri bweene endi, aliwo abaandi abeemere ano bulaanu abatacha ohubonaho ohufwa nibatabona obwaami bwa Nasaae.”

²⁸Nae bulaanu, luunyuma lw'endaalo chitaanu-na-chidatu, Yesu n'amalire ohulomaloma ebiindu bino, yabukula Petero, neende Yowaana neende Yakobbo, mani yaniina nabo hu lugulu ohulaama.

²⁹Mani niyali nalaama, efwaani yae yakaluhanisibwa, mani ebyefwaalo byae byalafuya byamilamilana.

³⁰Nae boneho, abasaacha babiri, Musa neende Elija, balomaloma nae,

³¹bano babonehera mu luyaali haandi balomaloma hu huwaao hwae, huyali achia ohumaliirisira Yerusalemu.

³²Bulaanu Petero neende abaasye ba yali nabo, endoolo nyiingi chali chibairire, mani nibasimuha, babona oluyaali lwae alala neende abasaacha babiri abo nibeemere nae.

³³Mani abasaacha abo nibali hu balehana nae bati, Petero yaboolera Yesu ati, “Omwaami, silai muno efwe ohuba ano; leha hwoombahe ebikaali bidatu, silala esyao, esiindi esya Musa, nae esiindi esya Elija” (Yali s'amanyire bi yali alomaloma.)

³⁴Nae niyali hwasilomalomaanga atyo, esireesi syeecha, syababwiiha; mani nibali nibengira mu sireesi, batya muno.

³⁵ Nae ekono lyatula mu sireesi niliboola liti, “Wuno niye mwaana waange, Omulobole waange; [8] mumuwulireenge!”

³⁶Nae ekono elyo nilyamala ohulomaloma, Yesu yaboneha n'adoong'ere yeeng'ene. Abeeki badoong'a nibawuleerere, mani bahaya ohubooleraho omuundu yeesi mu ndaalo echo, esiindu syoosi si bali nibabweene.

³⁷Nae nibwahya, hu ludaalo luloondaho, nibamalire ohwiiha ohutula hu lugulu, esidiiyiha sy'abaandu sihoongo syeecha syabukaanana nae.

³⁸Mani boneho, omusaacha wuundi ohutula mu sidiyiiha yachaaka ohulira n'aboola ati, “Omweekesa, hwekweeda bonaho omwaana waange wuno, olwohuba niye omwaana waange yeeng'ene;

³⁹mani boneho, omusaambwa kumukwichaangaho, mani yesinduha n'alira lukali; kumumikaanga ohwoola lu abira efiro muhanwa, mani kumukuchuumbula muno, mani kuhaya ohumutulaho bwaangu.

⁴⁰Nae ndekweedere abeeki bao ohukwiirusa, nae sibanyalire.”

⁴¹Yesu yakobolamo ati, “Poo, oluse lubi luwuma efukiirira, ndahabe naang'we ohwoola liina, haandi ndahabesimiriise ohwoola liina? Leeta ano omwaana wao.”

⁴²Nae niyali ali ohwiicha, omusaambwa okwo kwamususuucha, mani kwaamumika. Nae Yesu yahabuhira omusaambwa okwo, mani yaonia omusyaani oyo, yaamukalusira laatang'ene.

⁴³Mani abaandu boosi baawuka muno amaani ka Nasaae. Nae abaandu boosi nibali basiwukaangaho ebyo byoosi bi Yesu yali n'aholere, yaboolera abeeki bae ati,

⁴⁴“Mulehe emboosi chino chiingire elalira mu matwi keeng'we; olwohuba Omwaana w'Omuundu achia ohudiiswa mu mahono k'abaandu.”

⁴⁵Nae nabo haba sibamanya amahuluundu k'enomanoma yino, haandi yali yibakisiibweho, bahaye ohuyimanya; haandi bali batiire ohumuteeba ebidiira hu nomanoma yino.

⁴⁶ Mani abeene-na-beene bachaaka ohuyingana nibateebana bati, wiina mweene ohiramo oluyaali?

⁴⁷Nae Yesu niyamanya embaasa yiri mu myooyo kyaabwe, yabukula omwaana muyere yaamusudya mu lubafu lwae,

⁴⁸ yababoolera ati, “Oyo yeesi owaakanira omwaana wuno mu liita lyaange aba yanjakaanira, haandi oyo yeesi owunjakaanira aba yaakaniire oyo owaanduma; olwohuba oyo ohiramo ohuba aasi mweeng'we, niye ohiramo oluyaali.”

⁴⁹Nae Yowaana yakobolamo ati, “Omwaami, hubweene omusaacha niyeerusaanga emisaambwa mu liita lyao mani hwamukayira, olwohuba haba saali mulala hweefwe.”

⁵⁰Nae Yesu yamuboolera ati, “Mutamukayira; olwohuba oyo yeesi otabayiingania aba ali alala naang'we.”

⁵¹Nae endaalo chae ch'ohukobolayo Muukulu nichasuda aambi, Yesu yahengao ohuchia Yerusalemu.

⁵²Mani yatuma bawamwaanda bae bachie mu moni wae, mani bachia beengira mu lukoongo lw'Abasamaria, ohumutekehera;

⁵³nae abaandu bamwo bahaya ohumwaakaanira, olwohuba yali aheengereo ohuchia Yerusalemu.

⁵⁴ Nae abeeki bae, Yakobbo neende Yowaana nibabona sino, baboola bati, “Omwaami, odaha hulaange omuliro kwiihe ohutula Muukulu, kubasihirise?” [9]

⁵⁵Nae Yesu yakaluhaana mani yaabahabuhira. [10]

⁵⁶Mani beecha bemeeda, bachia mu lukoongo luundi.

⁵⁷Nae nibali nibakeenda hu ngira, omuundu wuundi yeecha yaboolera Yesu ati, “Ese njia ohuhuloondaanga buli y'ochiira.”

⁵⁸Nae Yesu yamuboolera ati, “Amabbwe kali neende ameena, haandi amayoni kabburuha nako kali neende ebiyu; nae Omwaana w'Omuundu abulaho kata abuundu yaanyala ohugeeng'a omutwe kwae.”

⁵⁹Nae Yesu yaboolera omuundu owuundi ati, “Noonde.” Nae omuundu oyo yaboola ati, “Omwaami, leha mberi njie siihe laata yaange.”

⁶⁰Nae Yesu yamuboolera ati, “Leha abafu basiihe abafu baabwe; nae ewe, cha mani oyaale obwaami bwa Nasaae.”

⁶¹ Nae owuundi yaboola ati, “Omwaami, ese njia ohuhuloonda; nae leha mberi njie seebule abomu daala lyaange.”

⁶²Yesu yamuboolera ati, “Abulao omuundu yeesi, odiira embako y'eng'oombe ohulima, mani yobba amahemo, ohoyera obwaami bwa Nasaae.”