Read saamia Amalako Kohubiri 1 Bible Online

Amalako Kohubiri 1 - saamia bible

Amalako Kohubiri 1

¹Mu sitabo sino mulimo emboosi chi Musa yaboolera Abaisiraeli nibali mu sichiimi, ebukwe w'Omwaalo kwa Yorodaani. Bali nibali mu Hooho ya Yorodaani, aambi neende Sufi, akatikaati w'esiko sya Parani hu lwaande lulala, nae ebiko bya Tofeeli, Labbani, Haserooti, neende Disahaabbu hu lwaande luundi.

²(Siyirira omuundu endaalo ehumi neende lulala ohukeenda ohutula hu Lugulu lwa Sinai ohwoola mu Kadesi Bbarinea, n'obitiire hu ngira y'ebigulu bya Edomu.)

³Hu ludaalo lwataangira mu mwoosi kw'ehumi neende mulala, okw'omwaaka kw'amahumi kane ohutula nibatula mu Misiri, Musa yaboolera abaandu buli siindu si Omwaami yali niyamulagira ohubaboolera.

⁴ Sino syaluwo luunyuma lw'Omwaami n'amalire ohuyiingira Omutuki Sihooni omutuki w'Abaamoori, owali n'atuka mu siko sya Hesibboni, neende Omutuki Ogu owa Bbasani, owali n'atuka mu biko bya Asitarooti neende Edirei.

⁵Syali esiha si baandu bali nibasisiiri ebukwe w'Omwaalo kwa Yorodaani mu bwaami bwa Moabbu, yi Musa yachaakira ohutotolera amalako ka Nasaae neende enjekesa chae. Yaboola ati,

⁶“Nihwali nihuli hu Lugulu lwa Sinai, Omwaami Nasaae weefwe yatuboolera ati, ‘Eng'we mwahamenya luleeyi muno hu lugulu luno.

⁷Sakira sakuule ekaambi mutule ano muweeo. Muchie mu syaalo sy'ebigulu esy'Abaamoori haandi mu byaalo biindi bisyebodoohaanie ebyomu Hoondo ya Yorodaani, eyiri esyaalo sy'ebigulu neende mu byaalo byomu mahooho, mu situundu sy'emwaalo esyo, haandi neende mu bituundu byohu lwaasi lw'Enyaanja ya Mediterania. Muchie mu syaalo sya Kanani, neende ohubita Engulu cha Lebbanooni, ohwoolera elalira hu mwaalo muhunuufu muno Omwaalo kwa Ewufuraate.

⁸Ebyaalo bino byoosi nibyo ebyaalo bi ese Omwaami ndasuubisa ohuberesa bakuuka yeeng'we, Abburahamu, Yisaka, neende Yakobbo, neende abeechuhulu baabwe. Mani muchie mubimenyemo.’”

⁹Musa yaboolera abaandu ati, “Nihwali nihusisiiri hu Lugulu lwa Sinai, ndababooleraho endi, ‘Obunyala bw'ohubeemirira buuhira. Ese haba siinyala ohubeemirira syeeng'ene daawe.

¹⁰Omwaami Nasaae weeng'we abeengiiye muno, muli koti eng'ining'ini chiri hu kulu.

¹¹Omwaami, Nasaae wa bakuuka yeeng'we, ahoya yemeeda ohubahola mweengiya haandi amahabi elifu enaamba obuungi, haandi yaabahola mwayiindiyala koti lu yasuubisa.

¹²Nae ese syeeng'ene nyala endye ohukiinga omugugu musito kuno okw'obunyala bw'ohukayaanga amayiingani keeng'we?

¹³Doole abasaacha bakesi, abadiira ebiindu bwaangu, haandi abali neende obumanyirifu ohutula mu buli nono, mani njia ohubahola abeemeresi beeng'we.’

¹⁴Nae eng'we mwaangobolamu nimuboola muti, ‘Silai efwe huhole esiindu sy'oboolere.’

¹⁵Mani ese ndabukula abeemirisi b'enono cheeng'we, abasaacha bakesi haandi abamanyirifu, mani ndaabataao ohuba abeemirisi beeng'we, abahulira elifu, abahulira emia, abahulira amahumi kataanu, abahulira amahumi, neende abahoongo baandi abahulira enono cheeng'we.

¹⁶“Haandi mu biha ebyo, ndalagira abaheengi b'emisaango beeng'we nimboola endi, ‘Muwuliraanga obusoolo buli akatikaati w'abaluyia beeng'we, haandi muheengeenge omusaango mu buluungifu akatikaati w'omuundu neende mwaanang'ina oba neende echa walukeendwa yi muli nae.

¹⁷Mutabechaanga neende ohwehubbira nimuheenga emisaango; muwuliraanga emisaango midiidi neende emihoongo mu ngeri nasilala. Mutatichaanga omuundu yesi-yeesi ohweema hu mboneha yae, olwohuba Nasaae mweene niye omuheengi w'emisaango; nae omusaango kubahira, mukundeeteraanga, mani ese nguwulira.’

¹⁸Haandi mu biha ebyo, ndabalagira ebiindu byoosi bi muhoyere ohuhola.”

¹⁹Hweemao hwaatula hu lugulu lwa Sinai, hwaakeenda nihubita mu siparara sihoongo esyo haandi esitiisa koti lu mwabona, nihudiirire engira y'esyaalo sy'engulu sy'Abaamoori, koti lu Omwaami Nasaae weefwe yatulagira; mani nihwoola Kadesi Bbarinea.

²⁰Ndababoolera endi, “Mwoolere mu syaalo sy'engulu sy'Abaamoori, esyaalo si Omwaami Nasaae weefwe ali ohutuberesa.

²¹Bone, esyaalo si Omwaami Nasaae weeng'we abeekeese, mani muchie musiyire sibe esyeeng'we, koti lu Mwaani Nasaae wa bakuuka yeeng'we yababoolera. Mutatya daawe haandi mutawaamo omwooyo.”

²²“Mani eng'we mwesi-mweesi nimusuda aambi naange nimumboolera muti, ‘Leha mberi hutumehooyo abaandu bataangire bachie batulambuulire esyaalo esyo, mani bakobole batuboolere engira yi huhoyere ohubitiraho neende ebiko bi hunaanyooleyo.’

²³“Ndabona endi esyo silai nisyo, mani nindoolamo abasaacha ehumi-na-babiri ohubatulamo, buli mulala ohutula mu buli nono.

²⁴Basiingira baachia mu syaalo sy'engulu esyo, mani boola mu hooho ly'Esikoli baalilambuula.

²⁵Banokayo hu byaamo byomu syaalo esyo baatuleetera, haandi baatuleetera emboosi, nibatuboolera bati, ‘Esyaalo si Omwaami Nasaae weefwe ali ohutuberesa silai muno.’

²⁶ “Nae eng'we mwajeemera amalako k'Omwaami Nasaae weeng'we, mwaahaya ohuchia ohusiingiramo.

²⁷Mweekanyirisiraanga sa mu mayeema keeng'we, nimuboola muti, ‘Olwohuba Omwaami yatusyuula, sakira yatutusa mu syaalo sy'e Misiri, mani yaatuta mu bunyala bw'Abaamoori, batusihirise.

²⁸Huchia yeena bweene eyo? Abasyeefwe batumaliremo amaani nibaboola bati: Abaandu b'eyo ni rahula nikyo haandi kileeyi muno ohutuhira; ebiko byaabwe bihoongo haandi byasitwaho olukaka luleeyi ohwoola hu kulu; haandi bati babweeneo abaana ba Anakimu.’

²⁹“Mani ndababoolera endi, ‘Mutawaamo amaani haandi mutabatya daawe.

³⁰Omwaami Nasaae weeng'we achia ohubeemirira haandi omweene niye ochia ohubalwaanira, koti sa lu mwabona naabalwaanira mu Misiri,

³¹neende mu siparara, yi mubweene Omwaami Nasaae weeng'we naabakiinga, koti omuundu yahakiinga omwaana wae, buli yi mwachiiraanga yoosi hu lukeendo lweeng'we ohwoola lu mwoolera abuundu ano.’

³²Nae kata ebiindu ebyo nibyali bityo, eng'we mwahaya ohufukiirira Omwaami Nasaae weeng'we,

³³owabeemiriramo ohubakoonyera abuundu yi munyala ohwoombaha amayeema keeng'we. Esiro yabechaanga naang'we ohubitira mu muliro naabahosera engira yi muhoyere ohuchiiraho, nae esideete yeecheraanga mu sireesi.

³⁴ “Omwaami yawulira ohwekanyiirisa hweeng'we yaanyoolera, mani niyechuba n'aboola ati,

³⁵‘Abulao omuundu kata mulala ow'oluse lubi luno ochia ohubonaho esyaalo silai si ndeechuba ohuberesa bakuuka yeeng'we,

³⁶ohutusaho Kalebbu omwaana wa Yefune. Oyo niye ochia ohusibona, haandi njia ohumuberesa alala neende abaana bae esyaalo si alambuulire, olwohuba yawulira Omwaami neende omwooyo kwoosi.’

³⁷Haandi hulweeng'we, syesi Omwaami yaanyoolerera, mani yaaboola ati, ‘Weesi haba s'ocha ohwiingira mu syaalo esyo.

³⁸Nae Yosua omwaana wa Nuuni, oweemere mu moni wao oyo, achia ohusiingiramo. Sakira mugumie omwooyo, olwohuba achia ohwiimirira Abaisiraeli abahoonye bayire haandi batuke esyaalo esyo.’

³⁹“Haandi abaana beeng'we abo, ba mwaboola muti bachia ohunyakwa, neende abaana beeng'we abatoola ohwaawulamo esilai neende esibi, nibo abachia ohusiingiramo, mani basiyire sibe esyaabwe.

⁴⁰Nae eng'we, mukaluuhane, mani mukeende nimukobola mu siparara nimwiihirira ena Enyaanja Njahanyu.

⁴¹“Mwangobolamo nimuboola muti, ‘Hwonoona mu moni w'Omwaami; huchia ohuchia hulwaane, koti sa lu Omwaami Nasaae weefwe yatulagira.’ Mani buli muundu hweeng'we niyefwaala eby'ohulwaana byae, mani mwabaasa muti syaangu nisyo ohuseeta esyaalo sy'engulu esyo.

⁴²“Nae Omwaami yamboolera ati, Baboolere oti, ‘Batacha oba baalwaana, olwohuba ese haba si ndi alala nabo; ataali ao, abasuku beeng'we bachia ohubayiingira.’

⁴³Ndalomaloma naang'we, nae mwaahaya ohuwulira, mani mwaajeemera Omwaami, mwayiinga mwaachia mu syaalo sy'engulu.

⁴⁴Mani Abaamoori abali nibamenya mu syaalo sy'engulu esyo, babaseeta baaboongaho nibatabuuhe koti lu njuhi chiholaanga, babahuya aasi mu Seyiri ohwoolera elalira Haruma.

⁴⁵Mwalirira Omwaami abahoonye, nae Omwaami haba siyawulira amaliro keeng'we mani naahaya ohubadeebaho.”

⁴⁶“Mwadoong'a mu Kadesi endaalo nyiingi muno, ohweema hu biha bi mwamalayo.”