Read saamia Amalako Kohubiri 10 Bible Online

Amalako Kohubiri 10 - saamia bible

Amalako Kohubiri 10

¹Mu biha ebyo, Omwaami yamboolera ati: Baacha ebipaande bibiri eby'amakina by'ohwandiikaho, ebiri koti ebyataangira, mani ohole esanduuku ly'embaao, haandi wiiche yi ndi hu lugulu.

²Njia ohwandiika hu bipaande ebyo emboosi chali hu bipaande byataangira bi waata bira, mani ochia ohubita mu sanduuku.

³Ndahola esanduuku ly'embaao ch'omutuumba. Ndabaacha ebipaande by'amakina biri koti ebyataangira, ndaaniina hu lugulu ni ndi neende ebipaande bibiri ebyomu mahono kaange.

⁴Omwaami mani niyaandiika hu bipaande ebyo, ebiri koti bi yataangira ohwandiika, amalako ehumi ka Omwaami yali alomaloome naang'we n'ali mu muliro hu ludaalo lu mwebuusira alala nimuli hu lugulu, Omwaami n'abiimberesa.

⁵Ndakaluuhana, ndeehirira nindula hu lugulu, mani ndaageeng'a ebipaande ebyomu sanduuku li ndali niholere; biri omwo koti lu Omwaami yandagira.

⁶(Abaisiraeli bakeenda nibatula hu sulo ch'abaana ba Yaakani ohwoola Mosera. Arooni yafwiira eyo, haandi eyo niyo yi bamusiiha. Eliasaari omwaana wae niye owamukobola mu makulu koti omulaamisi.

⁷Ohutula Mosera, Abaisiraeli bakeenda nibachia Gudigooda, haandi ohutula Gudigooda bachia Yotibbata, esyaalo sirimo emyaalo ky'amaachi.

⁸ Ebiha ebyo, Omwaami yali niyawuulemo enono ya Leefi ohukiingaanga Esanduuku ly'Endagaano y'Omwaami, neende ohweemaanga mu moni w'Omwaami nibamuhalaabanira, neende ohuberesaanga abaandu ehabi mu liita ly'Omwaami, ohwoola buti.

⁹Mani sakira enono ya Leefi yitanyoola omukabo kw'eloba koti abanaluyia baabwe baandi, Omwaami niye omukabo kwaabwe, koti lu Omwaami Nasaae yasuubisa.)

¹⁰ “Ndadoong'a hu lugulu endaalo amahumi kane neende ebiro amahumi kane, koti lu ndahola ehabi lyataangira. Ehabi elyo lyosi, Omwaami yawulira esiindu si ndamusaba; mani yaahaya ohubasihirisa.

¹¹Nae Omwaami yamboolera ati, ‘Siingira wemeede neende olukeendo lwao niwiimiriire abaandu bano, banyale ohwiingira mu syaalo si ndeechuba ohuberesa bakuuka yaabwe, mani musituke.’

¹²“Mani bulaanu, eng'we Abaisiraeli, siina syeene si Omwaami Nasaae weeng'we abadahaho, ohutusaho, ohumwiisaangamo oluyaali; neende ohuloondaanga amalako kae, ohumuheera neende ohumuhalaabaniraanga neende emyooyo kyeeng'we kyoosi neende obulamu bweeng'we bwoosi.

¹³Haandi neende ohuloondaanga ebilagiro neende amalako k'Omwaami ka mbalagira enyaanga yino hulw'obulai bweeng'we?

¹⁴Bone, ekulu lyoosi yi lyakiire neende aakulu w'ekulu, neende esyaalo neende buli siindu sisirimo, by'Omwaami Nasaae weeng'we.

¹⁵Nae Omwaami yachuunirwa bakuuka yeeng'we mani yaabaheera muno, yadoola abeechuhulu baabwe mu baandu boosi, ohwoola buti.

¹⁶Mani sakira, muwulireenge Omwaami neende emyooyo kyeeng'we kyoosi haandi muhayeenge ohuba abaandu b'emyooyo myoomeranu.

¹⁷Olwohuba Omwaani Nasaae weeng'we w'oluyaali muno ohuhira banasaae baandi, haandi niye Omwaami w'abatuki boosi. Omwaami muhunuufu niye, w'amaani mweene haandi atiisa muno. Omwaami haba sakwiiraanga omuundu yeesi oba akuliirirwa.

¹⁸Aheengeraanga bamulehwa neende abahasi bafwiirwe emisaango mubwadyeeri, haandi achuunirwaanga bawalukeendwa, mani ababeresa ebyohulya neende eby'ohwefwaala.

¹⁹Sakira muheereenge bawalukeendwa; olwohuba eng'we mwesi mwaliho bawalukeendwa mu Misiri.

²⁰Mwiiseenge oluyaali mu Omwaami Nasaae weeng'we; mumuhalaabanireenge haandi mumwomiirireengeho, mani mweechubaanga nimwehoonyera eliita lyae.

²¹Omwaami niye efuma yeeng'we haandi niye Nasaae weeng'we, niye owahola ebiindu by'amaani haandi ebitiisa bino, bi beene mweeboneraho n'ahola.

²²Bakuuka yeeng'we bachia Misiri nibali abaandu amahumi kataanu-na-kabiri; nae Omwaami Nasaae weeng'we abaholere mweengiya mwaaba koti eng'ining'ini chomu kulu.