Read saamia Amalako Kohubiri 11 Bible Online

Amalako Kohubiri 11 - saamia bible

Amalako Kohubiri 11

¹“Sakira heereenge Omwaami Nasaae weeng'we, haandi loondeenge amalako kae neende ebilagiro byae neende engeraka yae endaalo choosi.

²Haandi mumanyeenge enyaanga yino (muti haba si ndi hulomaloma neende abaana beeng'we abasisiiri ohuumanya oba abatabonaho ebiindu by'amaani bi yahola). Haandi mweeke ebidiira hu Omwaami, Nasaae weeng'we, obunyala bwae, amaani kae, neende obuhunuufu bwae,

³obulolero bwae neende eby'amayia bi yahola mu Misiri, eyiri omutuki wa Misiri neende abomu syaalo syae syoosi.

⁴Mwabona koti lu yahola eye lya Misiri, neende efaraasi chaabwe neende ebigaari byaabwe; koti lu yahola amaachi k'Enyaanja Njahanyu kaabamira nibali nibabaloondaho, haandi koti lu Omwaami yabasihirisira elalira ohwoola buti.

⁵Mumanyire ebiindu bi Omwaami yabaholera mu siparara, ohwoola lu mwoolera abuundu ano.

⁶ Haandi mwiichulise bi Omwaami yaholera Datani neende Abbiramu omwaana wa Eliabbu, omwaana wa Rubbeeni. Koti lu loba lyeekuhao mani lyaabamira boosi, alala neende abomu madaala kaabwe, neende amayeema kaabwe, neende buli siindu silamu si bali nasyo.

⁷Mubwadyeeri bweene, abeene mweeboneraho ebiindu bihunuufu bi Omwaami yahola.

⁸“Mani sakira muloondeenge amalako ka mbalagira enyaanga yino, hu munyale ohubechaanga ab'amaani, haandi muchie mwiingire haandi muyire esyaalo si muchia ohutuka.

⁹Muchia ohuyiindira mu syaalo si Omwaami yeechuba ohuberesa bakuuka yeeng'we neende abeechuhulu baabwe, esyaalo silai haandi esiyiinda, esihulukusamo amabeere neende obuuhi.

¹⁰Olwohuba esyaalo si muli aambi ohwiingiramo mani musituke haba sisiri koti esyaalo sya Misiri, si mwatulamo, yi mwataakaanga emwo mani mudidiihana ohuchichuhiirira, koti lu mwahachuhiirira endalo ch'elyaani.

¹¹Nae esyaalo si muli ohuchia ohuyira mani musituke, syaalo sy'engulu haandi sy'ehooho nisyo, esinyoola amaachi ohutula hu fula yikwa niyitula Muukulu.

¹²Esyaalo si Omwaami Nasaae weeng'we adeebaho; buli siha, Omwaami Nasaae weeng'we adeeba hu syaalo esyo ebiha byoosi, ohutula omwaaka nikuchaaka ohwoola nikuwa.

¹³ “Nae nimudiira ebilagiro byaange bi mbalagira enyaanga yino, mani mwaheeraanga Omwaami Nasaae weeng'we, haandi mumuhalaabaniraanga neende emyooyo kyeeng'we kyoosi neende obulamu bweeng'we bwoosi,

¹⁴mba njia ohukwiisaanga efula mu syaalo syeeng'we mu biha bihoyera, efula y'etoocho neende ey'esiruumbi, hu munyale ohubechaanga neende ekesa lai neende efiini, neende amafuta.

¹⁵Omwaami aba achia ohuberesaanga ebyaayo byeeng'we obunyaasi, mani muba neende ebyohulya bimala.

¹⁶Mweliinde muhaye ohweebacha mu myooyo kyeeng'we, mwaakaluuhana ohutula eyiri Omwaami mani mwaachaaka ohuhalaabanira banasaae baandi nimubeenamira.

¹⁷Etima ly'Omwaami liba lichia ohubasiingiriraho, mani yeekale ekulu, efula yihaye ohukwa, esyaalo syoome, emwo cheeng'we chihaye ohwaama, mani musihirire bwaangu ohutula mu syaalo silai si Omwaami ali ohubaberesa.

¹⁸ “Sakira mudireenge emboosi chaange chino mu myooyo kyeeng'we neende mu bulamu bweeng'we; muchiboyeenge hu mahono keeng'we haandi muchesaateenge hu bweeni bweeng'we.

¹⁹Mucheekeseenge abaana beeng'we, nimuchilomalomaho nimuli mu madaala keeng'we, nimukeenda hu ngira, neende nimweyaliise, oba nimusiingira.

²⁰Muchaandiikeenge hu milyaango ky'enyuumba cheeng'we neende hu biruwa by'amadaala keeng'we.

²¹Nimuhola mutyo, hu ndaalo cheeng'we neende ech'abaana beeng'we chiba chineengiya nimuli mu syaalo si Omwaami yechuba ohuberesa bakuuka yeeng'we, ebiha byoosi bi ekulu lyahamale niliri aakulu w'esyaalo.

²²Olwohuba mwahadiire bulai ebilagiro bino byoosi bi mbalagiire endi muhole, ohuheeraanga Omwaami Nasaae weeng'we, nimuhola ebyo byoosi by'abalagira haandi nimumwoomiiriraho.

²³Nimuhola mutyo, Omwaami aba achia ohwiirusa abaandu baandi abatuse mu syaalo esyo, mani musibukule, mutuke esyaalo sihoongo haandi esy'amaani ohubahira esyo.

²⁴Buli abuundu yi munaaseneenge ohukulu, achia ohubechaanga aweeng'we; olwaaho lw'eloba lyeeng'we luchia ohutulaanga mu siparara neende Lebbanooni haandi ohutulaanga hu mwaalo kwa Ewufuraate, ohwoola hu nyaanja Mediterania eyiri emuumbo.

²⁵Abulao omuundu ochia ohunyalaanga ohubayiingania; olwohuba buli yi munaachicheenge, Omwaami achia ohukeraanga abaandu bomu syaalo esyo ni babeesamo oluyaali haandi neende ohubatya hwosi, koti lu yabasuubisa.

²⁶“Bone, mbao mbatereereo ehabi neende esibwaabo.

²⁷Munanyooleenge ehabi nimudiira amalako k'Omwaami Nasaae weeng'we ka mbalagira enyaanga yino.

²⁸Nae munanyooleenge esibwaabo, nimuhaya ohudiira amalako k'Omwaami Nasaae weeng'we, mani mwaakaluuhana nimutula hu malako k'Omwaami ka mbalagiire enyaanga yino, mwachaaka ohuloondakana neende banasaae baandi ba mutaamanyire.

²⁹Nae Omwaami Nasaae weeng'we n'abaleeta mu syaalo si muli ohwiingiramo mani mwaasiyira syaaba esyeeng'we, muchia ohulaangiriraanga ehabi nimuli hu lugulu lwa Gerisimu, nae mulaangirireenge esibwaabo nimuli hu lugulu lwa Ebbali.

³⁰Engulu echo choombi chiri niwambuuhe omwaalo kwa Yorudaani, emuumbo w'engira, eyihirira niyichia emuumbo, mu syaalo sy'Abakanani abamenya mu Arabba, esiri aambi neende Giligaali, olwaande lw'emisaala myoolerefu cha Moore.

³¹Olwohuba muli aambi ohwambuha omwaalo kwa Yorudaani, mubukule esyaalo si Omwaami Nasaae weeng'we ali ohubaberesa. Nae nimusituka, mwaasimenyamo,

³²mwehaliiriseenge bulai mudiiraanga amalako neende ebilagiro bi mbaberesa enyaanga yino byoosi.