Read saamia Amalako Kohubiri 13 Bible Online

Amalako Kohubiri 13 - saamia bible

Amalako Kohubiri 13

¹“Nimwiichuhiraanga mwaaba neende omunabbi, oba omuundu otuumbula amahuluundu k'ebilooto, babasuubisa obulolero neende eby'amayia,

²mani obulolero obwo neende eby'amayia by'ababoolera byoolerera abweene, haandi n'ababoolera ati, ‘Leha hwiinamire banasaae baandi,’ ba musisiiri ohumanya, ‘mani hubahalaabanire.’

³Mutatekeeresaanga emboosi ch'omunabbi oyo oba omutuumbuli w'ebilooto oyo. Olwohuba Omwaami Nasaae weeng'we ali ohubateema sa, abone nikali mbwe mwaheera Omwaami Nasaae weeng'we neende emyooyo kyeeng'we kyoosi, neende obulamu bweeng'we bwoosi.

⁴Muloondakaneenge neende Omwaami Nasaae weeng'we nimumwiisamo oluyaali. Mudiireenge amalako kae haandi muwulireenge ekono lyae, mani mumuhalaabanira haandi mumwoomiiriraho.

⁵Nae omunabbi oyo oba omutuumbuli w'ebilooto oyo achia ohwiitwa, olwohuba aba yekesa abaandu ohujeemera Omwaami Nasaae weeng'we, owabatusa mu syaalo sya Misiri, haandi owabanunula ohutula mu buwaambe bu mwalimo, mani yaakera mwaaleha engira yi Omwaami Nasaae weeng'we yabalagira ohudiiraanga. Sakira ahoyera ohwiitwa, hu mweetuseho esyonoono esyo.

⁶“Kata neende mwaanamao, oyo yi mutula mu nda ndala nae, oba omwaana wao musyaani, oba omwaana wao muhaana, oba omuhasi wao yi waheera muno, oba omwiicha wao mweene, n'ahuseendaseenda mani yaababoolera mu syaama ati, ‘Lehe huchie huhalaabanire banasaae baandi,’ ba eng'we noomba bakuuka yeeng'we bataamanyire, mutakanyaanga haba.

⁷Abaandi banyala ohubaseendaseenda ohwiinamiraanga banasaae b'abaandu babeebodoohaanie, banyala ohuba nibamenya aambi naang'we oba eyale, ohutula hu lwaande lulala lw'esyaalo ohwoola hu luundi.

⁸Nae mufukiiriraanga ebyaabwe oba mwaatekeeresa bi baboola, oba mwaabakwiira esisa, oba mwaabaleha, oba mwaabakayirira.

⁹Nae mubeeteenge, haandi mubecheenge abaamberi ohubahuya, hu baandu baandi nibaloondaho ohubahuya.

¹⁰Mubahuyeenge neende amakina olwohuba bateema ohubatusa hu ngira w'Omwaami Nasaae weeng'we, oyo owabatusa mu syaalo sya Misiri, yi mwali koti abawaambe.

¹¹Mani Abaisiraeli boosi bahawulire, mani baatya, haandi bahaya ohuholaho esiindu sibi muno koti sino.

¹²“Nimuwulira mu silala hu biko byeeng'we, si Omwaami Nasaae weeng'we ali ohubaberesa ohumenyamo,

¹³muti baluwo abaandu beeng'we baandi ababatulireho haandi bamalire ohuseendaseenda abaandu bamenya mu siko esyo nibababoolera bati, ‘Lehe huchie mani huhalaabanire banasaae baandi,’ ba mutaamanyireho,

¹⁴muba muchia ohwehaliirisa mani mukoonyerese haandi muteeberese neende ohwegeenderesa muno, nae bone, nisiri esyadyeeri haandi syamanyihana siti esiindu sy'omusiro nisyo esibaholehanemo,

¹⁵mutalehaanga ohwiita abaandu bamenya mu siko esyo neende olugaanga, mani musihirisira elalira esiko esyo, alala neende abaandu basyo, neende eng'oombe chamwo choosi.

¹⁶Ebiindu byomu siko esyo byoosi mubihung'aanisiraanga alala akatikaati w'esipaapi sy'esiko esyo mani musaamba esiko esyo alala neende ebiindu byamwo byoosi, koti lu mwahasaambira Omwaami Nasaae weeng'we esiyaanwa sisaambe syoosi. Esiko esyo siba sichia ohudoong'a ao koti esituuli endaalo choosi, ataali ohwoombahwaho ehabi liindi.

¹⁷Haba mutabukulaangaho esiindu syosi-syoosi hu biindu bi babalagira ohusihirisa, hu Omwaami ahaye ohubadiirira etima lyae liingi, nae abakwiire esisa, abaleheremo, haandi abeengiye, koti lu yechubira bakuuka yeeng'we.

¹⁸Munaholerwa sa bino nikali mbwe muwulira Omwaami Nasaae weeng'we haandi mudiira amalako kae koosi ka mbalagira enyaanga yino, haandi nimuhola ebiindu bilai mu moni wae.