Read saamia Amalako Kohubiri 17 Bible Online

Amalako Kohubiri 17 - saamia bible

Amalako Kohubiri 17

¹“Mutayaaniraanga Omwaami Nasaae weeng'we eng'oombe oba ekoondi liriho obufwoolwa bwoosi oba esiindu syoosi esitaali esilai; olwohuba sy'omusiro eyiri Omwaami Nasaae weeng'we.

²“Niyinabecheengeo omusaacha oba omuhasi mu biko byeeng'we bi Omwaami Nasaae weeng'we ali ohubaberesa, owonoona mu moni w'Omwaami Nasaae weeng'we, yafunaka endagaano yae,

³mani yahalaabanira banasaae baandi haandi yabeenamira, oba elyuuba oba omwoosi oba ndala hu ng'ining'ini, mani yaayiingania amalako k'Omwaami.

⁴Nibababooleraho haandi mwaasiwuliraho; muteebereseenge bulai bweene. Nae nisiba esyadyeeri ataali ohweteeba-teebanaho mbwe esiindu sy'omusiro siri siti syaholehanaho mu Yisiraeli,

⁵mani omusaacha oyo oba omuhasi oyo oholere esiindu sibi esyo, mumutusaanga erwaanyi w'ebiruwa byeeng'we, mumuhuya neende amakina mumwiita afwa.

⁶ Nae, achia ohwiitwaanga n'aliwo obuloli bw'abaandu babiri oba badatu. Omuundu yeesi ateetwaanga neende obuloli bw'omuundu mulala yeeng'ene.

⁷ Abaloli abo nibo abanataangireenge ohumuhuya amakina k'ohumwiita, hu baandu badoong'ereo baandi bosi bamuhuya amakina. Mu ngeri yifwaana yityo, niyo yi munetusireengeho esyonoono esyo.

⁸“Niyinaabecheengeo emisaango kiindi midinyu ekihira abakayi bomu biko byeeng'we ohuheenga, koti okw'ohuyiinganira emyaandu, oba okw'ohunyayaala abaandu oba emisaango kidiira hu butemo bw'ohwiita omuundu neende ohwiita omuundu ataali echoomo. Ao muba muchia ohusiingiraanga muchie abuundu yi Omwaami Nasaae weeng'we achia ohudoola.

⁹Muba muchia ohuyiraanga omusaango okwo eyiri abalaamisi Baleefi, neende eyiri omukayi oli hu mulimo mu ndaalo echo, mani mubeteebaho engeri y'ohuheengeramo omusaango, mani bababoolera esyohuhola.

¹⁰Munaholaanga ohuchianakana neende sibabaheengereo nimuli abuundu yi Omwaami yahabe n'adoolere. Mweehalirise ohuholaanga nimuchaanakana neende ebyo byoosi bibabalagiire.

¹¹Munafukiirireenge engeraka chi banaabe nibababereese, haandi ohuchianakana neende eheenga y'omusaango yi baheengereo. Mufukiirireenge ataali ohukaluuhana-kaluuhana hwoosi oba ohwehubbira olwaande lwoosi.

¹²Omuundu yeesi onaholeenge esyeejo mani ahaya ohuwulira omulaamisi ohalaabanira Omwaami Nasaae weeng'we, oba otawulira omukayi, aba ahoyere ohufwa; mani mu ngeri eyo, muba muchia ohumalao esyonoono mu Yisiraeli,

¹³Olwo abaandu boosi baba bachia ohuwuliraanga haandi batya, ahaya ohubahoo omuundu ohola esyeejo haandi.

¹⁴ “Nimwahoole mu syaalo si Omwaami Nasaae weeng'we sy'ababeresa, musituke haandi musimenyemo, mani mumale muboole muti, ‘Hweteereo omutuki koti ebyaalo biindi byoosi ebitwebodoohaanie’.

¹⁵Mwehaliiriseenge mberi mubona muti oyo niye yi Omwaami Nasaae weeng'we yedooleere. Mutecheengeyo mulala hu banaluyia beeng'we. Mutadoolaanga omuteende ohubatuka, oyo otaali omunaluyia weeng'we.

¹⁶Ohutusaho, omutuki haba s'ahoyere ohwenyoolera efaraasi nyiingi, oba yaateemaho ohukobosa abaandu mu Misiri hu anyale ohwemeeda ohunyoola efaraasi nyiingi, olwohuba Omwaami yababoolera ati, ‘Mutakobolangayo haandi.’

¹⁷Omutuki haba s'ahoyera ohudeehyaanga abahasi baangi, hu mwooyo kwae kuhaye ohutula hu Omwaami, haandi saahoyere ohuba omuyiinda muno naali neende efeesa neende esaabbu.

¹⁸“Haandi niyeehala hu sisaala sy'obutuki syae, achia ohweyandiikira omweene amalako kano mu sitabo n'akatusa hu k'abalaamisi Baleefi.

¹⁹Esitabo esyo sinabecheenge aambi nae ebiha byoosi, haandi anaasisomeenge endaalo ch'obulamu bwae bwoosi, hu anyale ohwiisaanga oluyaali mu Omwaami Nasaae wae, n'adiira emboosi choosi ech'amalako kano neende ebilagiro bino, haandi neende ohubyoseresaanga.

²⁰Omwooyo kwae kuhaye ohweeninisiraanga hu Baisiraeli baasye, haandi ahaye ohwebwaabaanga kata nabudiidi ebilagiro bino, oba yaabaaho neende ohwehubbira hwoosi; hu anyale ohuyiindira mu butuki bwae, omweene neende abaana bae, mu Yisiraeli.