Read saamia Amalako Kohubiri 18 Bible Online

Amalako Kohubiri 18 - saamia bible

Amalako Kohubiri 18

¹“Abalaamisi b'enono y'Abaleefi haba sibanabecheenge neende omukabo kw'eloba mu Yisiraeli; nae banaalicheenge hu biyaanwa bisaambirwa Omwaami, neende hu biyaanwa by'Omwaami biindi ebihoyerwa ohumuyaanirwa.

² Haba sibanabecheenge neende omukabo kw'eloba koti enono chiindi; Omwaami niye onabecheenge omukabo kwaabwe, koti lu yabasuubisa.

³Mani kuno nikwo okunabecheenge omukabo kw'abalaamisi ohutula eyiri abaandu, ohutula eyiri abo abayaana ebiyaanwa, kata yahaba eng'oombe oba ekoondi. Banaabereseenge omulaamisi oluliho, esaya choombi neende amasoombo.

⁴Abalaamisi munaababereseenge ebituundu bitaangira eby'ekesa lyeeng'we, eby'efiini yeeng'we neende eby'amafuta keeng'we, neende obwooya bu mutaangira ohubeka hu makoondi keeng'we.

⁵Omwaami Nasaae weeng'we yabadoola ohutula hu nono choosi, ohweema mu moni wae haandi ohuhalaabaniraanga mu liita ly'Omwaami, omulaamisi neende abaana bae endaalo choosi.

⁶“Buli Muleefi onadaheenge ohutula mu siko syeeng'we syoosi si yamenyamo mu Yisiraeli mwoosi, niyekoomba ohuchia abuundu yi Omwaami achia ohudoola,

⁷achia ohuhalaabaniraanga mu liita ly'Omwaami Nasaae wae, koti Abaleefi baasye baandi boosi beema mu moni w'Omwaami.

⁸Bananyoolaanga omukabo kw'ebyohulya kwaaka koti okwabaasye, n'otameedereho kwananyoleenge ohutula hu banaluyia bae.

⁹“Nimwahamale ohwiingira mu syaalo si Omwaami Nasaae weeng'we ali ohubaberesa, mutateemangaho ohuloondakana neende emisiro ky'abaandu bomu byaalo ebyo.

¹⁰ Leha abuleo mulala hweeng'we onayaanengeyo omwaana wae musyaani oba omuhaana koti esiyaanwa sisaambwa oba omuundu yeesi hweeng'we aholaho eby'obulakusi neende eby'eloko.

¹¹ Abuleo omuundu weeboya eyiriisi, oba olaanga emisaambwa ky'abaandu bafwa.

¹²Olwohuba omuundu ohola ebiindu bifwaana biti, aba ow'omufuto mu moni w'Omwaami, haandi Omwaami Nasaae weeng'we s'adaha abaandu bahola eby'emisiro bino. Sino nisyo esiri ohukera Omwaami Nasaae weeng'we niyeerusa abaandu bomu byaalo ebyo ohutula mu byaalo byaabwe eng'we nimubona.

¹³Mubecheenge abeesikwa eyiri Omwaami Nasaae weeng'we.

¹⁴“Ebyaalo bino bi muli aambi ohuyira mani mutuke, biwulirira mu balakusi neende abalosi; nae eng'we, Omwaami Nasaae weeng'we haba s'abafukiirira ohuholaanga mutyo.

¹⁵ “Omwaami Nasaae weeng'we, yahabatusemo omunabbi oli koti ese, omwiibulanwa weeng'we mweene. Oyo niye yi muchia ohuwuliraanga,

¹⁶koti lu mwasaba Omwaami Nasaae weeng'we hu ludaalo lu mwebuusira alala hu lugulu lwa Sinai. Mwaboola muti, ‘Leha huhaye ohuwulira ekono ly'Omwaami Nasaae weefwe haandi, oba ohubona omuliro kw'amaani kuno haandi, ataali ao huba huchia ohufwa.’

¹⁷Mani Omwaami niyamboolera ati, ‘Esiindu si baboolere esyo syadyeeri nisyo.

¹⁸Njia ohubatusamo omunabbi oli koti ewe ohutula mu banaluyia baabwe; haandi njia ohumuberesa emboosi chaange. Achia ohulomalomaanga nabo buli siindu simulagira.

¹⁹ Nae buli muundu otahafukiirireenge emboosi chi yahalomalomeenge mu liita lyaange, ese mweene niise owahamwoolobye.

²⁰Nae omunabbi wetuundula omweene ohulomalomaanga mu liita lyaange nitamulagiire ohulomaloma, oba olomaloma mu liita lya banasaae baandi, omunabbi oyo aba ahoyere ohufwa.’

²¹Nae nimuboola mu myooyo kyeeng'we muti, ‘Hunaamanye hutye emboosi chi Omwaami ataalomaloome?’

²²Omunabbi n'alomaloma mu liita ly'Omwaami, mani bi alomaloma byaahaya ohweeholeha oba byaahaya ohwoolerera, emboosi chae echo Omwaami haba saaba n'achilomaloome. Omunabbi w'engeri eyo omweene aba yetuliiriise sa, sakira haba simuba muhoyera ohumutya daawe.