Read saamia Amalako Kohubiri 24 Bible Online

Amalako Kohubiri 24 - saamia bible

Amalako Kohubiri 24

¹ “Omusaacha n'adeehya omuhasi, nae omuhasi oyo yaahaya ohumusangaasa, olwohuba amubweeneho esiindu sitaali silai, omusaacha w'engeri eyo achia ohumwaandiikiraanga ebbarwa yohulehanira elalira, amudiisa mu mahono mani amwiirusa ohutulira elalira mu daala lyae.

²Omuhasi oyo naanaatuleenge mu daala lyae, anyala ohuchia yaadeehera omusaacha wuundi.

³Nae niwiichuhana omusaacha wae wohubiri oyo yaafwa oba yaamuhaya, omuhasi oyo aba haandi anandiikirweengwe ebbarwa yohulehanira elalira adiiswa mu mahono, mani yeeruswa ohutula mu daala omwo.

⁴Nibyoola ao omusaacha wae wataangira ohumudeehya, mani yaamwiirusa, haba saaba ahoyera ohumudeehya yaaba omuhasi wae haandi. Omuhasi w'engeri eyo aba amalire ohunyaaswa; olwohuba ohumudeehya haandi, siba siri esy'omusiro eyiri Omwaami. Mutaholaanga esyonoono sifwaana sityo mu syaalo si Omwaami Nasaae weeng'we ali ohubaberesa musituke.

⁵“Omusaacha n'aba hu yahadeehya sa ati, haba s'ahoyeere ohuchia neende amaye mu biita, oba yaayirwa ohuhola emirimo ky'amaani kiindi. Ahoyere ohulehaangwa aba mu daala lyae ohumala embaka y'omwaaka mulala, niyesangaasa neende omweeya wae.

⁶“Abulao omuundu onasingeenge olukina oba eesyo; olwohuba siba siri koti ohusiinga obulamu bweene.

⁷ “Omuundu yeesi okosao Omuisiraeli waasye, mani yaamwehoonyera koti omuwaambe, oba yaamukusa, ahoyere ohwiitwaangwa, hu munyala ohweetusaho esyonoono esyo.

⁸ “Obulwaae bw'ebigeenge nibunaabadiireenge, mwehaliiriseenge bulai muno ohwooseresa buli siindu si balaamisi Baleefi bababoolera; koti lu ndabalagira. Muhoyere ohuloondakanaanga neende engeraka chi ndababeresa.

⁹ Mwiichulise si Omwaami Nasaae weeng'we yahola hu Miriamu nimuli hu lukeendo lweeng'we ohutula Misiri.

¹⁰ “Nimuneyoseenge owaasyeeng'we esiindu syoosi, mutachichaanga mu nyuumba yae ohumutusaho ebburungeete lyaaba naasiingire.

¹¹Yemeenge sa erwaanyi, mani omuundu yi weyosere oyo omweene ahuleetera esiindu syaaba naasiingire.

¹²Nae niwiichuhana byaaba mbwe owaasyeeng'we oyo omumanani niye, mutahayiraanga hu siindu syaaba naasiingire ohwoola hu ludaalo luloondaho.

¹³Mumukobosereenge engoloobe anyala ohulyebwiiha esiro, niliri ebburungeete, mani ahusabira ehabi. Sino sinaabecheenge esiindu siluungifu mu moni w'Omwaami Nasaae weeng'we.

¹⁴ “Mutabechaanga abalyaanga eyiri abamanani neende abo abali mu ngisa ba mupaangisa, kata ayahaba Omuisiraeli oba mulala hu bawalukeendwa bomu syaalo syeeng'we, abamenya mu biko byeeng'we.

¹⁵Munaamubecheenge omusaara kwae buli ludaalo lu ahalaabaniire elyuuba nilisisiiri ohukwa (olwohuba mumanani, sakira nikwo kwaaba niyesuubiire). Nae niwiichuhana waahiinda ohumuberesa omusaara kwae, aba achia ohulirira Omwaami n'ahufwaambya, mani amasika kae ako kakere ebiindu bihuchiire bubi.

¹⁶ “Abeebusi sibahoyere ohwiitwaangwa hulw'emisaango ki baana baabwe baholere, oba abaana ohwiitwa hulw'emisaango ky'abeebusi baabwe; buli muundu aneetweenge ohweema hu byonoono byae.

¹⁷ “Mutadoondobaniaanga eheenga y'omusaango kwa walukeendwa oba okwa mulehwa, oba batabasiingiraanga ebyefwaalo by'omuhasi mufwiirwe.

¹⁸Nae mwiichuliseenge muti mwesi mwaliho abawaambe mu syaalo sya Misiri, mani Omwaami Nasaae weeng'we yabanunula ohutula eyo; sakira mbalagira ohuhola sino.

¹⁹ “Nimukesa emere mu ndalo cheeng'we, mani mweebirira engaano yi mukesere mu ndalo, mutakaluhaangayo ohuyitusayo. Engaano eyo yinaabecheenge eya bawalukeendwa, bamulehwa, neende abahasi bafwiirwe. Mani Omwaami Nasaae weeng'we aba achia ohubaberesaanga ehabi mu buli siindu si munaaholeenge.

²⁰Nimunoka ebyaamo by'emiseituuni kyeeng'we, mutakobolaangayo haandi ohunoka hu masaga kadoong'ereho ebyaamo. Ebyaamo bidoong'ereho ebyo binaabecheenge ebya bawalukeendwa, bamulehwa neende abahasi bafwiirwe.

²¹Nimunoka emisabbiibbu mu ndalo cheeng'we, mutakobolaangayo ohudooleresa ekidoong'eremo; kinaabecheenge ekya bawalukeendwa, bamulehwa, neende abahasi bafwiirwe.

²²Mwiichulise muti mwesi mwaliho abawaambe mu syaalo sya Misiri; sakira mbalagira ohuholaanga sino.