Read saamia Amalako Kohubiri 29 Bible Online

Amalako Kohubiri 29 - saamia bible

Amalako Kohubiri 29

¹Chino nicho emboosi ch'endagaano yi Omwaami yalagira Musa ohuhola neende Abaisiraeli mu syaalo sya Moabbu, eyimeedwa hu ndagaano yi Omwaami yahola nabo hu lugulu lwa Sinai.

²Musa yalaanga Abaisiraeli boosi yaababoolera ati “Mwabona ebiindu byoosi bi Omwaami yabaholera mu moni weeng'we nimuli mu syaalo sya Misiri, eyiri omutuki wa Misiri neende abahalaabani bae boosi neende eyiri abomu syaalo syae boosi.

³Mwabona neende emoni cheeng'we ohuteemwa hw'amaani, obulolero neende ebiwuukisa by'amaani.

⁴Nae ohwoola buti, Omwaami ataababeresaho amakesi kamanyirisa, emoni chibona, kata sa amatwi kawulira bi mwabitiramo.

⁵Omwaami wuno yabeemirira emyaaka amahumi kane mu siparara, ataali engubo cheeng'we ohutaanduhaho, oba kata ebiraato byeeng'we ohubweerereraho.

⁶Simwaliho neende omugaati kwohulya, haandi simwaliho neende efiini y'ohung'wa oba esyohung'wa simeesa syoosi, hu munyale ohumanya muti niye Nasaae weeng'we.

⁷ Nae nimwoola abuundu ano, Sihooni omutuki wa Hesibboni neende Ogu omutuki wa Bbasani, batulao beecha ohutuseeta batulwaanie. Nae mani nihubayiingira.

⁸ Hwayira esyaalo syaabwe, mani hwasikabira Abarubbeeni, Abagaadi, neende esituundu sy'Abamanaase.

⁹Sakira, muliindeenge bulai emboosi ch'endagaano yino, hu buli siindu si muhola sinabachiireenge bulai.

¹⁰“Enyaanga yino eng'we mweesi mweemere mu moni w'Omwaami Nasaae weeng'we. Abameresi b'enono cheeng'we, abahuluundu beeng'we, neende abahunuufu beeng'we, abaandu ba Yisiraeli boosi.

¹¹Abaana bayere beeng'we neende abahasi beeng'we, neende bawalukeendwa bamenya mu kaambi yeeng'we, abo ababasyaakira eehwi, neende abo ababachiira amaachi.

¹²Mwiichire ano ohwiingira mu ndagaano yi Omwaami Nasaae weeng'we ali ohuhola naang'we enyaanga yino,

¹³hu anyale ohubomiisa enyaanga yino koti abaandu bae, haandi anyale ohuba Nasaae weeng'we, koti lu yabasuubisa, haandi koti lu yechubira bakuuka yeeng'we. Eyiri Abburahamu, Yisaka, neende Yakobbo.

¹⁴Omwaami haba saali ohuhola endagaano y'esichubo yino naang'we abali ano mweng'ene.

¹⁵Nae ayihola naafwe fweesi abeemere ano mu moni w'Omwaami Nasaae weefwe enyaanga yino, neende abo abataali ano enyaanga yino, abo abasisiiri ohwiibulwa.

¹⁶“Mumanyire bulai bweene obulamu bu hwalimo nihuli mu syaalo sya Misiri, haandi koti lu hwakeenda nihubita mu byaalo biindi.

¹⁷Haandi mwabona ebiindu by'omukwoobo bi bali nabyo, ebiloongaloongwe byaabwe byabaachwa mu misaala neende mu makina, mu feesa neende mu saabbu.

¹⁸ Mubone muti abulao mweeng'we omusaacha yeesi, oba omuhasi yeesi, oba edaala lyoosi, oba enono yoosi eyeemere ano enyaanga yino okaluuhana yaatula hu Omwaami Nasaae weefwe yaachaaka ohuhalaabanira banasaae b'ebyaalo ebyo. Oyo yeesi ohola atyo aba achia ohuba koti omusi kulohaho esaga ly'obutwa, haandi elulu.

¹⁹Nae oyo owulira emboosi ch'endagaano y'esichubo yino, mani yeniinia mu mwooyo kwae, n'aboola ati, ‘Njia ohuba bulai, kata ndahadoong'a neende esimyeeni sy'obulamu bwaange.’ Sino siba sinaakere mwaasihiriswa mweesi, abalai neende ababi nasilala.

²⁰Omwaami haba saaba achia ohumukwiira esisa, nae ohutusaho etima ly'Omwaami otadaha ohuyiinganisibwa liba lichia ohumwaaduhiraho, mani ebichubo biri mu sitabo sino bimukweeho. Omwaami aba achia ohumusihirisa amumaleo hu syaalo.

²¹Omwaami aba achia ohumuhola esyohuboneraho eyiri enono cha Yisiraeli choosi, n'amutaaho ebibwaabo byoosi ohuchianakana neende endagaano yaandiikwa mu sitabo sy'amalako sino.

²²Mani mu ndaalo chiichayo, abaana beeng'we baheebuleengwe, neende bawalukeenda bahatuleenge mu byaalo by'eyale, baba bahaboneenge ohusaanda hw'esyaalo syeeng'we, neende amalwaae k'Omwaami yahasikwiiseho.

²³ Bahabone koti lu syaalo esyo syahabe nisisihiriiswe, mani nisyeholere oluyoongo neende omuunyu, esiindu syoosi nisitahanyala ohumeramo syaahula, haandi si bunyaasi butahanyala ohumeramo. Esyaalo syeeng'we syahasihiriswe syaaba koti Sodomu neende Gomora, Aduma neende Sebboyimu, bi Omwaami mu tima lyae neende obwaalaba bwae yasihirisa.

²⁴Ebyaalo byoosi byaheteebeenge nibiboola biti, ‘Lwasiina Omwaami aholere esiindu esyo hu syaalo sino? Sifune siina esikerere yaanyoolera atyo?’

²⁵Mani abaandu bahakoboleengemo nibaboola bati, ‘Olwohuba mbwe bahalaka endagaano y'Omwaami, Nasaae wa bakuuka yaabwe, yi yahola nabo n'abatusa mu syaalo sy'e Misiri,

²⁶mani baahalaabanira banasaae baandi haandi babeenamira, banasaae ba bali nibateenamiraangaho hale, ba Nasaae yali yabakaania ohwiinamiraanga.

²⁷Sakira Omwaami yasinyihira esyaalo sino, mani yaasitaho ebichubo byandiikwa mu sitabo sino byoosi.

²⁸Omwaami mu tima lyae liingi neende mu hunyoolera hwae, yabamalao mu syaalo syaabwe, mani yaabasukuna mu syaalo siindi, yi bali ohumenya enyaanga yino.’

²⁹“Ebiindu byomu ngiso bi Omwaami Nasaae weefwe atatweekesa bidoong'a sa ebyae; nae ebiindu bi yatutuumbulira byeefwe nibyo alala neende abaana beefwe endaalo choosi, hu hunyale ohudiiraanga emboosi ch'amalako kae.”