Read saamia Amalako Kohubiri 3 Bible Online

Amalako Kohubiri 3 - saamia bible

Amalako Kohubiri 3

¹“Luunyuma, hwadiira engira yicha Bbasani; nae Ogu omutuki owa Bbasani yatulayo alala neende abaandu bae ohwiicha ohutulwaanisira Edirei.

²Nae Omwaami yamboolera ati, ‘Mutamutya; olwohuba malire ohumuta mu bunyala bweeng'we alala neende abaandu bae boosi, neende esyaalo syae syoosi. Muchia ohumuhola koti lu mwahola Sihooni omutuki w'Abaamoori, owali niyamenya Hesibboni.’

³Omwaami Nasaae weefwe mani n'ata Ogu, omutuki wa Bbasani yesi mu bunyala bweefwe, alala neende abaandu bae boosi, nihubeeta boosi mani naabulao omuundu yeesi owadoong'ao.

⁴Hwawaamba ebiko byae byoosi; sibulao esiko syoosi si hutabawaamba. Hwawaamba ebiko amahumi kasaasaba, esituundu syoosi esya Arugobu, obutuki bwa Ogu mu Bbasani.

⁵Ebiko bino byoosi byali nibyasitirirwa neende ebida bileeyi, nibiriho ebiruwa neende emisiiro, haandi waluwo engoongo nyiingi muno chi batoombahiraho olukaka.

⁶Hwabisihirisira elalira koti lu hwahola Sihooni omutuki wa Hesibboni, nihusihirisa buli siko syoosi, neende buli muundu: abasaacha, abahasi alala neende abaana.

⁷Nae eng'oombe chosi neende emyaandu kyomu biko byoosi hwabiyira koti ebipeeye.

⁸Mani mu biha ebyo, hwayira ebyaalo by'abatuki babiri eby'Abaamoori abali nibamenya niwambuuhe omwaalo kwa Yorodaani, ohutulira elalira hu hooho lya Arinooni ohwoola hu lugulu lwa Hamoni

⁹(Abasidoni balaangaanga olugulu lwa Hamoni bati Sirioni, nae Abaamoori nabo balulaangaanga bati Senili).

¹⁰Hwawaamba ebiko byoosi eby'esyaalo sikwalaafu neende Gileadi syoosi alala neende Bbasani syoosi, ohwoolera elalira Saleka neende Edirei, ebiko by'obwaami bw'Ogu mu Bbasani.

¹¹(Olwohuba Ogu omutuki wa Bbasani yeeng'ene niye owali n'adoong'ere hu baandu bali nibadoong'ere hu Abarefaimu. Bone, esanduuku ly'omulaambo kwae lyali esanduuku ly'ekina; esanduuku elyo lyali emiita chine obuleeyi, neende aambi w'emiita chibiri obutakalafu; ohuchianakana neende esipiimo sya buli ludaalo. Esanduuku elyo lisisiiri mu Rabba esiko sy'Abaamooni.)

¹²“Mu biha bi hwayiriramo esyaalo sino ohusituka, ndaberesa Abarubbeeni neende Abagaadi esituundu sichaakira Aroeri, esiri hu lwaaho lw'ehooho lya Aroeri, neende esituundu sy'esyaalo sy'ebigulu bya Gileadi alala neende ebiko byasyo.

¹³Esituundu sya Gileadi sidoong'ereo, alala neende Bbasani syoosi, obwaami bwa Ogu, amahuluundu mbwe, esyaalo sya Arigobbu syoosi, ndasiberesa esituundu sy'enono ya Manaase. (Esyaalo sya Bbasani syoosi syali nisilaangwa siti esyaalo sya Refaimu.

¹⁴Yairi, Omumanaase yayira esituundu sya Arigobu syoosi, amahuluundu mbwe, Bbasani, ohutulira elalira hu lwaaho lw'Abagesuuri neende Abamaaka, neende engoongo chakulihwa eliita lyae lyeene, mbwe Hafooti-Yairi, koti lu chilaangwa ohwoola buti.)

¹⁵Ndaberesa Makiri Gileadi,

¹⁶nae Abarubbeeni neende Abagaadi ndababeresa esituundu ohutula Gileadi ohwoolera elalira mu hooho lya Arunooni, neende akatikaati w'ehooho koti olwaaho, ohwoolera elalira hu mwaalo kwa Yabboki, olwaaho lwa Abaamooni.

¹⁷Arabba syoosi, nisiri neende Yorodaani koti olwaaho, ohutula Kinereeti ohwoola hu nyaanja ya Arabba, Enyaanja Y'omuunyu, eyiri aasi w'ebiihiriro bya Pisiga hu lwaande lw'ebukwe.

¹⁸ “Mani ebiha ebyo ndabalagira nimboola endi, ‘Omwaami Nasaae weeng'we ababereese esyaalo sino musituke; mani abasaacha balwaani beeng'we boosi bachia ohwaambuha omwaalo kwa Yorodaani nibakiingire ebilwaaniso byaabwe, beemiriremo bamwaanamao ab'enono chiindi cha Yisiraeli.

¹⁹Nae abahasi beeng'we, abaana beeng'we bayere, neende eng'oombe cheeng'we, (Manyire endi muli neende eng'oombe nyiingi) bicha ohudoong'a mu biko bi ndababeresa.

²⁰Muhoonye abaana beeng'we, ohwoola lu bahatukire esyaalo si Omwaami Nasaae weeng'we ali ohubaberesa niwambuuhe Yorodaani, mani muchia ohukobosa buli muundu ohuchia hu syaalo syae si mbabereese.’

²¹Ebiha ebyo ndalagira Yosua nimboola endi, ‘Obweene neende emoni chao ebiindu byoosi bi Omwaami Nasaae weeng'we aholere abatuki babiri bano; nilwo sa lu Omwaami achia ohuholaanga buli butuki bu muchia ohuseetaanga.

²²Haba simubatya, olwohuba Omwaami Nasaae weeng'we niye ochia ohubalwaaniraanga.’

²³ “Ndekweeda Omwaami mu biha ebyo nimboola endi,

²⁴‘Ewe Omwaami Nasaae, hu wahachaaka ohweekesa omuhalaabani wao ebiindu bihuluundu haandi eby'amaani by'ochia ohuhola. Olwohuba abulao nasaae oli muukulu oba hu syaalo onyala ohuhola ebiindu by'amaani koti ebyao.

²⁵Husaba, leha nyambuhe, mboneho esyaalo silai siri niwambuuhe Yorodaani, esyaalo silai sy'ebigulu esyo, neende Lebbanooni.’

²⁶Nae Omwaami yanyoolerera hulweeng'we, mani yaahaya ohuumbulira; haandi Omwaami yamboolera ati, ‘Leha esyo sihumale, otalomalomaho naange ebidiira hu siindu sino haandi.

²⁷Niina aakulu w'olugulu lwa Pisiga, otingaale emukulu neende emuumbo, emwaalo neende ebukwe, osibone neende emoni chao, olwohuba haba s'ocha ohwaambuha Omwaalo kwa Yorodaani kuno.

²⁸Nae lagira Yosua haandi omugumye omwooyo, omwomiise, olwohuba niye ochia ohwaambuha niyemiriire abaandu bano, haandi niye ochia ohukera abaandu bano bayire haandi batuke esyaalo sy'oli ohubona.’

²⁹Mani hwadoong'a mu hooho litingaalire Bbetipewoori.