Read saamia Amalako Kohubiri 33 Bible Online

Amalako Kohubiri 33 - saamia bible

Amalako Kohubiri 33

¹Yino niyo ehabi yi Musa omuundu wa Nasaae yaberesa Abaisiraeli n'asisiiri ohufwa.

²Yaboola ati, “Omwaami yatula hu lugulu lwa Sinai, n'asiingira koti elyuuba n'atulira Seyiri, mani n'ahosa naali hu lugulu lwa Parani, naali alala neende aboolerefu elifu ehumi. Yahosa neende omuliro kwaaduha nikumuli hu muhono kwae muluungi.

³Mubwadyeeri, Omwaami yadaha abaandu bae; abo boosi abamwaawulirwa, bali mu mahono kae; abo abawulira emboosi chae; abanyoola engeraka yae.

⁴Musa yatuberesa amalako, koti esy'engaanga muno eyiri esyaalo sya Yakobbo.

⁵Mani Omwaami yaaba omutuki mu Yesyuruuni, abeemeresi b'abaandu nibebuusire alala, enono ch'Abaisiraeli nichiri alala.

⁶Musa yaboolera enono ya Rubbeeni ati, “Leha enono ya Rubbeeni yibeeo, mani yihaye ohufwa, mani bemeede ohuba abaangi.”

⁷Haandi n'alomaloma hu nono ya Yuda ati: “Ewe Omwaami tekeeresa amaliro ka Yuda, mani omukaluseo eyiri abaandu bae. Mulwaanire mani omuhoonye, haandi mukaye abasuku bae.”

⁸ Yalomaloma hu Baleefi n'aboola ati, “Omwaami, beresa Tumimu yao, neende Wurimu yao abo abahwiisamo oluyaali, abo bawateemera Maasa, haandi bawayingana nabo hu maachi ka Meribba.

⁹Abaleefi bahwomiiriraho muno ohuhira hu laata yaabwe neende ng'inaabwe, neende bamwaanaang'na, neende abaana baabwe. Olwohuba badiira emboosi yao, haandi baliinda endagaano yao.

¹⁰Banekeseenge Yakobbo ebilagiro byao, neende Yisiraeli amalako kao; banahunioohesereenge obubbaani y'oli, banayaaneenge ebiyaanwa bisaambwa nibiri ebilaamba hu alutaari yao.

¹¹Ewe Omwaami, baberese ehabi, obahoonye babe ab'amaani, haandi wakaanire emirimo kyaabwe. Sihirisa abasuku baabwe boosi, abo abatabadaha bahaye ohusiingira haandi.”

¹²Ebidiira hu Bbenjamini, yaboola ati, “Bano nibo abaheerwa b'Omwaami, banaamenyeenge mu muleembe ali Omwaami; anabaliindeenge buli siha, mani anamenyeenge nabo.”

¹³Nae ebidiira hu nono ya Yosefu, yaboola ati, “Leha Omwaami aberese esyaalo syaabwe ehabi y'ebiyaanwa bilai bitula aakulu Muukulu, haandi ohutula aasi mu loba.

¹⁴Leha esyaalo syaabwe sibeemo ehabi y'ebyaamo byeengeswa neende elyuuba, haandi neende ebilai mu buli kesa.

¹⁵Lehe engulu chaabwe hale ech'engaanga hoongo, neende ebilai bitula mu bigulu by'endaalo choosi.

¹⁶Leha esyaalo syaabwe siichulemo ebiyaanwa bihiramo obulai, ebyabereswa ehabi neende Omwaami, owalomaloma n'ali mu sichaha syaaduha omuliro. Leha ehabi chino chibe hu nono ya Yosefu, neende hu mutwe kw'oyo owali omweemeresi wa bamwaanang'ina.

¹⁷Yosefu ali neende amaani kali koti ak'endaawu, haandi enjika chae chiri koti ech'emboko; achia ohuchehoonyera ohusiindiha ebyaalo, ohwoola hu njakamo y'esyaalo. Chino nicho elifu ehumi cha Efuraimu, haandi chino nicho amalifu ka Manaase.”

¹⁸Nae eyiri enono ya Sebbulooni, yaboola ati, “Eng'we Abasabbulooni, sangaale, nimuli hu lukeendo lweeng'we; neende enono ya Yisakari, mu mayeema keeng'we.

¹⁹Bahalaange abaandu baandi ohwiicha hu lugulu lwaabwe; eyo niyo yi bahayaanire ebiyaanwa bihoyera. Olwohuba banyoola eby'engaanga ohutula mu nyaanja neende eby'engaanga byeekisa mu musenye kwohu lwaasi ly'enyaanja.”

²⁰Nae eyiri enono ya Gaadi, yaboola ati, “W'ehabi oyo otakalasa esyaalo sya Gaadi! Gaadi syebonderera koti edalang'i, abosyoola omuhono, neende esy'engaanga syohu mutwe,

²¹Omweene yedooleramo esituundu sihiramo obulai mu syaalo, olwohuba eyo niyo yi babiiha omukabo kw'omweemeresi; mani n'ataangirire abeemeresi b'abaandu, mani yooseresa ebilagiro neende amalako k'Omwaami ka yaberesa Yisiraeli.”

²²Nae eyiri enono ya Daani, yaboola ati, “Daani mwaana kw'edalang'i; kuuduumakala nikutula Bbasani.”

²³Nae eyiri enono ya Nafutaali, yaboola ati, “Ewe Nafutaali, weechula ehabi, haandi weechula ehabi y'Omwaami, nyoola esyaalo sy'enyaanja neende esy'emwaalo.”

²⁴Nae eyiri enono ya Aseri, yaboola ati, “Leha Aseri anyoole ehabi nyiingi ohuhiraho bamwaanang'ina, haandi leha nyinihe ohukulu hwae mu mafuta.”

²⁵Emilyaango kyasyo kyaheekalwe neende ebichuma neende ebihomo; haandi abecheenge ow'amaani obulamu bwae bwoosi.

²⁶Ewe Yesyurooni, abulao nasaae yeesi oli koti Nasaae, okeendera hu kulu niyeecha ohubahoonya, haandi obita mu bbanga naali neende oluyaali luungi.

²⁷Nasaae otaakama niye obakayirira, emihono kyae kitaakama niko ekibakaanira. Haandi asukuna erwaanyi abasuku beeng'we nimubona, mani n'aboola ati, “Sihirire.”

²⁸Mani sakira Abaisiraeli bamenya mu muleembe, abeechuhulu ba Yakobbo boong'ene, nibo abanabecheenge mu syaalo sirimo engaano neende efiini; eee, yidonywaho olume ohutula Muukulu.

²⁹Oli ow'ehabi ewe Yisiraeli! Wiina mweene owakana naawe, esyaalo syawonisibwa neende Omwaami? Omwaami niye obweyikamo bweeng'we, haandi omuhoonyi weeng'we, haandi olugaanga lw'ohuyiingira. Abasuku beeng'we baheeche nibabekweeda ohubakwiira esisa; nae mwahabaniineho nimubeesa aasi.