Read saamia Amalako Kohubiri 4 Bible Online

Amalako Kohubiri 4 - saamia bible

Amalako Kohubiri 4

¹“Mani bulaanu, eng'we Abaisiraeli, wulire amalako neende ebilagiro bi mbeekesa, mubidiire, hu munyale ohuba abalamu, haandi mwiingire mu syaalo si Omwaami Nasaae wa bakuuka yeeng'we ali ohubaberesa.

²Mutameedaangaho oba muhendeesaho hu mboosi chi mbalagira. Mudiireenge ebilagiro by'Omwaami Nasaae weeng'we bi ndi ohubalagira.

³ Mubweene ebiindu bi Omwaami yahola nihuli Bbaali-Peori; olwohuba Omwaami Nasaae weeng'we yasihirisa buli muundu owali niyeenamira Bbaali wa Peori;

⁴nae eng'we mweesi aboomirira hu Omwaami Nasaae weeng'we musisiiriwo abalamu ohwoola buti.

⁵Bone, mbao mbeekeese amalako koosi neende ebilagiro byoosi koti lu Omwaami Nasaae waange yamboolera. Mubidiireenge nimuli mu syaalo si muli ohwiingiramo ohusituka.

⁶Mubidiireenge haandi mubyosereseenge; olwohuba esyo nisyo esineekeseenge abaandu b'ebyaalo biindi siti muli neende amakesi alala neende ohumanya. Nimunawulireenge ebilagiro ebyo byoosi, banaabooleenge bati, ‘Mubwadyeeri bweene, abaandu b'amaani bano bakesi haandi bamanyire muno.’

⁷Olwohuba baandu siina beene abali neende nasaae oli aambi nabo koti Omwaami Nasaae weefwe ali aambi naafwe, buli lu humusaba?

⁸Haandi syaalo siina syeene esiriho neende amalako neende ebilagiro ebiluungifu koti amalako ka bateereo enyaanga yino kano?

⁹“Ohutusaho, mweehaliirise haandi mweliinde bulai muno, muhaye ohwiibirira mu bulamu bweeng'we bwoosi ebiindu bino bi mubweene abeene, haandi bitatula mu myooyo kyeeng'we endaalo choosi. Mubyeekesaanga abaana beeng'we neende abeechuhulu beeng'we,

¹⁰koti lu mweema mu moni w'Owaami Nasaae weeng'we hu lugulu lwa Sinai, mani Omwaami niyamboolera ati, ‘Mbuusire alala abaandu. Ndaha bawulire emboosi chi mbaboolera, beeke ohunjisaangamo oluyaali mu bulamu bwaabwe bwoosi, haandi banyale ohweekesaanga abaana baabwe ohuhola batyo.’

¹¹Mwasuda aambi, mani mweema aasi w'olugulu, olugulu olwo olwali nilubwiihirweho esireesi sisito sy'omwoosi mumali neende omuliro kwaaduha ohwoola mu kulu.

¹²Omwaami yalomaloma naang'we naali akatikaati w'omuliro; mwaawulira ekono lyoong'ene nililomaloma, nae haba simwabonaho koti lu afwaana; ataali ekono lyae lyoong'ene nilyo elyawuliirihana.

¹³Omwaami yabeekesa endagaano yae, yi yabalagira ohuliinda, niko amalako ehumi; ka yandiika hu bipaande bibiri eby'amakina.

¹⁴Omwaami yandagira ebiha ebyo ohubeekesa amalako neende ebilagiro, ati munyale ohubidiiraanga nimuli mu syaalo syaacha ohubaberesa mwiingiremo mani musituke.

¹⁵“Mani sakira, abeene mwehaliirise bulai. Koti lu mutabona efwaani yoosi hu ludaalo lu Omwaami yalomalomeraho naang'we hu lugulu lwa Sinai n'ali akatikaati w'omuliro.

¹⁶Mweliinde muhaye ohudoondobana nimweeholera abeene esiloongaloongwe siboneha esy'engeri yoosi, esy'esiindu sisaacha oba esihasi,

¹⁷esy'esisolo syoosi esiri hu syaalo, esy'eyoni ly'embaya lyoosi elibburuha mu bbaanga,

¹⁸oba esy'esiindu syoosi esimoola hu loba, oba esy'eng'eeni yoosi eyiri mu maachi.

¹⁹Mweliinde muhaye ohutingaala hu kulu, haandi nimubona elyuuba neende omwoosi neende eng'ining'ini, neende ebiindu byoosi ebiri mu kulu, mutabiinamiraanga oba kata sa mubihalaabanira, ebiindu bi Omwaami Nasaae weeng'we yateerao abaandu boosi abali hu syaalo.

²⁰Nae Omwaami yababukula mani yaabatusa mu buwaambe bw'amaani bu mwalimo mu Misiri, mani yaabahola abaandu bae beene koti lu muli buti.

²¹ Haandi eng'we mwakera Omwaami yaanyoolera naange, mani yeechuba ati ese haba siinjia ohwaambuha Yorodaani, haandi ati, ese haba siihoyera ohwiingira mu syaalo silai si Omwaami Nasaae weeng'we ali ohubaberesa ohuba esyeeng'we.

²²Olwohuba ese njia ohufwiira mu syaalo sino, haba siihoyera ohuchia ndaambuha Yorodaani; nae eng'we muchia ohwaambuha mani muyire haandi mutuke esyaalo silai esyo.

²³Mweliinde abeene, mani muhaye ohwiibirira endagaano yi Omwaami Nasaae weeng'we yahola naang'we, mani mweeholera esifwaanani sy'engeri yoosi si Omwaami Nasaae weeng'we yabakayira ohuhola.

²⁴Olwohuba Omwaami Nasaae weeng'we ali koti omuliro kwaaduha, haandi haba saayiinganisibwa.

²⁵“Nimwahabe nimunyoolere abaana neende abeechuhulu, haandi nimuyiindiire mu syaalo, mutateemaangaho ohweholera esifwaanani syoosi mani musiinamira, olwohuba nimwonoona mu moni w'Omwaami Nasaae weeng'we, muba muchia ohusiingisa etima lyae.

²⁶Naanga ekulu neende esyaalo ohwomiisa nyaanga yino mbwe, muchia ohusihirira bwaangu ohutula mu syaalo si muli aambi ohwaambuha Yorodaani mani musiingiremo musiyire sibe esyeeng'we. Haba simuba muchia ohuyiindira, nae muba muchia ohusihirisirwa elalira.

²⁷Haandi Omwaami aba achia ohubasalaanisirya mu byaalo biindi, mani muduuduye muno mu byaalo bi Omwaami aba naabasalaanisiramo.

²⁸Mani eyo muba muchia ohuhalaabanira banasaae b'embaao neende ab'amakina, ebiloongaloongwe bi baandu bahola, ebitabona oba byaawulira, oba byaalya, oba byaawunyiirisa.

²⁹Nae nimuli eyo, muba muchia ohukoonya Omwaami Nasaae weeng'we, mani mumunyoole, nimumukoonya neende emyooyo kyeeng'we kyoosi neende obulamu bweeng'we bwoosi.

³⁰Nimunabecheenge mu budinyu, ebiindu bino byoosi nibibakwaaho endaalo nichibitireo, munakoboleenge eyiri Omwaami Nasaae weeng'we mani muwulira emboosi chae.

³¹Olwohuba Omwaami Nasaae weeng'we w'esisa niye; sanaabajwaang'eenge oba abasihirisa oba yeebirira endagaano yi yahola neende bakuuka yeeng'we naabeechubira.

³²“Olwohuba bulaanu mweteebeho hu biindu byaluwo hale, ebyaliwo eng'we nimusisiiri ohubaao, ohutulira elalira hu ludaalo lu Nasaae yaloongeraho omuundu hu syaalo, mani muteebe buli abuundu mubone nikali mbwe esiindu sy'amaani koti sino nisyabahoo, oba nisyawuliirihanaho.

³³Baluwo hooho abaandu bawulira hooho mbwe ekono lya nasaae hoosi lilomaloome ohutula akatikaati w'omuliro, koti lu eng'we mwawulira mani badoong'a nibali abalamu?

³⁴Oba aluwo hooho nasaae yeesi owali naateemereho ohuchia mani yeebukulira omweene esyaalo ohutula mu byaalo biindi niyehoonyera ebiteemo, ebiwuukisa neende eby'amaani maangi neende amaye, neende omuhono kw'amaani neende ebitiisa koti lu Omwaami Nasaae weeng'we yabaholera mu Misiri nimubona?

³⁵Bino Omwaami yabeekesa hu munyale ohumanya muti, Omwaami niye Nasaae; haandi abulao owuundi ohutusaho oyo yeeng'ene.

³⁶Naali Muukulu, yakera mwaawulira ekono lyae, hu anyale ohubeekesa; haandi hu syaalo yakera mwabona omuliro kw'amaani, haandi mwawulira emboosi chae nichitula akatikaati w'omuliro.

³⁷Olwohuba yadaha bakuuka yeeng'we haandi yadoola abeechuhulu baabwe, mani omweene neende obunyala bwae bw'amaani yaabatusa ohutula mu Misiri.

³⁸Nae nimwali nimwemeeda ohuchia mu moni hu lukeendo lweeng'we, yabeerusira ebyaalo bihoongo haandi by'amaani ohubahira ohutula mu maloba kabyo, hu amale abengiisemo, mani ababerese amaloba kaabwe ohuba akeeng'we, ohwoola buti.

³⁹Mani mumanye sino enyaanga yino, haandi musiliinde mu myooyo kyeeng'we muti, Omwaami niye Nasaae Muukulu aakulu neende hu syaalo aasi; abulao owuundi.

⁴⁰Sakira muliindeenge amalako kae neende ebilagiro byae, bi mbalagiire enyaanga yino, hu munyale ohubechaanga bulai, eng'we neende abaana beeng'we bahabaloondeho. Muba mwahayiindire mu syaalo si Omwaami Nasaae weeng'we ali ohubaberesa sibe esyeeng'we endaalo choosi.”

⁴¹Musa yeemao yaawulamo ebiko bidatu ebiri ebukwe w'omwaalo kwa Yorodaani,

⁴²bi muundu anyala ohwiiruhiramo, oyo owiita owaasye nateechoomere, otaabeere neende obusuku nae ohutula hale, yeeruhire mu silala hu biko ebyo, anyale ohuwonia obulamu bwae.

⁴³Ebiko bino byali: Bbeseri, esyaalo sikwalaafu mu siparara esy'Abarubbeeni, neende Ramoti mu Gileadi esy'Abagaadi, neende Golani mu Bbasani, esy'Abamanaase.

⁴⁴Kano niko amalako ka Musa yaterao Abaisiraeli.

⁴⁵Kuno nikwo omulaanga kw'amalako neende ebilagiro bi Musa yaboolera Abaisiraeli nibaali nibahatula mu Misiri.

⁴⁶Yababeresa nibambuuhe ehooho lya Yorodaani elitingaalire Bbetipewoori, mu syaalo sya Sihooni omutuki w'Abaamoori, owali niyamenya Hesibboni, yi Musa neende Abaisiraeli bayiingira nibahatula mu syaalo sy'e Misiri.

⁴⁷Bawaamba baatuka esyaalo syae neende esyaalo sya Ogu, omutuki wa Bbasani, abatuki babiri ab'Abaamoori, abali nibamenya ebukwe wa Yorodaani.

⁴⁸Esituundu sino situla Aroeri, esiri hu lwaaho lw'ehooho lya Arinooni, ohwoola hu lugulu lwa Sirioni (olwo nilwo olugulu lwa Hamoni),

⁴⁹alala neende Arabba syoosi esiri hu lwaande lw'ebukwe wa Yorodaani ohwoolera elalira hu Nyaanja ya Arabba, aasi w'ebiihiriro bya Pisiga.